Lingisa Kukholwa Kwabo
1. Kusukela evikini lelicala nga-October 19, yini lesitayifundza eSifundvweni SeliBhayibheli Selibandla?
1 Kusukela ngeliviki lelicala nga-October 19, 2015, eSifundvweni SeliBhayibheli Selibandla sitawucala kufundza incwadzi letsi Lingisa Kukholwa Kwabo. Lencwadzi ikhuluma kabanti ngetindzaba letiseBhayibhelini temadvodza nebafati labangu-14 labakhombisa kukholwa. Iphindze isisite kutsi sibabone ngeliso lengcondvo, futsi sibatsatse njengebantfu labafana natsi labachubeka nekukhonta Jehova nanobe bebabhekene nebumatima. Kuletindzaba letikulencwadzi sitawutfola tifundvo lesingatisebentisa ekuphileni kwetfu lamuhla.—Heb. 6:12.
2. Chaza kutsi ihlelwe njani incwadzi letsi Lingisa Kukholwa Kwabo.
2 Indlela Lencwadzi Lehlelwe Ngayo: Lencwadzi inemashadi nemabalave lasisita sibone kutsi umuntfu lokukhulunywa ngaye waphila nini futsi kuphi. Sihloko ngasinye siphindze sibe nencenye letsi “Longacabanga Ngako. . . ,” lokutasisita kutsi sizindle ngendzaba futsi sisebentise tifundvo lesititfolile. Lencwadzi inetitfombe letinhle, leticacile naleticatjangelwe kahle, letitasisita sikubone ngeliso lengcondvo loko lokukhulunywa ngako.
3. Yini lesingayenta kute sizuze nasifundza lencwadzi?
3 Indlela Longazuza Ngayo: Incwadzi lebuya eSigungwini Lesibusako isikhutsata ngalamavi latsi: “Kubone ngeliso lengcondvo loko lokufundzako, utibone ulapho nawe. Yetama kucondza indlela lebebativa ngayo labantfu lokukhulunywa ngabo eBhayibhelini, ubone naloko lebebakubona. Catsanisa loko lebebakwenta etimeni letehlukahlukene naloko wena bewungakwenta.” Kukubona ngeliso lengcondvo lokufundzako akusho kutsi kufanele ucabange ngetintfo lokungakakhulunywa ngato, kunaloko kusho kutsi kufanele utibeke esimeni salabo lofundza ngabo futsi uvelane nabo. Loko kudzinga sikhatsi nekuzindla. (Neh. 8:8) Nangabe indzaba lefundvwako itawuchubeka esehlukweni lesingakapheli, umchubi utawutsatsa imizuzwana lengu-30-kuya kulengu-60 abuketa sifundvo lesengcile. Umbuto munye nome mibili ingabutwa ekwephetseni kute kubuketwe sifundvo sangaleloviki nangabe site incenye letsi “Longacabanga ngako . . . ”
4. Kungani kufanele sitadishe incwadzi letsi Lingisa Kukholwa Kwabo?
4 Onkhe emalanga, bantfu lesiphila emkhatsini wabo betama ngato tonkhe tindlela kucedza kukholwa kwetfu nobe kukwenta kube butsakatsaka. Lencwadzi kanye netihloko lesekelwe kuto letiluchungechunge letitfolakala ku-Sicongosekulindza, kutipho letivela kuJehova tekusisita sicinise kukholwa kwetfu. (Jak. 1:17) Ngako-ke, asiyisebentiseni kahle ngekutsi sibe khona njalo eSifundvweni SeliBhayibheli Selibandla futsi sihlanganyele kuso ngetimphendvulo.