Tindlela Letisihlanu Tekutfola Sifundvo SeliBhayibheli
1. Nangabe kumatima kutfola sifundvo seliBhayibheli ensimini, yini lesingayenta futsi ngasiphi sizatfu?
1 Ukukhandza kumatima yini kutfola umuntfu longafundza naye liBhayibheli? Ungayekeli kwetama. Jehova uyababusisa labangaphelimandla ekwenteni intsandvo yakhe. (Gal. 6:9) Ase sicoce ngetindlela letisihlanu letingakusita.
2. Singasicela njani sifundvo?
2 Sicele: Bantfu labanyenti bayati kutsi sibanika Sicongosekulindza ne-Phaphama! kodvwa kungenteka abati kutsi sifundza nebantfu liBhayibheli mahhala. Kungaba njani ucele kufundza nabo nawushumayela emtini ngemuti. Ungase ubute bantfu labalalelako nawucoca nabo kutsi bangatsandza yini kufundza nawe liBhayibheli. Nangabe bayala, ungachubeka nekubaniketa tincwadzi tetfu uphindze wakhe sifiso sekufundza. Lomunye umzalwane bekasolo avakashela indvodza nemkayo iminyaka leminyenti abahambisela bomagazini. Ngemuva kwekubashiyela bomagazini bamuva, watsi nasahamba wakhumbula kubabuta kutsi: “Ningatsandza yini kuba nesifundvo seliBhayibheli?” Wamangala nabavuma. Nyalo sabebhajatisiwe.
3. Kufanele sicombezele yini kutsi bantfu labeta esifundvweni sebayafundzelwa? Chaza.
3 Kulababakhona Emihlanganweni: Ungatitjeli kutsi bantfu lababa khona emihlanganweni yelibandla sebavele bayafundzelwa. Lomunye umzalwane utsi: “Ihhafu yetifundvo lebenginato ngaticalisa ngekukhuluma nebantfu labebete esifundvweni.” Lomunye dzadze wancuma kukhuluma namake lonemahloni lobekanemandvodzakati labhajatisiwe. Lomake bekasolo aba khona emihlanganweni iminyaka lengu-15 futsi bekafika nakucala imihlangano kutsi nayiphela asheshe ahambe. Lomake wasemukela sifundvo futsi ngekuhamba kwesikhatsi waba ngumKhristu. Lodzadze utsi: “Ngiva buhlungu ngekutsi ngamyekela yonkhe leminyaka lengu-15.”
4. Singasitfola njani sifundvo ngekusitwa ngulabanye?
4 Ngekusitwa Ngulabanye: Lomunye dzadze uhamba nalabanye nabayochuba tifundvo tabo. Ngemvume yemchubi wesifundvo, ekuphetseni kwaso ubuta umfundzi kutsi kukhona yini lamatiko longase akujabulele kufundzelwa. Nawuhambisela umuntfu lovame kumvakashela incwadzi letsi Lokufundziswa LiBhayibheli, ungase umbute kutsi: “Ukhona yini lomatiko longatsandza kutfola lencwadzi?” Ngaletinye tikhatsi timo atibavumeli bamemeteli nemahlahlandlela kutsi bachube tifundvo nemuntfu labamtfole ensimini. Nakunjalo, bacele bakutsintse kuze uchube leso sifundvo.
5. Kungani kufanele sicoce nemlingani walongakholwa nasifuna kumfundzela?
5 Balingani Bemshado Labangakholwa: Bakhona yini bamemeteli ebandleni lakini labanebalingani bemshado labangakholwa? Labanye bantfu labangakholwa abatsandzi kucoca ngeliBhayibheli nebalingani babo labangemaKhristu kodvwa bangasemukela sicelo sekufundza nalomunye umuntfu longasilo lilunga lemndeni. Etikhatsini letinyenti kukahle kucale ucoce nemlingani lokholwako kuze utfole indlela lekahle yekucela sifundvo kumlingani longakholwa.
6. Ubaluleke kangakanani umthantazo nawufuna kutfola sifundvo seliBhayibheli?
6 Umthantazo: Ungawatsatsi kancane emandla emthantazo. (Jak. 5:16) Jehova wetsembisa kuyilalela imithantazo yetfu nangabe ivumelana nentsandvo yakhe. (1 Joh. 5:14) Lomunye umzalwane lobekamatasa kakhulu wathantaza acela sifundvo seliBhayibheli. Umkakhe bekatibuta kutsi umyeni wakhe uyoke abe naso yini sikhatsi sekuchuba sifundvo, ikakhulukati nangabe lamfundzelako anetinkinga letinyenti. Lodzadze wathantaza ngalendzaba acelela umyeni wakhe kutsi atfole sifundvo. Imithantazo yabo yaphendvulwa ngemuva kwemaviki lamabili ngalesikhatsi lihlahlandlela lasebandleni labakulo litfola lenye indvodza lebeyifuna kuchutjelwa sifundvo lase lisiniketa lomzalwane. Lodzadze utsi: “Lengingakusho kunome ngubani lobona ngatsi kumatima kuchuba sifundvo seliBhayibheli kutsi, sigagule sicelo sakho kuJehova futsi ungayekeli kuthantaza. Sijabula kakhulu kunendlela bengicabanga ngayo.” Ngekuphikelela, nawe ungasitfola sifundvo seliBhayibheli utfole nenjabulo ngekusita lotsite kutsi ahambe ‘ngendlela lencane leyisa ekuphileni.’—Mat. 7:13, 14.