KUPHILA KWEMAKHRISTU
Indlela Yekwenta Imihlangano Yangaphambi Kwekuya Ensimini Ifeze Injongo Yayo
Njengayo yonkhe imihlangano yelibandla, imihlangano yangaphambi kwekuya ensimini ililungiselelo lelivela kuJehova lelisisita kutsi sikhutsatane elutsandvweni nasemisebentini lemihle. (Heb 10:24, 25) Kufanele itsatse imizuzu lengaba ngu-5 kuya kulengu-7, lokufaka ekhatsi kwaba labakhona, kusho kutsi kusetjentwa yiphi insimu kanye nekuthantaza. (Nangabe lemihlangano iba ngemuva kwalomunye umhlangano welibandla, kufanele itsatse sikhatsi lesincane kunaleso.) Lotawube achuba kufanele asho emaphuzu labatawasebentisa ensimini bazalwane ngalelo langa. Sibonelo nje, labanyenti labaphuma ngeMgcibelo abaphumi ekhatsi neliviki, ngako umchubi kufanele acoce ngaloko labangakusho kumnikati welikhaya. Ngutiphi letinye tihloko letingaba lusito umchubi langacoca ngato?
Incociswano lesibonelo letfolakala eNcwajaneni Yekubhalela Emihlanganweni
Indlela yekusebentisa indzaba lesematseni nobe lokuvetwe etindzabeni kute ucalise incociswano
Indlela yekuphendvula kuphikiswa lokuvamile
Indlela yekuphendvula umuntfu longakholelwa kutsi Nkulunkulu ukhona, umuntfu lokholelwa ekutigucukeleni kwemvelo, umuntfu lokhuluma lolunye lulwimi, nobe umuntfu wakulenye inkholo lengakavami ensimini lokuyo
Indlela yekusebentisa i-website letsi jw.org, i-JW Library® app nobe liBhayibheli
Indlela yekusebentisa linye lemathulusi lelisemaThulusini Ekufundzisa
Indlela yekushumayela ngaletinye tindlela, njengekushumayela ngelucingo, kubhala incwadzi, kushumayela etindzaweni tawonkhe wonkhe, kubuyela kulesicoce nabo, nobe kudadisha nebantfu liBhayibheli
Tikhumbuto letimayelana nekuphepha, kutivumelanisa netimo, indlela lokufanele sitiphatse ngayo, kuba nembono lokahle, nobe letinye tintfo letifanana naleti
Sifundvo nobe i-video letfolakala encwajaneni letsi Timisele Ekufundzeni Nasekufundziseni
Indlela yekukhutsata nekusita ummemeteli lohamba naye ensimini
Umbhalo lokhuluma ngekushumayela nobe lokutsite lokukhutsatako lokwenteke emsebentini wekushumayela