Indlela Yekulungiselela Tetfulo Letiphumelelako
1. Sibaluleke ngani setfulo lesiphumelelako?
1 Njengobe kudla lokuncane lokumnandzi locala ngako kwakha sifiso sekuchubeka udla, setfulo lesikahle sibangela kutsi ube nencociswano lemnandzi yemBhalo. Tetfulo letiphumelelako tingase tingafani futsi tingalingani, kodvwa njengekudla lokwehla esiphundvu, ngaso sonkhe sikhatsi tidzinga kucatjangwa kusenesikhatsi tiphindze tilungiselelwe kahle. (Taga 15:28) Yini lebangela kutsi setfulo siphumelele?
2. Singasilungiselela njani setfulo lesitawujabulisa umuntfu lesicoca naye?
2 Khetsa Tihloko Latatijabulela Lococa Naye: Setfulo setfu kufanele simjabulise umuntfu lesicoca naye, nakungenjalo angase ayijube incociswano. Ngako-ke nawulungiselela, cabanga ngaloko bantfu basendzaweni labangajabulela kukuva. Bantfu basemmangweni lokuwo bajabulela kuva ngahulumende lokahle yini, ngekuphila kwemndeni lokujabulisako nobe ngekuphela kwemphi? Ngalokuvamile bantfu bayatsandza kuveta imibono yabo, ngako-ke lungiselela imibuto letabenta bacabange futsi basho imibono yabo. Ensimini yakini, ungasisebentisa yini setfulo lesitsite kuleto letisibonelo letitfolakala ku-Msebenti Wetfu WeMbuso? Kungaba kuhle nilungiselele letinye taletetfulo ngesikhatsi lesitsite eKukhonteni Kwemndeni kwakusihlwa.
3. Setfulo setfu singasihlela njani kute sivumelane nemasiko kanye nendlela bantfu labasensimini yetfu labakhule ngayo?
3 Cabanga Ngemasiko Nendlela Bantfu Labakhule Ngayo: Kuletinye tindzawo kudzingeka kutsi uvele uhlale endzabeni usho sizatfu sekuvakasha kwakho kuloyo lococa naye. Kantsi kuletinye tindzawo sivakashi sitsatfwa njengemuntfu loluhlata nangabe singacali ngekubuta imphilo kumuntfu lesicoca naye mhlawumbe ngisho nekumcocela lokutsite ngaso. Kuletinye tindzawo bantfu betayelene nenkholo, loko kwenta kutsi esetfulweni setfu sikhone kukhuluma ngekukhululeka ngeliBhayibheli. (Imis. 2:14-17) Nobe kunjalo, etindzaweni lapho kunebantfu labangekho enkholweni yebuKhristu, nobe labangakholwa sanhlobo, kungase kube kuhle kukhuluma ngeliBhayibheli nasewubavakashela kwesibili esikhundleni sekutsi loko ukwente ekuhambeleni kwekucala.—Imis. 17:22-31.
4. Yini lokufanele siyinake ngemavi lesiwasho ekucaleni?
4 Emavi Lesiwasho Ekucaleni: Walungiselele kahle emavi lotawasho ekucaleni. Imisho lemifishane nalelula, ngiyo levamise kuba kahle. Ibalulekile nendlela lesisho ngayo emavi ekucala. Bani nenshisekelo. Mamatseka, ube nebungani, ukhombise kutsi uyamkhatsalela umuntfu lococa naye. Kwenta loku lesekukhulunywe ngako kutasisita silungiselele tetfulo letimnandzi letitawukhutsata bantfu ensimini yetfu kutsi badle “etafuleni laJehova.”—1 Khor. 10:21.