Indlela Yekwenta Kutsi Imihlangano Yangaphambi Kwekuya Ensimini Ifeze Injongo Yayo

1. Imihlangano yangaphambi kwekuya ensimini ifeza yiphi injongo?

¹ Ngalelinye lilanga, Jesu wahlangana nebafundzi bakhe labangu-70 ngaphambi kwekutsi baye emsebentini wekushumayela. (Luk. 10:1-11) Wabakhutsata ngekubakhumbuta kutsi bebangeke babe bodvwa nabenta lomsebenti nekutsi bebacondziswa ‘yiNkhosi yekuvuna’ lenguJehova. Waphindze wabahlomisa ngekubaniketa ticondziso tekwenta lomsebenti futsi wabatfuma “ngababili.” Nalamuhla, imihlangano lesiba nayo ngaphambi kwekuya ensimini ifeza injongo lefanako—iyasikhutsata, isihlomise futsi isisite kutsi sihleleke.

2. Kufanele utsatse sikhatsi lesingakanani umhlangano wangaphambi kwekuya ensimini?

² Lemihlangano nyalo ivama kutsatsa imizuzu lelishumi kuya kulengu-15, lokusuke kufaka ekhatsi kwaba labakhona, kusho kutsi kusetjentwa yiphi insimu kanye nekuthantaza. Sekunelushintjo lolwentiwe kuloku. Kusukela nga-April, imihlangano yangaphambi kwekuya ensimini seyitawutsatsa imizuzu lesihlanu kuya kulesikhombisa. Kodvwa-ke nangabe lemihlangano iba ngemuva kwalomunye umhlangano welibandla, kufanele itsatse sikhatsi lesincane kunaleso, ngobe labo labatawube bakhona batawube sebavele bakujabulele kufundza ngemiBhalo. Kuba nemihlangano lemifishane ngaphambi kwekuya ensimini kutawusita bonkhe labakhona kutsi bakhone kucitsa sikhatsi lesinyenti benta umsebenti wekushumayela. Loku kutawuphindze kusite emahlahlandlela nebamemeteli kutsi bangaphazamiseki kakhulu nangabe besebavele bacalile kushumayela ngaphambi kwekutsi baye kulomhlangano.

3. Ingahlelwa kanjani imihlangano yangaphambi kwekuya ensimini kute ibe lusito lolukhulu kubamemeteli?

³ Imihlangano yangaphambi kwekuya ensimini kufanele ihlelwe ngendlela yekutsi ibe lusito kakhulu kubamemeteli. Emabandla lamanyenti akutfola kulusito kutsi emacembu laya ensimini angahlanganeli endzaweni yinye kodvwa ehlukane. Loku kungenta kutsi kube melula ngebamemeteli kutsi baye emhlanganweni wangaphambi kwekuya ensimini, mhlawumbe futsi nakuleyo nsimu. Bamemeteli bangabiwa ngekushesha, futsi kungaba melula ngebabonisi bemacembu kutsi babanake labo labasemacenjini abo. Sigungu salabadzala singacabangela timo tendzawo bese siyancuma kutsi nguyiphi indlela lengaba ncono. Ngaphambi kwekuwephetsa lomhlangano ngemthantazo, bonkhe kufanele babe sebati kutsi bayoshumayela ngakuphi futsi nabani.

4. Kungani kungakafaneli sitsatse imihlangano yangaphambi kwekuya ensimini njengalengakabaluleki kunaleminye imihlangano?

⁴ Ibaluleke Njengaleminye Imihlangano Yelibandla: Ngesizatfu sekutsi imihlangano yangaphambi kwekuya ensimini isuke yentelwe kuzuzisa labo labaya ensimini, akudzingeki kutsi lonkhe libandla libe khona. Kodvwa loko akusho kutsi kufanele bese seyitsatselwa phansi kunaleminye imihlangano yelibandla nobe kucatjangwe kutsi ayikabaluleki. Njengayo yonkhe leminye imihlangano yetfu, imihlangano yangaphambi kwekuya ensimini iyindlela Jehova lasisita ngayo kutsi sikhutsatane elutsandvweni nasemisebentini lemihle. (Heb. 10:24, 25) Ngako-ke, loyo lotawube achuba kufanele abe alungiselele kahle kute lencociswano idvumise Jehova futsi izuzise nalabo labakhona. Bamemeteli labaya ensimini bakhutsatwa kutsi bente umetamo wekuba khona.

Imihlangano yangaphambi kwekuya ensimini akukafaneli itsatselwe phansi kunaleminye imihlangano yelibandla nobe kucatjangwe kutsi ayikabaluleki

5. (a) Iyini indzima yembonisi wemsebenti ekuhleleni imihlangano yangaphambi kwekuya ensimini? (b) Yini lokufanele yentiwe ngudzadze nakachuba umhlangano wangaphambi kwekuya ensimini?

⁵ Kulungiselela Lokwentiwa Ngulotawube Achuba: Kuze umuntfu ayetfule kahle incenye labelwe yona emhlanganweni kudzingeka atjelwe ngayo kusenesikhatsi. Kuyintfo lefanako nanakukhulunywa ngemihlangano yangaphambi kwekuya ensimini. Nangabe kuphunywa ngemacembu, babonisi bemacembu nobe basiti babo ngibo labachuba imihlangano yangaphambi kwekuya ensimini. Kodvwa-ke nangabe libandla litawuphuma ndzawonye, ngumbonisi wemsebenti lotawabela umuntfu lotawuchuba loyo mhlangano. Labanye babonisi bemsebenti baniketa bonkhe labachuba lemihlangano luhla lwalabo labatawube bachuba baphindze balunameke ebhodini. Umbonisi wemsebenti kufanele abakhetse kahle labangachuba, akhumbule kutsi lizinga lalemihlangano litawuya ngelikhono lekufundzisa kanye nelekuhleleka lalabo labachubako. Nangabe kute longulomdzala welibandla, nobe loyinceku lesebentako, nobe lomunye umzalwane lobhajatisiwe losebentisekako longabelwa ngalamanye emalanga, umbonisi wemsebenti kufanele acele dzadze lokufanelako kuchuba kutsi achube.—Fundza sihloko lesitsi “Nakufanele Kuchube Dzadze.”

6. Kubaluleke ngani kutsi loyo lowabelwe kutsi achube alungiselele kahle?

⁶ Nasitfola sabelo eSikolweni Semsebenti WemaKhristu nobe eMhlanganweni Wemsebenti, siyatimisela futsi sisilungiselele kahle. Bancane kitsi labangatsi sebasendleleni leya emihlanganweni kube ngukhona bacabanga kutsi batawutsini. Sabelo sekuchuba imihlangano yangaphambi kwekuya ensimini kufanele sitsatfwe ngendlela lefanako. Njengobe sikhatsi salomhlangano sesentiwe saba sifishane, kubaluleke kakhulu kulungiselela kahle kute lomhlangano utawuzuzisa futsi uphele ngesikhatsi. Kulungiselela kahle kuphindze kufake ekhatsi nekuyitfola kusengaphambili insimu letawusetjentwa.

7. Ngutiphi letinye tintfo loyo lochubako langacoca ngato kulomhlangano?

⁷ Lokungacocwa Ngako: Njengobe timo tingafani ensimini ngayinye, kute luhlaka lolulungiselelwe sisebenti lesetsembekile kute lusetjentiswe kulemihlangano yangaphambi kwekuya ensimini. Libhokisi lelitsi “Lokungacocwa Ngako Emhlanganweni Wangaphambi Kwekuya Ensimini” liveta letinye tetintfo lesingatenta. Esikhatsini lesinyenti, lomhlangano utawuba yincociswano. Ngaletinye tikhatsi kungentiwa umboniso lolungiselelwe kahle nobe kubukelwe lenye yema-video laku-jw.org. Nakasalungiselela lomhlangano, loyo lochubako kufanele acabange ngetintfo letitawukhutsata futsi tihlomise labo labaya ensimini ngalelo langa.

Nakasalungiselela lomhlangano, loyo lochubako kufanele acabange ngetintfo letitawukhutsata futsi tihlomise labo labaya ensimini ngalelo langa

8. NgeMigcibelo nangeMasontfo, yini lokungazuzisa kakhulu kucoca ngayo emihlanganweni yangaphambi kwekuya ensimini?

⁸ Nasi sibonelo: NgeMigcibelo, bamemeteli labanyenti bahambisa Sicongosekulindza ne-“Phaphama!” Labanyenti labaphuma ngeMgcibelo abaphumi ekhatsi neliviki, ngako bangahle babe nebulukhuni bekukhumbula inshumayelo labayiphrakthize eKukhonteni Kwemndeni kwabo kwakusihlwa. Ngako-ke, kungaba lusito kutsi umchubi abukete yinye yetinshumayelo letisibonelo letivela ekhasini lelingemuva le-Msebenti Wetfu WeMbuso. Lokunye lokungentiwa kungaba kucoca ngendlela yekufaka indzaba lesematseni, lokutsite lokwentekile, nobe liholidi nawuhambisa magazini nekutsi ungasibeka njani sisekelo sekubuyela kumuntfu nangabe emukela magazini. Nangabe labanye labakhona kulomhlangano sebake bawuhambisa magazini waleyo nyanga, loyo lochubako angabacela kutsi basho lokunye lokungaba lusito nawuhanjiswa nobe lokuhlangenwe nako lokukhutsatako. NgeMasontfo, loyo lochubako angakhetsa kwenta intfo lefanako nangesipho sangaleyo nyanga. Tincwadzi lokuchutjwa ngato tifundvo teliBhayibheli, njengencwajana letsi Tindzaba Letimnandzi naletsi Lalela Nkulunkulu kanye nencwadzi letsi Lokufundziswa LiBhayibheli tingahanjiswa nobe kunini, ngako loyo lochuba umhlangano wangaphambi kwekuya ensimini angaveta kafishane indlela yekuhambisa lenye yato.

9. Yini lokungacocwa ngayo ngemphelasontfo nangabe kunemkhankaso lokhetsekile?

⁹ Nangabe libandla lisemkhankasweni lokhetsekile ngaleyo mphelasontfo, loyo lochuba lomhlangano angacoca ngetindlela tekuhambisa bomagazini bangaleyo nyanga kanye naleso simemo nobe lipheshana, nobe acoce ngalokungentiwa nangabe umuntfu abonakala anesifiso sekulalela. Lokunye langakwenta kucoca ngalokuhlangenwe nako lokuveta bumcoka balemikhankaso.

10, 11. Kungani kubalulekile kutsi bamemeteli balungiselele kuze umhlangano wangaphambi kwekuya ensimini uphumelele?

¹⁰ Kulungiselela Lokwentiwa Bamemeteli: Bamemeteli nabo banendzima ekwenteni kutsi umhlangano wangaphambi kwekuya ensimini uphumelele. Ngekuwulungiselela kusengaphambili umsebenti wekushumayela, mhlawumbe ekukhonteni kwemndeni, bangaba nalokutsite labangakucocela labanye bamemeteli. Kulungiselela kahle kufaka ekhatsi kutsatsa bomagazini kanye naletinye tincwadzi ngaphambi kwekuya kulomhlangano kuze nasewuphela bonkhe bahambe ngaphandle kwekubambelela.

¹¹ Kubalulekile nekufika kusesele imizuzu lembalwa ngaphambi kwekutsi umhlangano ucale. Kuliciniso kutsi silwela kufika ngesikhatsi kuyo yonkhe imihlangano yelibandla. Kodvwa-ke kungaphazamisa kakhulu kungafiki ngesikhatsi emhlanganweni wangaphambi kwekuya ensimini. Kanjani? Lomzalwane lochubako ucabangela tintfo letinyenti ngaphambi kwekutsi abe bamemeteli kutsi batawuhamba njani. Nangabe kunebamemeteli labambalwa, angakhetsa kutsi bonkhe basebente insimu lengazange icedvwe. Nangabe labanye bafike ngetinyawo kulomhlangano kantsi kuyosetjentwa insimu lekhashane, angakhetsa kubahambisa nebamemeteli labanetimoto. Nakusetjentwa insimu legcwele bugebengu, angaba bazalwane kutsi basebente nabodzadze nobe kutsi basebente dvutane nelicembu labodzadze. Bamemeteli lababutsakatsaka nalasebakhulile bangabelwa kutsi basebente lapho kubeke khona nobe etakhiweni letite titebhisi letinyenti. Bamemeteli lesebanesikhatsi lesidze bangase bahanjiswe nalabo labasandza kuba bamemeteli. Kodvwa nangabe bamemeteli bangafiki ngesikhatsi, kungadzingeka kutsi kwentiwe lushintjo nangabe besekwabiwe. Kuyavunywa kutsi ngaletinye tikhatsi singaba nesizatfu lesivakalako sekwephuta kufika. Nanobe kunjalo, nangabe sekungumkhuba wetfu kungafiki ngesikhatsi, kufanele sitibute kutsi kubangelwa kutsi asiyitsatsi njengalebalulekile yini lemihlangano yangaphambi kwekuya ensimini nobe kutsi siyehluleka kuhlela timo tetfu kahle kusenesikhatsi.

12. Nangabe uvame kutihlelela kutsi utawuhamba nabani, yini longase uyicabangele?

¹² Bamemeteli bangase batihlelele bona usengakacali umhlangano wangaphambi kwekuya ensimini nobe babiwe kutsi bahambe nalotsite. Nangabe uvame kutihlelela kutsi utawuhamba nabani, kungeke kube kuhle yini kutsi ‘uvule inhlitiyo’ ngekusebenta nebamemeteli labehlukehlukene kunekutsi ngaso sonkhe sikhatsi usebente nebangani bakho? (2 Khor. 6:11-13) Ungahlela yini kusebenta nemuntfu losandza kuba ngummemeteli kute umsite atfutfukise emakhono akhe ekufundzisa? (1 Khor. 10:24; 1 Thim. 4:13, 15) Tilalelisise tonkhe ticondziso leninikwa tona, letifaka ekhatsi kutsi nitawucala kuphi kushumayela. Nawuphela lomhlangano, kubalekele kushintja loko losekuhleliwe, kodvwa hambani ngekushesha niye ensimini lenitayisebenta.

13. Imihlangano yangaphambi kwekuya ensimini itasizuzisa njani nangabe bonkhe labatsintsekako banaka futsi bayidlala indzima yabo?

¹³ Ngemuva kwekushumayela, labafundzi labangu-70 Jesu labebatfume kuyoshumayela “babuya bajabulile.” (Luk. 10:17) Asingabati kutsi lomhlangano Jesu lawubamba nabo ngaphambi kwekutsi bayewushumayela wabasita kutsi baphumelele. Nalamuhla, imihlangano yangaphambi kwekuya ensimini ingasizuzisa ngendlela lefanako. Nangabe bonkhe labatsintsekako banaka futsi bayidlala indzima yabo, imihlangano yangaphambi kwekuya ensimini itasikhutsata, isihlomise futsi isisite sihleleke kute sifeze umsebenti wetfu wekuniketa “bufakazi etiveni tonkhe.”—Mat. 24:14.

Nakufanele Kuchube Dzadze

Dzadze kufanele ambonye enhloko futsi ngalokuvamile utawuhlala phansi nakachuba umhlangano wangaphambi kwekuya ensimini. Loko lakhetsa kucoca ngako kutawufana naloko umzalwane langakukhetsa. Kuze angabonakali shengatsi uyabafundzisa labakhona kulomhlangano, angenta lendzaba kutsi ibe yincociswano. Nakacela lomunye dzadze lobhajatisiwe kutsi athantaze, naye kufanele ambonye enhloko. Nangabe kufika umzalwane lobhajatisiwe, lodzadze ngalokuvamile utamcela kutsi awucedzele lomhlangano. Umbonisi wemsebenti kufanele etame kucabanga ngetimo letingakavami letingahle tibe khona futsi anikete ticondziso letifanele kuze kuncishiswe tinkinga. Nasi sibonelo: Umzalwane losemncane, mhlawumbe losengakefiki eminyakeni yekutfomba angase abe khona nakuchuba dzadze, kodvwa bazalwane labadzala babone kutsi usengakafaneli kuchuba lomhlangano. Esimeni lesinjengalesi, umbonisi wemsebenti angabatjela labo labatsintsekako kutsi lodzadze nguye lotawuchuba lomhlangano, lomzalwane utawuthantaza nangabe labadzala bambona kutsi sewukulungele. Nobe mhlawumbe kunemzalwane losamdzala longakavumeleki kuchuba lomhlangano nobe kuthantazela libandla ngenca yetizatfu letatiwa ngulabadzala belibandla. Ngaphandle kwekuveta timfihlo, labadzala bangabatisa labodzadze lababelwe kutsi bachube lomhlangano futsi bathantaze ngisho nobe akhona. Labadzala bangaphindze bamtjele nalomzalwane kutsi ngumaphi emalanga labodzadze lababelwe kuchuba ngawo lomhlangano.

Lokungacocwa Ngako Emhlanganweni Wangaphambi Kwekuya Ensimini:

Inshumayelo lesibonelo letfolakala ku-Msebenti Wetfu WeMbuso.
I-video lemayelana nemsebenti wekushumayela leku-jw.org.
Lokutsite lokwenta inshumayelo ibe yimphumelelo, njengesetfulo, kubeka sisekelo sekubuyela kulococe naye, nobe kukhuluma ngemnikelo nangabe lotsite emukele tincwadzi tetfu.
Umbhalo lokhutsatako nobe lofundzisako lohambelana nemsebenti wekushumayela.
Lokuhlangenwe nako kwasebandleni nobe lokubhaliwe lokumayelana nemsebenti wekushumayela.
Kwatiswa lokutfolakala esihlokweni lesitsite se-Msebenti Wetfu WeMbuso.
Lokutsite lokucocwe ngako eMhlanganweni Wemsebenti wamuva.
Emaphuzu lahlobene nemsebenti wekushumayela latfolakala ku-Sicongosekulindza.
Emaphuzu lahlobene nemsebenti wekushumayela latfolakala encwadzini letsi Sikolwa Semsebenti nakuletsi “Woza Ube Ngumlandeli Wami.”
Incenye ye-jw.org lengasetjentiswa emsebentini wekushumayela.
Incenye ye-Lihumusho Lemhlaba Lomusha lelibuketiwe lengasetjentiswa emsebentini wekushumayela. Letinye tilwimi tingasebentisa incwajana letsi Setfulo SeliVi LaNkulunkulu (igw) naletsi Lithulusi Lekutadisha LiVi LaNkulunkulu (sgd).
Indlela yekucalisa incociswano nemuntfu longahlangana naye ensimini, njengemuntfu longakholwa kutsi Nkulunkulu ukhona, umuntfu lokholelwa ekutigucukeleni kwemvelo, umHindu, nobe umBhuda.
Indlela yekuphendvula umuntfu longafuni kucoca nawe.
Indlela yekusita lohamba naye ensimini kutsi atfutfukise likhono lakhe lekushumayela.
Loko lokufanele sikwente nasihlangana nemuntfu longakhulumi lulwimi lwetfu.
Loko lokufanele sikwente nasisebentisa indlela letsite yekushumayela, njengemsebenti wekufuna bantfu, kufakaza ngelucingo, kufakaza etindzaweni tawonkhe wonkhe, kubuyela kulesicoce nabo, nobe kuchuba tifundvo teliBhayibheli.
Tikhumbuto letimayelana nekuphepha, kutivumelanisa netimo, indlela lokufanele sitiphatse ngayo, kuba nembono lokahle, nobe letinye tintfo letifanana naleti.