Kutfutfukisa Emakhono Etfu Emsebentini Wekushumayela—Kucecesha Bantfu Lofundza Nabo LiBhayibheli Kutsi Balungiselele Kahle

Kubaluleke Ngani?: Kute buhlobo babo naNkulunkulu bukhule, bantfu lesifundza nabo liBhayibheli kufanele bente lokungetulu kwekumane nje bondle tingcondvo netinhlitiyo tabo ngetimfundziso letisisekelo letiseVini laNkulunkulu. (Heb. 5:12–6:1) Kulungiselela kudzinga umetamo. Loku kufaka ekhatsi kuhlobanisa lokusha lokufundzako naloko besewuvele ukwati futsi ucabange kutsi ungakusebentisa njani. (Taga 2:1-6) Kufundza kuticwaningela kutawusita bafundzi bakhone kutfola timphendvulo temibuto basebentisa tincwadzi tebuKhristu letisekelwe eBhayibhelini. Kwetama kukusebentisa loko labakufundzako kutawubahlomisela kutsi bakwati kumelana nanobe nguluphi luvivinyo labatawubhekana nalo njengemaKhristu.—Luk. 6:47, 48.

Indlela Yekukwenta:

Gcizelela kumfundzi bumcoka bekufuna lusito lwaJehova ngemthantazo angakacali kulungiselela sifundvo ngasinye.—Joh. 14:26; 1 Khor. 2:10.
Zibekwa nje, khutsata umfundzi kutsi alungiselele kusenesikhatsi. Mkhombise incwadzi yakho loyisebentisako futsi umfundzise indlela yekudvwebela imisho nobe emagama layinhloko.
Msite aphendvule imibuto asebentisa emavi akhe. Kubalekele kwenta sifundvo sibe yimibuto netimphendvulo lapho umfundzi amane nje afundze imphendvulo njengobe injalo encwadzini.
Khutsata umfundzi kutsi afundze incenye letsite yeliVi laNkulunkulu onkhe emalanga. Mkhombise indlela langakwenta ngayo loko asebentisa luhlelo lwekufundza liBhayibheli lolutfolakala ku-jw.org. Kufundza liBhayibheli onkhe emalanga kudzinga kutimisela kodvwa kwetama kungasita kakhulu.—Hla. 1:2, 3.
Khombisa umfundzi kutsi angatitfola njani timphendvulo temibuto lemayelana neliBhayibheli asebentisa i-Watchtower Library nobe UMTAPO WETINCWADZI we-Watchtower ku-Internet. Msite atati timphawu tetincwadzi lesivamise kutisebentisa emihlanganweni yelibandla.

Yetama Loku Kulenyanga:

Nanicedza kufundza sihlokwana noma sehluko, cela lofundza naye liBhayibheli kutsi akufinyete ngemisho lembalwa loko lasandza kukufundza. Nangabe kute umuntfu lofundza naye liBhayibheli, tetayete kufinyeta indzaba leseBhayibhelini nobe sigaba lesiku-Sicongosekulindza kute utfutfukise indlela loyicondza ngayo indzaba.