Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo
APRIL 3-9
UMCEBO LOSEVINI LANKULUNKULU | JEREMIYA 17-21
“Vumela Jehova Abumbe Indlela Locabanga Ngayo Nalotiphatsa Ngayo”
(Jeremiya 18:1-4) Leli livi lelefika kuJeremiya liphuma kuSimakadze, litsi: 2 “Yehlela endlini yembumbi, ngulapho-ke lapho ngitakunikela khona umlayeto wami.” 3 Ngako-ke ngehlela endlini yembumbi, ngamkhandza enta umsebenti wakhe esondvweni. 4 Kodvwa imbita labeyibumba ngelibumba yonakala etandleni takhe, ngako lombumbi wase ubumba lenye inhlobo yembita, kwaya ngekubona kwemehlo akhe kutsi ufuna ibe njani. Imbita yelibumba yonakala etandleni tembumbi.
w99 4/1 22 ¶3
Ngubani Lobumba Indlela Locabanga Ngayo?
Kulalela ngekutitsandzela kute uzuze nawubunjwa nguJehova kwabonakala ngesikhatsi Jehova atjela umphrofethi Jeremiya kutsi avakashele indzawo yembumbi. Jeremiya wabona umbumbi ashintja indlela lebekasibumba ngayo lesitja ngesikhatsi abona kutsi loko letama kukubumba ‘kuyonakala esandleni sakhe.’ Jehova wabese utsi: “Awu, wenandlu yaka-Israyeli, ngingete ngenta yini kini njengaloku kwenta lombumbi? . . . Njengelibumba etandleni tembumbi, ninjalo nani esandleni sami, ninendlu yaka-Israyeli.” (Jeremiya 18:1-6) Loku bekusho kutsi bantfu baka-Israyeli bebafana nesigadla selubumba lolungaphihliki yini esandleni saJehova kuze awabumbe ngendlela lafuna ngayo, futsi abe ngunoma nguluphi luhlobo lwesitja?
(Jeremiya 18:5-10) Livi laSimakadze lase liyefika kimi, latsi: 6 “Awu, wenandlu yaka-Israyeli, ngingete ngenta yini kini njengaloku kwenta lombumbi?” kusho Simakadze. “Njengelibumba etandleni tembumbi, ninjalo nani esandleni sami, ninendlu yaka-Israyeli. 7 Nome ngangusiphi sikhatsi nangimemetela kutsi sive nome umbuso utawuzushunwa, ubhidlitwe uze ubhubhe, 8 nangabe futsi leso sive lengisecwayisile siphendvuka ebubini baso, ngiyawube sengiyasiyekela, ngingabe ngisasehlisela leso sehlakalo lebesengisilungisele sona. 9 Futsi-ke nangabe ngalesinye sikhatsi sengimemetela kutsi sive nome umbuso utakwakhiwa usime kahle, 10 nase sibuye senta bubi emehlweni ami, sangete sangilalela mine, ngiyawube sengiyasiyekela ngingabe ngisasentela loko lokuhle lebesengikulungisele sona.
it-2 776 ¶4
Kuphendvuka
Umbumbi angenta luhlobo lolutsite lwesitja aphindze asishintje nangabe kwenteka ‘sonakala etandleni takhe.’ (Jer 18:3, 4) Ngalesibonelo, Jehova usitjela kutsi akafani nembumbi longumuntfu lowonakalelwa lubumba esandleni sakhe, kunaloko utsi uneligunya nemandla kunebantfu futsi angashintja indlela lasebentelana ngayo nabo kuye ngekutsi bayavuma yini nobe cha njengobe ababonisa umusa. (Catsanisa na-Isa 45:9; Ro 9:19-21.) Jehova utawubese ‘uyabayekela, angasabehliseli lesehlakalo lebekabalungisele sona,’ konkhe loku kutawuya ngekutsi labantfu bayakulalela yini loko lakushoko. (Jer 18:5-10) Ngako, akusiko kutsi Jehova Umbumbi Lomkhulu wenta emaphutsa, kodvwa ngulolubumba lolushintjako, (kushintja simo nobe kushintja ngalokuphelele) lokusimo senhlitiyo, kutisola ngalokwentile nobe kushintja indlela locabanga ngayo ifane neyaJehova.
(Jeremiya 18:11) “Manje-ke khuluma kulabantfu bakaJuda nakulabo labakhile eJerusalema, utsi: ‘Naku lokushiwo nguSimakadze, utsi: Bukani la, ngilungiselela kunehlisela inhlekelele, nginibumbele luzungu. Ngako-ke phendvukani etindleleni tenu letimbi, ngulowo nalowo wenu aphendvuke, nitigucule tindlela tenu netento tenu.’
w99 4/1 22 ¶4-5
Ngubani Lobumba Indlela Locabanga Ngayo?
Jehova akalokotsi asebentise emandla akhe lamakhulu kuze ente bantfu bente tintfo labangatifuni; futsi angeke simsole ngetitja letibumbeka kabi, njengobe kungase kube njalo ngembumbi longumuntfu. (Dutheronomi 32:4) Kubumbeka kabi kwenteka nangabe labo Jehova letama kubabumba ngendlela lekahle bangavumelani nesicondziso sakhe. Ngulowo umehluko lomkhulu lokhona emkhatsini wakho nesigadla selubumba. Wena unayo inkululeko yekutikhetsela. Ungakhetsa kumlalela Jehova nakakubumba noma ungamlaleli ngemabomu.
Lesifundvo sihle kakhulu! Kuncono kakhulu kulalela livi laJehova kunekutatisa wena utsi, “Kute longangitjela kutsi ngenteni”! Sonkhe siyasidzinga sicondziso saJehova. (Johane 17:3) Bani njengemhlabeleli Davide, lowathantaza watsi: “Ngikhombise tindlela takho, Simakadze, ungifundzise imikhondvo yakho.” (Tihlabelelo 25:4) Khumbula loko lokwashiwo yiNkhosi Solomoni: “Labahlakaniphile batsi bangatilalela kwengeteke lwati lwabo; nalabanengcondvo batsi bangatifundza batente, batfole bungcweti.” (Taga 1:5) Utawulalela yini wena? Nangabe ulalela, “kucophelela kutakugadza, nekucondzisisa kutakwelusa.”—Taga 2:11.
Funisisa Umcebo EVini LaNkulunkulu
(Jeremiya 17:9) Inhlitiyo iyayengana ngetulu kwato tonkhe tintfo, futsi yonakele ngalokwengcile. Ngubani nje longayicondza?
w01 10/15 25 ¶13
Londvolota Inhlitiyo Yakho
13 Jeremiya wasecwayisa watsi: “Inhlitiyo iyayengana ngetulu kwato tonkhe tintfo, futsi yonakele ngalokwengcile. Ngubani nje longayicondza?” (Jeremiya 17:9) Lokuyengana kwenhlitiyo kungase kubonakale nasibeka taba ngemaphutsa etfu, singakunaki kushiyeka kwetfu, sishalatelele buntfu betfu lobubi noma sente lihaba ngetintfo lesitifezile. Inhlitiyo lembi iyakwati nekuba mbacambili—ikhuluma lokunye kepha tento tibe tehlukile. (Tihlabelelo 12:2; Taga 23:7) Kubaluleke kakhulu kutsi setsembeke njengobe sihlola loko lokuphuma enhlitiyweni!
(Jeremiya 20:7) Awu Simakadze, wangiyenga, nami ngayengeka, wangehlula ngemandla, waphumelela. Nyalo sengiyinhlekisa kubantfu lonkhe lilanga, bonkhe bantfu bayangiphukuta.
w07 3/15 9 ¶6
Emaphuzu Lagcamile Encwadzi YaJeremiya
20:7—Jehova walisebentisa njani ligunya lakhe kuze ayenge Jeremiya? Ngenca yekutsi Jeremiya abenganakwa futsi aphatfwa kabi ngesikhatsi amemetela sehlulelo saJehova, weva asete emandla ekuchubeka. Nobe kunjalo, Jehova wasebentisa ligunya lanalo kuze asite Jeremiya futsi wamnika nemandla kuze abeketele. Ngako Jehova wayenga Jeremiya ngekutsi amsebentise ekwenteni loko lomphrofethi abecabanga kutsi angeke akwente.
Kufundvwa KweliBhayibheli
(Jeremiya 21:3-14) Kodvwa Jeremiya wabaphendvula, watsi: “Tjelani Sedekiya, nitsi: 4 ‘Naku lokushiwo nguSimakadze, Nkulunkulu wema-Israyeli, utsi: Sengitanijikela ngilwe nani ngetikhali temphi letisetandleni tenu, lenitisebentisako ekulweni nenkhosi yaseBhabhulona kanye nemaBhabhulona lanivimbetele langephandle kwelubondza. Ngitatihlanganisa ndzawonye ngekhatsi kwalelidolobha. 5 Mine matfupha ngiyakulwa nani ngesandla leselulekile, nangengalo lenemandla, nangentfukutselo, nangesikhahlo, nangelulaka lolukhulu. 6 Ngiyawushaya labo labahlala kulelidolobha, emadvodza netilwane, bayakufa babulawe sifo lesibulalanako. 7 Simakadze utsi: Emvakwaloko Sedekiya, inkhosi yakaJuda, netindvuna tayo, nebantfu balelidolobha labayawusindza kulesifo lesibulalanako, nenkemba, nendlala, ngiyakubanikela kuNebukhadnezari, inkhosi yaseBhabhulona, nasetitseni tabo letifunana nemphilo yabo. Uyawubabulala ngenkemba, angabi naso nakancane nje sihawu, nesihe kanye neluvela.’ “ 8 Simakadze wakhuluma kuJeremiya, watsi: “Tjela sive, utsi: ‘Naku lokushiwo nguSimakadze, utsi: Buka la, ngibeka embikwakho indlela yekuphila neyekufa. 9 Ngulowo nalowo loyawusala kulelidolobha uyakufa ngenkemba, nangendlala, nangesifo lesibulalanako. Kodvwa ngulowo nalowo lophuma atinikele kulamaBhabhulona lanivimbetele, uyawuphila; uyawusindzisa kuphila kwakhe. 10 Ngitimisele kwenta lokubi kulelidolobha, hhayi lokuhle, kusho Simakadze. Liyawuniketelwa etandleni tenkhosi yaseBhabhulona, ilibhubhise ngemlilo.’ ” 11 “Ngetulu kwaloko, khuluma kulendlu yenkhosi yakaJuda, utsi: ‘Vanini livi laSimakadze, 12 awu, wenandlu yakaDavide, naku lokushiwo nguSimakadze, utsi: “ ‘Sebentisani umtsetfocotfo njalo nje ekuseni; nimephule esandleni semcindzeteli lowo lodlelelwe; ngaphandle kwaloko intfukutselo yami itawuvuka ivutse njengemlilo ngenca yebubi lenibentile, yebo, ivutse kubete nalongayicima. 13 Ngiphambene nawe, Jerusalema, wena lohlala ngetulu kwalesihosha entsabeni lengemadvwala, kusho Simakadze. Nine lenikhulumako, nitsi: “Ngubani nje longasihlasela? Ngubani longangena kulenqaba yetfu?” 14 Ngitanijezisa njengobe nifanelwe tento tenu. Emahlatsi enu ngitawokhela ngemlilo lotawucotfula konkhe lokusedvute nani, kusho Simakadze.’
APRIL 10-16
UMCEBO LOSEVINI LANKULUNKULU | JEREMIYA 22-24
“Unayo ‘Yini Inhlitiyo Yekwati’ Jehova”
(Jeremiya 24:1-3) Emvakwekutsi Jehoyakhini, umsa waJehoyakimu, inkhosi yakaJuda, netindvuna, nebakhandzi betinsimbi kanye nebabati labatingcweti kaJuda sebatfunjiwe eJerusalema bayiswa eBhabhulona nguNebukhadnezari, inkhosi yaseBhabhulona, Simakadze wangibonisa titja letimbili temakhiwa tibekwe embikwelithempeli laSimakadze. 2 Lesinye saletitja sasinemakhiwa lamahle kakhulu, afanana nalasheshe avutfwa. Lesinye sasinemakhiwa lamabi kakhulu, amabi kangangekutsi abengeke adleke. 3 Simakadze wangibuta watsi: “Ye Jeremiya, ubonani?” Mine ngaphendvula ngatsi: “Ngibona emakhiwa. Lawa lamahle, mahle kakhulu, kodvwa lawa lamabi, mabi kangangekutsi angeke adleke.”
Unayo Yini “Inhlitiyo Yekwati” Jehova?
2 Jehova wake wahlobanisa emakhiwa netinhlitiyo. Nkulunkulu abengachazi kutsi kuyimphilo kangakanani kudla emakhiwa, kodvwa abemane nje afanekisa. Loko lakusho ngemphrofethi Jeremiya kuyayisita inhlitiyo yakho kanye netinhlitiyo talabo lobatsandzako. Njengobe sihlola loko lakusho, cabanga ngekutsi loko kungasho kutsini ngemaKhristu.
(Jeremiya 24:4-7) Livi laSimakadze lefika kimi, latsi: 5 “Naku lokushiwo nguSimakadze, Nkulunkulu wema-Israyeli, utsi: ‘Njengalamakhiwa lamahle, labatfunjiwe bakaJuda ngibabuka kanjalo nabo, labo lengabesusa kulendzawo ngabatfumela eveni lemaBhabhulona. 6 Emehlo ami ayawubelusa kube lusito kubo, ngiyawuphindze ngibabuyise kulelive. Ngiyawubakha ngingababhidliti; yebo, ngiyawubahlanyela ngingabazuphuni. 7 Ngiyawubapha inhlitiyo yekwati mine kutsi mine nginguSimakadze. Bayawuba bantfu bami, mine ngibe nguNkulunkulu wabo, ngobe bayawuphendvukela kimi ngayo yonkhe inhlitiyo yabo.
Unayo Yini “Inhlitiyo Yekwati” Jehova?
4 Jehova washo nankha emavi mayelana nalabo labamelelwa ngemakhiwa lamahle: “Ngiyawubapha inhlitiyo yekwati mine kutsi mine nginguSimakadze. Bayawuba bantfu bami.” (Jer. 24:7) Sihloko salesifundvo setfu sisekelwe kulamavi, futsi ayakhutsata. Nkulunkulu unesifiso sekuniketa ngamunye wetfu “inhlitiyo yekwati” yena. Kulesimo, “inhlitiyo” isho sifiso umuntfu lanaso. Kuliciniso kutsi uyafuna kuba nenhlitiyo lenjalo nekuba yincenye yebantfu baNkulunkulu. Kute ukwati kukwenta loko, kudzingeka utadishe uphindze ukwente loko lokushiwo liVi lakhe, uphendvuke futsi ugucuke, unikele kuphila kwakho kuNkulunkulu bese uyabhajatiswa egameni leYise, neleNdvodzana, nelemoya longcwele. (Mat. 28:19, 20; Imis. 3:19) Kungenteka sewutitsetse leto tinyatselo, nobe sewuhlangana njalo naboFakazi BaJehova futsi ufuna kutsatsa leto tinyatselo.
(Jeremiya 24:8-10) ‘Kodvwa njengalamakhiwa lamabi langadleki ngiyakwenta njalo kuSedekiya, inkhosi yakaJuda, netindvuna takhe, nensali yaseJerusalema, nome basele lapha kulelive nome bahlala eGibhithe,’ kusho Simakadze. 9 ‘Ngiyawubenta babe sinengiso nesikhubekiso kuyo yonkhe imibuso yemhlaba, babe lihlazo nesiga, babe yintfo yekuhlekisa nesicalekiso, nome ngukuphi lapho ngibadzingisele khona. 10 Ngiyawubatfumelela inkemba, nendlala kanye nesifo lesibulalanako lokuyawubehlela baze babhujiswe kulelive lengalinika bona naboyisemkhulu.’
Unayo Yini “Inhlitiyo Yekwati” Jehova?
3 Ase sicale sicoce ngaloko Nkulunkulu lakusho ngesikhatsi saJeremiya ngemakhiwa. Ngemnyaka wanga-617 B.C.E., budlelwane besive sakaJuda naNkulunkulu bebumunyu. Nkulunkulu wasiniketa umbono ngaloko lobekutawenteka kuso esikhatsini lesitako, wakwenta loko ngekutsi akufanekise ngetinhlobo letimbili temakhiwa—emakhiwa “lamahle” ‘nalamabi.’ (Fundza Jeremiya 24:1-3.) Emakhiwa lamabi abemelela iNkhosi Sedekiya nalabanye labafanana nayo labaphatfwa kabuhlungu yiNkhosi Nebukhadnezari nemabutfo ayo. Kodvwa kutsiwani ngaHezekeli, Danyela kanye nebangani bakhe labatsatfu labebaseBhabhulona nalamanye emaJuda labekatawutfunjelwa khona? Bebafanana nemakhiwa lamahle. Insali yawo beyitawuncandzeka kute iyewakha kabusha liJerusalema nelithempeli lalo. Ngekuhamba kwesikhatsi, loko kwenteka.—Jer. 24:8-10; 25:11, 12; 29:10.
Funisisa Umcebo EVini LaNkulunkulu
(Jeremiya 22:30) Naku lokushiwo nguSimakadze, utsi: “Bhalisa lendvodza njengalete umntfwana, indvodza lengeke ichume emphilweni yayo, ngobe kute lokutalwa ngiyo lokuyawuchuma, kute loyawuhlala esihlalweni sebukhosi saDavide nome aphindze abuse kaJuda.”
w07 3/15 10 ¶9
Emaphuzu Lagcamile Encwadzi YaJeremiya
22:30—Kungani lomyalo ungazange wemuke Jesu lilungelo lekuhlala esihlalweni saDavide? (Matewu 1:1, 11) Lomyalo bewuvimbela nome ngumuphi umuntfu loyintalo yaJehoyakhini kutsi ‘ahlale esihlalweni sebukhosi saDavide . . . lesikaJuda.’ Jesu abetawubusa asezulwini, hhayi asesihlalweni sebukhosi lesikaJuda.
(Jeremiya 23:33) “Nangabe labantfu nome umphrofethi nome umphristi akubuta atsi: ‘Sitsini siphrofetho saSimakadze?’ ubobaphendvula utsi: ‘Siphi siphrofetho? Ngitanilahla, kusho Simakadze.’
w07 3/15 11 ¶1
Emaphuzu Lagcamile Encwadzi YaJeremiya
23:33—Uyini ‘umtfwalo losindzako waJehova’? Ngemalanga aJeremiya, umlayeto lonemandla lebewumemetelwa ngulomphrofethi ngekubhujiswa kweJerusalema bewungumtfwalo kubantfu bakubo. Bantfu lebebangalaleli bebangumtfwalo losindzako kuJehova kangangekutsi abetawubalahla. Ngalokufanako, lomlayeto loseBhayibhelini lomayelana nekubhujiswa kwaletinye tinkholo ungumtfwalo kuto, futsi bantfu labangawulaleli bangumtfwalo losindzako kuNkulunkulu.
Kufundvwa KweliBhayibheli
(Jeremiya 23:25-36) “Ngikuvile loko lokushiwo baphrofethi, nabaphrofetha emanga egameni lami. Batsi: ‘Ngiphuphile! Ngiphuphile!’ 26 Loku kutawuchubeka kuze kube ngunini etinhlitiyweni talabaphrofethi labacala emanga, labaphrofetha inkhohliso yetingcondvo tabo? 27 Bacabanga kutsi lamaphupho labatjelana wona atakwenta labantfu bami balikhohlwe libito lami, njengobe naboyise balikhohlwa libito lami ngekukhonta Bhali. 28 Umphrofethi loneliphupho akakhulume liphupho lakhe, kodvwa lowo lonelivi lami akakhulume lona ngekwetsembeka. Ngobe empeleni emakhoba ayini nje kukolo?” kusho Simakadze. 29 “Livi lami alinjengawo yini umlilo? Kona alinjengaso yini sandvo, sona lesibhidlita lidvwala libe ticucu?” kusho Simakadze. 30 Simakadze utsi: “Ngako-ke, ngiphambene nebaphrofethi labebelana emavi lekutsiwa akhulunywe ngimi.” 31 Simakadze utsi: “Yebo, ngimelene nebaphrofethi labajikitisa tilwimi tabo babe bakhuluma batsi: ‘Simakadze uyakhuluma.’ 32 Impela ngimelene nalabo labaphrofetha emaphupho langemanga,” kusho Simakadze. “Bayabalandzisa bedukise bantfu bami ngemanga abo ebudlabha; noko angikabatfumi, futsi angikababeki. Labantfu ababasiti ngalutfo ngisho nangalokuncane nje,” kusho Simakadze. 33 “Nangabe labantfu nome umphrofethi nome umphristi akubuta atsi: ‘Sitsini siphrofetho saSimakadze?’ ubobaphendvula utsi: ‘Siphi siphrofetho? Ngitanilahla, kusho Simakadze.’ 34 Nangabe umphrofethi nome umphristi nome ngubani atisholo atsi: ‘Nasi siphrofetho saSimakadze,’ lowo muntfu ngiyakumjezisa kanye nemndeni wakhe. 35 Naku nine nonkhe lenivame kukusho ngulowo nalowo kumngani wakhe nome esihlotjeni sakhe, nitsi: ‘Itsini imphendvulo yaSimakadze?’ nome: ‘Simakadze ukhulume watsini?’ 36 Kodvwa ningacali nisisho ‘siphrofetho saSimakadze’ futsi, ngobe emavi alowo nalowo muntfu aba sembulo sakhe, ngaloko nibese niyawaguculela emavi aNkulunkulu lophilako, Simakadze Somandla, Nkulunkulu wetfu.
APRIL 17-23
UMCEBO LOSEVINI LANKULUNKULU | JEREMIYA 25-28
“Bani Nesibindzi NjengaJeremiya”
(Jeremiya 26:2-6) “Naku lokushiwo nguSimakadze, utsi: Mani esibuyeni selithempeli laSimakadze, ukhulume kubo bonkhe bantfu basemadolobheni akaJuda labayaye bete batewukhontela lapha ethempelini laSimakadze. Batjele konkhe lengikutfume kona, ungashiyi nalinye livi. 3 Mhlawumbe bayawulalela, kube ngulowo nalowo aphendvuke endleleni yakhe lembi. Ngiyawube sengiyagucuka ngingabe ngisabehlisela lenhlekelele lebese ngitilungiselele kuyehlisela kubo ngenca yebubi lababentile. 4 Khuluma kubo utsi: ‘Naku lokushiwo nguSimakadze, utsi: Naningalaleli kimi nilandzele umtsetfo wami lengiwubeke embikwenu, 5 futsi naningawalaleli emavi etinceku tami, baphrofethi, lengititfumele kini emaphindzephindze, nine solomane ningalaleli, 6 lendlu-ke ngitabe sengiyenta ifanane neShilo, nalelidolobha seliyawuba yintfo yekucalekisa emkhatsini wato tonkhe tive temhlaba.’”
w09 12/1 24 ¶6
Jeremiya Akazange Ayekele
Jehova watjela Jeremiya kutsi ecwayise bantfu abatjele kutsi iJerusalema itawubhujiswa nangabe bebangatishintji tindlela tabo letimbi. Ngesikhatsi Jeremiya abecwayisa, batfukutsela batsi: “Lomuntfu kufanele agwetjwe intsambo.” Nanobe kunjalo, Jeremiya wabancenga kutsi ‘balalele livi laJehova.’ Wabese utsi: ‘Kufanele nati kutsi nangabe ningibulala, nitawube nibulala umuntfu longenacala, nguNkulunkulu longitfume kutsi ngikhulume kini.’ Uyati yini kutsi kwabese sekwentekani?—
(Jeremiya 26:8, 9) Kodvwa watsi acedza nje Jeremiya kubatjela bonkhe labantfu onkhe emavi labewatfunywe nguSimakadze kutsi atebatjela wona, kwesuka baphristi, nebaphrofethi kanye nabo bonkhe bantfu bambamba batsi kuye: “Ufanele ufe! 9 Uphrofethelani egameni laSimakadze kutsi lelithempeli litawufanana neShilo, nalelidolobha litawusala selikhala libhungane, kungasahlali muntfu kulo?” Bonkhe bantfu babunganyela Jeremiya bamkaka ekhatsi endlini yaSimakadze.
(Jeremiya 26:12, 13) Jeremiya wase ukhuluma kuto tonkhe letiphatsimandla nakubo bonkhe labantfu, watsi: “Simakadze ungitfumile kutsi ngitewuphrofetha ngalendlu nangalelidolobha tonkhe letintfo lesenitivile. 13 Manje-ke, guculani tindlela tenu tekuphila netento tenu nilalele Simakadze Nkulunkulu wenu. Simakadze-ke utawube sewuyagucuka angabe asanehlisela lenhlekelele labesayishito kini.
jr 21 ¶13
Kukhonta ‘Encenyeni Yekugcina Yemalanga’
13 Nangabe ucabanga ngesimo senkholo nesetembusalive lesasikhona kaJuda, bebatawenta njani baholi benkholo ngalomlayeto waJeremiya? Ngekwaloko lokushiwo ngulomphrofethi, “baphristi nebaphrofethi nabo bonkhe bantfu [bangibamba], batsi: ‘Utokufa nekufa.’” Bebakwate babilelana, batsi: “Lomuntfu kufanele agwetjwe intsambo.” (Fundza Jeremiya 26:8-11.) Nobe kunjalo, titsa taJeremiya tehluleka kumbulala. Jehova abenaye lomphrofethi wakhe kuze amsindzise. Jeremiya naye akazange avumele kwesabeka kwebaphikisi nobe buningi babo kumetfuse. Nawe ungakuvumeli.
(Jeremiya 26:16) Ngako letiphatsimandla nabo bonkhe bantfu bakhuluma kubaphristi nakubaphrofethi, batsi: “Lomuntfu akukafaneli kutsi agwetjwe intsambo! Ukhulume kitsi egameni laSimakadze Nkulunkulu wetfu.”
(Jeremiya 26:24) Kodvwa Ahikamu, umsa waShafani, wema ngakuJeremiya, ngako wangabe asaniketelwa kubantfu kutsi abulawe.
w09 12/1 25 ¶1
Jeremiya Akazange Ayekele
LiBhayibheli litsi: “Baphristi nebaphrofethi base bakhuluma kuletiphatsimandla nakubo bonkhe bantfu, batsi: “Lomuntfu kufanele agwetjwe intsambo, ngobe uphrofethe lokumelana nalelidolobha. Nani nitivele ngetenu tindlebe!” Ngako-ke, ngesikhatsi Jeremiya angakuvumeli kwesaba kutsi kumyekelise, Jehova wamvikela. Ake sibone kutsi kwentekani ku-Urija, lomunye umphrofethi waJehova, lowenta ngendlela leyehlukile.
Funisisa Umcebo EVini LaNkulunkulu
(Jeremiya 27:2, 3) Naku lokwashiwo nguSimakadze kimi, watsi: “Yenta emajoko ngetitilobho nemicabo, lelinye lawo ulibeke entsanyeni yakho, 3 bese utfumela lawa lamanye kanye nelivi enkhosini yaka-Edomu, neyakaMowabi, neyaka-Amoni, neyaseThire, neyaseSidoni ngemancusa lefike eJerusalema kuSedekiya, inkhosi yakaJuda.
jr 27 ¶21
Kukhonta ‘Encenyeni Yekugcina Yemalanga’
21 Kubonakala shengatsi ekucaleni kwekubusa kwaZedekiya kwafika titfunywa eJerusalema tivela emakhosini aka-Edomi, kaMowabi, ka-Amoni, eThire naseSidoni. Kungenteka tatihlose kufaka Zedekiya kulomfelandzawonye wekulwa neNkhosi Nebukhadnezari. Nobe kunjalo, Jeremiya wancenga Zedekiya kutsi atitfobe eBhabhulona. Jeremiya wanika letitfunywa titilobho temajoko kuze afanekise kutsi imibuso yato nayo kwakufanele ikhonte baseBhabhulona. (Jer. 27:1-3, 14) Umlayeto lobewumemetelwa ngumphrofethi Jeremiya bewungatsandvwa bantfu futsi Hananiya wenta waba matima nakakhulu lomsebenti. Abengumphrofethi wemanga lobekafunge wagomela ngeligama laNkulunkulu atsi lijoko laseBhabhulona liyokwephulwa. Kodvwa livi laJehova ngaJeremiya lalitsite umkhohlisi Hananiya abetawufa ngalowo mnyaka. Nguloko kanye lokwenteka.—Jer. 28:1-3, 16, 17.
(Jeremiya 28:11) Wakhuluma embikwabo bonkhe bantfu watsi: “Naku lokushiwo nguSimakadze, utsi: ‘Ngiyakulephula kanjalo-ke lijoko laNebukhadnezari, inkhosi yaseBhabhulona, ngilisuse etintsanyeni tetive tonkhe temhlaba ingakapheli iminyaka lemibili.’ “ Emvakwaloko-ke umphrofethi Jeremiya wachubeka wahamba indlela yakhe.
jr 187-188 ¶11-12
“Ngehluleka Nekubindzisa”
11 Kubalulekile kutsi sikhumbule kutsi Jeremiya abengashiseki ngalokwecile. Wasebentisa ingcondvo ngesikhatsi abhekene nebaphikisi. Abesati kahle sikhatsi lokufanele ahocise ngaso. Ngekwesibonelo, cabanga ngaloko lokwenteka emkhatsini wakhe naHananiya. Ngemva kwekutsi lomphrofethi wemanga aliphikisile livi laJehova lesiphrofetho, Jeremiya wamlungisa futsi wachaza kutsi umphrofethi weliciniso ubonakala ngani. Jeremiya abetfwele lijoko lelikhuni kuze afanekise kungena ngephansi kwelijoko laseBhabhulona kodvwa Hananiya walephula ngeludlame lelijoko. Ngubani lobekati kutsi Hananiya utawubese wentani? Yini Jeremiya layenta? Siyafundza: “Umphrofethi watihambela ngendlela yakhe.” Jeremiya wesuka kuleyondzawo. Kamuva, acondziswa nguJehova, wabuya watjela Hananiya loko Nkulunkulu abetawukwenta—emaJuda abetawuba tigcili tenkhosi yaseBhabhulona futsi Hananiya abetawufa.—Jer. 28:1-17.
12 Lokulandzisa lokuphefumulelwe kwenta kucace kutsi nasishumayela, kuyoba kuhle kutsi sibe nesibindzi futsi sibe nengcondvo levulekile. Nangabe umuntfu emtini lotsite angafuni kwemukela umbono loseBhayibhelini futsi atfukutsela, aze asisongele ngekusilimata, singacolisa ngenhlonipho bese sindlulela emtini lolandzelako. Akudzingeki siphikisane kushunce lutfuli nebantfu ngetindzaba letimnandzi teMbuso. ‘Ngekutibamba,’ sivula litfuba lekutsi siphindze sicoce nemnikati welikhaya nasiphindze sibuya.—Fundza 2 Thimothi 2:23-25; Taga 17:14.
Kufundvwa KweliBhayibheli
(Jeremiya 27:12-22) NaSedekiya, inkhosi yakaJuda, ngamniketa umlayeto lofanana nawona lona, ngatsi: “Khotsamisani tinhloko tenu ngaphansi kwelijoko lenkhosi yaseBhabhulona, khontani yona kanye nebantfu bayo, nitewuphila. 13 “Uyawufelani wena kanye nebantfu bakho ngenkemba, nangendlala, nangesifo lesibulalanako, Simakadze layale ngako nome ngusiphi sive lesingayiwuyikhonta inkhosi yaseBhabhulona? 14 Ningawalaleli emavi ebaphrofethi labatsi kini: ‘Ningeke niyikhonte inkhosi yaseBhabhulona,’ ngobe baphrofetha emanga. 15 ‘Angikabatfumi, baphrofetha emanga egameni lami,’ kusho Simakadze. ‘Ngako-ke ngitanicosha eveni lenu, niyawuze niphele, nine kanye nebaphrofethi labaphrofetha kini.’ “ 16 Ngabe sengikhuluma kubaphristi nakubo bonkhe labantfu, ngatsi: “Naku lokushiwo nguSimakadze, utsi: ‘Ningabalaleli baphrofethi labatsi: “Masinyane nje khona nyalo tintfo tasethempelini laSimakadze tiyawubuyiswa tisuka eBhabhulona.” Baphrofetha emanga kini. 17 Ningabalaleli. Khontani inkhosi yaseBhabhulona, nitawuphila. Lelidolobha lingaba yincitsakalo leni? 18 Nangabe babaphrofethi futsi banelivi laSimakadze, abakhulumisane naSimakadze longuSomandla, bancenge kutsi letimphahla letisasele ethempelini laSimakadze, nasesigodlweni senkhosi yakaJuda, naseJerusalema, tingatsatfwa tiyiswe eBhabhulona.’ 19 “Ngobe ngunaku lokushiwo nguSimakadze longuSomandla mayelana netinsika, nanelwandle lolwakhelwe, netincodlana, naletinye nje-ke timphahla letisasele kulelidolobha, 20 langatitsatsanga Nebukhadnezari, inkhosi yaseBhabhulona, ngesikhatsi atfumba Jehoyakhini, umsa waJehoyakimu, inkhosi yakaJuda, ayiyisa ekudzingisweni, ayisusa eJerusalema ayiyisa eBhabhulona kanye nabo bonkhe labahloniphekile bakaJuda nebaseJerusalema. 21 Yebo, nguloko lokushiwo nguSimakadze longuSomandla, Nkulunkulu wema-Israyeli, mayelana naletimphahla letatisasele ethempelini laSimakadze, nasesigodlweni senkhosi yakaJuda, naseJerusalema, utsi: 22 ‘Tiyawutsatfwa tiyiswe eBhabhulona, lapho tiyawuhlala khona, kuze kube ngulelo langa lengiyawufika ngalo ngitilandze. Ngiyawube sengiyatitsatsa-ke ngitibuyisele kulendzawo yato,’ kusho Simakadze.”
APRIL 24-30
UMCEBO LOSEVINI LANKULUNKULU | JEREMIYA 29-31
“Jehova Wabiketela Sivumelwane Lesisha”
(Jeremiya 31:31) Simakadze utsi: “Sikhatsi siyeta, lapho ngiyawukwenta khona sivumelwane lesisha nendlu yaka-Israyeli neyakaJuda.
it-1 524 ¶3-4
Sivumelwane
Sivumelwane Lesisha. Jehova wabiketela sivumelwane lesisha asebentisa umphrofethi Jeremiya ngelikhulu lesi-7 B.C.E., wabiketela nekutsi besingeke sifane nesivumelwane seMtsetfo lesaphulwa ngema-Israyeli. (Jer 31:31-34) Ngebusuku bekugcina, ngaNisan 14, 33 C.E., ngesikhatsi Jesu Khristu ente Sidlo SeNkhosi Sakusihlwa kwekucala, wabiketela ngesivumelwane lesisha lebesitawentiwa ngengati yakhe. (Luk 22:20) Nasekuphele emalanga langu-50 avusiwe futsi sekuphele emalanga langu-10 enyukele ezulwini, watfululela umoya longcwele labewunikwe nguJehova kubafundzi bakhe lebebahlangene ekamelweni lelisetulu eJerusalema.—Imi 2:1-4, 17, 33; 2Ko 3:6, 8, 9; Heb 2:3, 4.
Jehova kanye na-“Israyeli waNkulunkulu,” lokungulabo labatsengwa, labatindlalifa naKhristu futsi labamunye naye bayincenye yalesivumelwane lesisha. (Heb 8:10; 12:22-24; Gal 6:15, 16; 3:26-28; Rom 2:28, 29) Lesivumelwane lesisha sentiwe sasebenta ngengati yaJesu leyacitseka, futsi lelinani lenhlawulo waletfula kuJehova nakefika ezulwini. (Mat 26:28) Nangabe lotsite anelubito lwasezulwini (Heb 3:1), loyo muntfu uba yincenye yesivumelwane ngenca yengati yaJesu. (Hla 50:5; Heb 9:14, 15, 26) Jesu Khristu ungumlamuleli wesivumelwane lesisha (Heb 8:6; 9:15) futsi uyintalelwane ya-Abrahama. (Gal 3:16) Asebentisa Jesu njengemlamuleli, Jehova usite labo labayincenye yalesivumelwane kutsi babe yincenye yalentalelwane ya-Abrahama (Heb 2:16; Gal 3:29) ngekubatsetselela tono tabo. Jehova utsi balungile.—Rom 5:1, 2; 8:33; Heb 10:16, 17.
(Jeremiya 31:32, 33) Lesivumelwane singeke sifanane naleso lengasenta naboyisemkhulu ngesikhatsi ngibabamba ngesandla ngibahola ngibakhipha eGibhithe, ngobe basephula sivumelwane sami, nome ngangiyindvodza kubo,” kusho Simakadze. 33 Simakadze utsi: “Ngulesi sivumelwane lengiyakusenta nendlu yaka-Israyeli emvakwaleso sikhatsi: Ngiyawufaka umtsetfo wami etingcondvweni tabo, ngiwubhale etinhlitiyweni tabo. Ngiyawuba nguNkulunkulu wabo, bona babe bantfu bami.
jr 173-174 ¶11-12
Ungazuza Njani Kulesivumelwane Lesisha?
11 Ungatsandza yini kwati lokunye lokwenta sivumelwane lesisha sehluke? Umehluko lomkhulu kutsi sabhalelwa endzaweni leyehlukile kuleso seMtsetfo waMosi. (Fundza Jeremiya 31:33.) IMitsetfo Lelishumi yesivumelwane seMtsetfo yayibhalwe etibhelekeceni tematje, letagcine tinyamalele. Kantsi Jeremiya waphrofetha kutsi umtsetfo wesivumelwane lesisha wawuyobhalwa etinhlitiyweni tebantfu futsi uhlale phakadze. Labo labanencenye kulesivumelwane lesisha, emaKhristu lagcotshiwe, awatisa mbamba lomtsetfo. Kutsiwani ‘ngaletinye timvu’ letingasiyo incenye yesivumelwane lesisha ngalokucondzile letinelitsemba lekuphila phakadze emhlabeni? (Joh. 10:16) Nato tiyakujabulela kulalela umtsetfo waNkulunkulu. Batsi abafane nebafokati baka-Israyeli labalalela uMtsetfo waMosi futsi bazuza kuwo.—Lev 24:22; Nu 15:15.
12 Ungaphendvula utsini nangabe ungabutwa kutsi ‘Ngumuphi umtsetfo lobhalwe enhlitiyweni yemaKhristu lagcotjiwe?’ Lomtsetfo ubitwa nangekutsi “ngumtsetfo waKhristu.” Wacale waniketwa Israyeli waNkulunkulu, lowo lokulesivumelwane lesisha. (Gal. 6:2; Roma 2:28, 29) “Umtsetfo waKhristu” ungachazwa ngeligama linye lelitsi ‘lutsandvo.’ (Mat 22:36-39) Labagcotjiwe bangawubhala njani lomtsetfo etinhlitiyweni tabo? Tindlela letihamba embili kudadisha liVi laNkulunkulu nekuthantaza kuJehova. Onkhe emaKhristu eliciniso kufanele akwente loko, ngisho nalawo langekho kulesivumelwane lesisha kodvwa lafuna kuzuza kuso.
(Jeremiya 31:34) Sekuyawubate umuntfu loyawufundzisa makhelwane wakhe, nome indvodza ifundzise umnakabo, itsi: ‘Yati Simakadze,’ ngobe bonkhe sebayawungati kusukela kulomncane kuye kulomkhulu,” kusho Simakadze. “Ngobe ngiyawubatsetselela bubi babo, tono tabo ngingasaphindzi ngitikhumbule.”
jr 177 ¶18
Ungazuza Njani Kulesivumelwane Lesisha?
18 Sivumelwane lesisha siyayicacisa indlela Jehova lasebentelana ngayo nebantfu labanesono, kokubili labagcotjiwe labakulesivumelwane, nalabo labanelitsemba lekuphila emhlabeni. Yetsemba kutsi nangabe Jehova sekakucolele tono takho, ngeke aphindze akubalele tona. Ngako-ke, setsembiso saNkulunkulu ngesivumelwane lesisha sifundzisa ngamunye wetfu sifundvo lesitsite. Tibute, ‘Ngiyetama yini kulingisa Jehova ngekungabuyisi emaphutsa alabanye, tono tabo lesengiticolele?’ (Mat. 6:14, 15) Loku kusebenta ngisho nasemaphutseni lamancane nalamakhulu, njengesono sekuphinga kwemuntfu loshade naye. Nangabe lona longenacala avuma kumtsetselela umuntfu lophingile lophendvukako, kungaba kuhle yini kutsi nawe ‘ungasasikhumbuli leso sono’? Kuliciniso kutsi kungaba matima kukhohlwa emaphutsa alabanye, nome kunjalo leyo kungaba yindlela lekahle yekulingisa Jehova.
Funisisa Umcebo EVini LaNkulunkulu
(Jeremiya 29:4) “Naku lokushiwo nguSimakadze longuSomandla, Nkulunkulu wema-Israyeli, kubo bonkhe labo lengabatfumba ngabesusa eJerusalema baya eBhabhulona,
(Jeremiya 29:7) Funani futsi kuthula nekuphumelela kulelo dolobha lenganitfumbela kulo kutsi niyewudzingiswa. Likhulekeleni kuSimakadze, ngobe naliphumelela, nani niyawuphumelela.’
w96 5/1 11 ¶5
Nkulunkulu NaKhesari
5 Emakhulwini eminyaka kamuva Jehova waphefumulela umphrofethi lowetsembekile Jeremiya kutsi atjele labatfunjwa labangemaJuda kutsi bahloniphe babusi baseBhabhulona ngesikhatsi batfunjiwe futsi bathantazele kutsi kube nekuthula kuloyo muti. Wababhalela watsi: “Naku lokushiwo nguSimakadze longuSomandla, Nkulunkulu wema-Israyeli, kubo bonkhe labo lengabatfumba, . . . Funani futsi kuthula nekuphumelela kulelo dolobha lenganitfumbela kulo kutsi niyewudzingiswa. Likhulekeleni kuSimakadze, ngobe naliphumelela, nani niyawuphumelela.” (Jeremiya 29:4, 7) Ngaso sonkhe sikhatsi bantfu baJehova banelilungelo ‘lekutifunela kuthula,’ kanye nekufunela live labahlala kulo kuthula kuze babe nenkhululeko yekukhonta Jehova.—1 Phetro 3:11.
(Jeremiya 29:10) “Naku lokushiwo nguSimakadze, utsi: ‘Naseyiphelile iminyaka lengema-70 yeBhabhulona, ngitawufika kini ngitewugcwalisa setsembiso sami semusa kutsi nginibuyise kulendzawo.
g 6/12 14 ¶1-2
LiBhayibheli—Incwadzi Yetiphrofetho Incenye 2
Kugcwaliseka: Ngemva kweminyaka lengu-70, kusukela nga-607 kuya ku-537 B.C.E., Khuresi, inkhosi yasePheresiya wawakhulula emaJuda labetfunjiwe wawavumela kutsi abuyele eveni lawo kuze akhe lithempeli eJerusalema.—Ezra 1:2-4.
Lokuvetwa ngumlandvo:
● Ema-Israyeli atfunjwa iminyaka lengu-70 yini eBhabhulona njengobe liBhayibheli lalibiketele? Naka nankha emavi esati semlandvo lesihlonishwako lesingumIsrayeli, lesingu-Ephraim Stern. “Kusukela nga-604 B.C.E. kuya ku-538 B.C.E.—kute bufakazi lobukhona bekutsi kukhona lobekahlala ka-Israyeli. Kuso sonkhe lesikhatsi lesi kute nalinye lidolobha lelalibhujiswe yiBhabhulona lokwakuhlalwa kulo.” Lesikhatsi latsi Ephraim Stern bekungahlali muntfu ngaso ka-Israyeli, siyahambisana nesikhatsi ema-Israyeli labetfunjelwe ngaso eBhabhulona nga-607 kuya ku-537 B.C.E.—2 Tikhronike 36:20, 21.
Kufundvwa KweliBhayibheli
(Jeremiya 31:31-40) Simakadze utsi: “Sikhatsi siyeta, lapho ngiyawukwenta khona sivumelwane lesisha nendlu yaka-Israyeli neyakaJuda. 32 Lesivumelwane singeke sifanane naleso lengasenta naboyisemkhulu ngesikhatsi ngibabamba ngesandla ngibahola ngibakhipha eGibhithe, ngobe basephula sivumelwane sami, nome ngangiyindvodza kubo,” kusho Simakadze. 33 Simakadze utsi: “Ngulesi sivumelwane lengiyakusenta nendlu yaka-Israyeli emvakwaleso sikhatsi: Ngiyawufaka umtsetfo wami etingcondvweni tabo, ngiwubhale etinhlitiyweni tabo. Ngiyawuba nguNkulunkulu wabo, bona babe bantfu bami. 34 Sekuyawubate umuntfu loyawufundzisa makhelwane wakhe, nome indvodza ifundzise umnakabo, itsi: ‘Yati Simakadze,’ ngobe bonkhe sebayawungati kusukela kulomncane kuye kulomkhulu,” kusho Simakadze. “Ngobe ngiyawubatsetselela bubi babo, tono tabo ngingasaphindzi ngitikhumbule.” 35 Naku lokushiwo nguSimakadze, lowo lowabeka lilanga kutsi likhanyise emini, wamisa inyanga netinkhanyeti kutsi tibokhanyisa ebusuku, lowo lotamatisa lwandle kuze emagagasi alo abhodle, nguSimakadze longuSomandla libito lakhe, utsi: 36 “Kuphela nangabe letimiso tinganyamalala embikwami, titukulwane taka-Israyeli tiyawunyamalala phakadze naphakadze, tingabe tisaba sive embikwami,” kusho Simakadze. 37 Naku lokushiwo nguSimakadze, utsi: “Kuphela nje nangabe emazulu lasetulu angalinganiswa, netisekelo temhlaba letingaphansi tiphenywe, nami-ke ngulapho ngiyawusilahla sonkhe situkulwane saka-Israyeli, ngenca yako konkhe labakwentile,” kusho Simakadze. 38 Simakadze utsi: “Emalanga ayeta lapho khona ngiyakwakhelwa kabusha lelidolobha kusukela eMbhoshongweni waHananeli kuye eSangweni Lelikona. 39 Intsambo yekulinganisa iyakweluleka kusukela lapho kuye entsabeni iGarebi, isuke lapho ijikele ngaseGowa. 40 Sonkhe leso sigodzi lapho kulahlwa khona tidvumbu nemlotsa, nato tonkhe tibebesi kuye emfudlaneni iKhidroni, kuze kuyewufika ekoneni leLisango Lelihhashi ngasemphumalanga, kuyawuba ngcwele kuSimakadze. Lelidolobha lingeke liphindze lizuphunwe nome libhidlitwe.”