Indlela Longazuza Ngayo Ecenjini Lakho Lasensimini
1. Ngutiphi tinzuzo lebetikhona endleleni Sifundvo Sencwadzi lebesihlelwe ngayo letisatfolakala nasemacenjini etfu asensimini?
1 Uyasikhumbula yini Sifundvo Sencwadzi? Besakhiwa ngemacembu lamancane. Loko bekwenta kube melula kwakha bungani lobebusisita sihlale sicinile ekukholweni. (Taga 18:24) Umbonisi wesifundvo sencwadzi bekati timo tetfu letehlukehlukene futsi akhona nekukhutsata umuntfu ngamunye. (Taga 27:23; 1 Phet. 5:2, 3) Letinzuzo tisatfolaka nanyalo emacenjini etfu asensimini.
2. Singasitsatsa njani kucala sinyatselo sekwakha bungani lobucinisa kukholwa emacenjini asensimini?
2 Tsatsa Sinyatselo Kucala: Emacembu asensimini ayalingana nemacembu esifundvo sencwadzi. Ngekusebenta “ngebunye” ensimini, kwakheka bungani emkhatsini wetfu. (Fil. 1:27) Bangakhi bamemeteli labasecenjini lakho loke wahamba nabo ensimini? ‘Ungayivula yini inhlitiyo’ yakho kuze wente loku? (2 Khor. 6:13) Ngetulu kwaloko, ngaletinye tikhatsi singamema labanye lesinabo ecenjini letfu kutsi babe natsi eKukhonteni Kwemndeni kwakusihlwa nobe sibamemele kutsi batokudla natsi. Kulamanye emabandla, emacembu ensimi avame kushintjana ekulungiseleleni tikhulumi letivakashile kudla. Ngeligema lalo, licembu liyahlangana lidle ndzawonye futsi likhutsatane ngisho nobe sikhulumi singeke sikhone kutodla nalo.
3. Ngumaphi lamanye ematfuba ekutfola sikhatsato emacenjini etfu asensimini?
3 Nanobe nyalo libandla selihlangana kabili ngeliviki, loko akusho kutsi bamemeteli akufanele bavakashelwe bazalwane batobakhutsata. Ecenjini ngalinye lasensimini, kubekwe umbonisi welicembu kuze akhutsate bonkhe labasecenjini aphindze abaceceshe ensimini. Nangabe umbonisi welicembu lenu angakawenti emalungiselelo ekusebenta nawe ensimini, kungaba njani ucele kusebenta naye. Ngetulu kwaloko, umbonisi wemsebenti uya ensimini nemacembu lehlukehlukene ngemphelasontfo yinye inyanga ngayinye. Emabandleni lamancane lapho kunemacembu khona lambalwa asensimini, angase ahlele kuvakashela licembu ngalinye kabili ngemnyaka. Uyawenta yini emalungiselelo ekuya ensimini nangabe umbonisi wemsebenti asebenta nelicembu lenu?
4. (a) Ihlelwa njani imihlangano yangembikwekuya ensimini? (b) Kungani kufanele sikucabangele kuvula imiti yetfu kuze kuchutjelwe kuyo lemihlangano?
4 Kuvamile kutsi timphelasontfo tibe sikhatsi lesikahle sekutsi emacembu aye ensimini. Kubambela umhlangano wangembikwekuya ensimini etindzaweni letehlukehlukene mhlawumbe ngesikhatsi lesabekwa, kungenta kube melula kutsi bamemeteli babe khona kulomhlangano mhlawumbe baye nasensimini. Bamemeteli bangabiwa ngekushesha bacale insimu ngekushesha. Loku kungenta kube melula ngembonisi welicembu kutsi anake bamemeteli labasecenjini lakhe. Nobe kunjalo, timo tingase tibitele kutsi emacembu lamabili nobe ngetulu ahlangane. Nangabe lonkhe libandla lihlangene ndzawonye kuze liye ensimini ngeMgcibelo wekucala enyangeni nobe ngemuva kweSifundvo Se-Sicongosekulindza, kungaba kuhle kutsi licembu ngalinye lihlale ndzawonye, umbonisi welicembu ngalinye aniketwe sikhashana kuze abe bamemeteli labasecenjini lakhe kusengakathantazwa.—Fundza libhokisi lelitsi “Ungawuvula Yini Umuti Wakho?”
5. Nanobe sesite Sifundvo Sencwadzi, yini lesingaciniseka ngayo?
5 Nanobe sesite Sifundvo Sencwadzi, Jehova uyachubeka nekusiniketa konkhe lesikudzingako kuze sente intsandvo yakhe. (Heb. 13:20, 21) Ngekunakekekwa nguye, asesweli lutfo. (Hla. 23:1) Sitfola tibusiso letinyenti emacenjini etfu asensimini. Nangabe sisitsatsa kucala sinyatselo ‘sihlanyela kakhulu, siyawuvuna kakhulu.’—2 Khor. 9:6.
[Box on page 6]
Ungawuvula Yini Umuti Wakho?
Lamanye emabandla ayawahlanganisa emacembu asensimini ngetimphelasontfo ngesizatfu sekutsi ete indzawo langachubela kuyo umhlangano wangembikwekuya ensimini. Lemihlangano ililungiselelo lelibandla, ngako kubambela lomhlangano emtini wakho kulilungelo. Ungawuvula yini umuti wakho kuze kubanjelwe kuwo lomhlangano? Ungenceni kuwuvula ngobe wesaba kutsi umuti wakho uphansi. Labadzala batawucabangela indzawo umuti wakho lokuyo naletinye tintfo njengobe bebenta nabakhetsa indzawo yekubambela sifundvo sencwadzi. Nangabe ungatsandza kuvula umuti wakho, yatisa umbonisi welicembu lakho.