Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo
AUGUST 6-12
UMCEBO LOSEVINI LANKULUNKULU | LUKHA 17-18
“Bonga”
(Lukha 17:11-14) Ngesikhatsi aya eJerusalema, wendlula emkhatsini weSamariya neGalile. 12 Watsi nakangena kulelinye lidolobhana, kweta emadvodza lalishumi labenebulephelo, kodvwa ema bucadlwana. 13 Amemeta atsi: “Jesu, Mfundzisi, sihawukele!” 14 Utsite nakawabona, watsi kuwo: “Hambani niye kubaphristi nitivete kubo.” Njengobe lamadvodza ahamba, ahlambululeka.
Emaphuzu lacwaningiwe aLuk 17:12, 14 laku-nwtsty
emadvodza lalishumi labenebulephelo: Ngesikhatsi lokwabhalwa ngaso liBhayibheli, bantfu labebanebulephelo kungenteka bebavame kuhlala ndzawonye kute bakhone kusitana. (2Kh 7:3-5) UMtsetfo waNkulunkulu bewutsi bantfu labebanebulephelo bekufanele bahlaliswe bodvwana. Umuntfu lonebulephelo bekufanele amemete atsi: “Ngingcolile, ngingcolile!” kute labanye bati kutsi ukhona. (Lev 13:45, 46) Ngekuvumelana naloMtsetfo, lamadvodza ema bucadlwana nawabona Jesu.—Catsanisa neliphuzu lelicwaningiwe laMat 8:2 nesihlokwana lesitsi, “Leprosy; Leper” lesikuSandzisanchazo se-nwtsty.
Hambani niye kubaphristi nitivete kubo: Njengoba Jesu abephila ngekuvumelana neMtsetfo nakasemhlabeni, bekasihlonipha sikhundla sebaphristi belusendvo lwa-Aroni, futsi bekatsi angaphilisa bantfu labanebulephelo, atsi abaye kubaphristi. (Mat 8:4; Mak 1:44) UMtsetfo waMosi bewutsi umphristi kufanele ahlolisise kutsi umuntfu lobekanebulephelo sewuphile mbamba yini. Lomuntfu bekufanele abese uya ethempelini futsi ente umhlatjelo ngetinyoni letimbili uMtsetfo lobewutsi tihlantekile, tinkhuni temsedari, umtiya lobovu ngalokutopele, nehisophu.—Lev 14:2-32.
(Lukha 17:15, 16) Lenye yawo yatsi nayibona kutsi seyiphilile yabuyela emuva, yakhatimulisa Nkulunkulu ngelivi lelikhulu. 16 Yafike yaguca etinyaweni taJesu, yambonga. Lendvodza beyingumSamariya.
(Lukha 17:17, 18) Jesu watsi: “Angitsi kuhlanjululwe emadvodza lalishumi? Pho aphi lalamanye layimfica? 18 Ikhona yini lenye lebuyile kute idvumise Nkulunkulu, ngaphandle kwalendvodza yalesinye sive?”
w08 8/1 14-15 ¶8-9
Kungani Kufanele Sibonge?
Jesu bekanganendzaba yini nebantfu labangabongi? LomBhalo uchubeka utsi: “Jesu watsi: “Angitsi kuhlanjululwe emadvodza lalishumi? Pho aphi lalamanye layimfica? Ikhona yini lenye lebuyile kute idvumise Nkulunkulu, ngaphandle kwalendvodza yalesinye sive?””—Lukha 17:17, 18.
Akusho kutsi lalamanye emadvodza layimfica labenebulephelo bewangakalungi. Bewakhombisile kutsi bewakholwa kuJesu futsi akulalela loko latsi awakwente, lobekubitela kutsi ahambe aye eJerusalema kute abonane nebaphristi. Kepha ehluleka kubonga kuJesu ngesento semusa lawentela sona, nanobe abejabula kakhulu ngaso. Lakwenta kwamdvumata Jesu. Tsine senta njani? Siyambonga yini umuntfu losentele lokuhle, mhlawumbe size simtfumelele likhadi lekumbonga nangabe loko kubonakala kukahle?
Kufunisisa Umcebo EVini LaNkulunkulu
(Lukha 17:7-10) “Ngubani kini lonesisebenti lesilimako nobe leselusa imihlambi longatsi kuso nasesibuya ensimini: ‘Kota uhlale nami etafuleni’? 8 Ngeke yini atsi kuso: ‘Ngilungisele kudla, uvunule sidziya sakho ungiletsele tintfo lengitidzingako ngite ngicedze kudla nekunatsa; ngemuva kwaloko, nawe ungadla futsi unatse’? 9 Angitsi ngeke asibonge lesisebenti, ngobe sente tintfo lobekufanele sitente? 10 Ngako-ke nani, nanente tintfo lenitfunywe tona, nibotsi: ‘Sitisebenti letingakafaneli kubongwa. Lesikwentile nguloko lebekufanele sikwente.’”
Liphuzu lelicwaningiwe laLuk 17:10 leliku-nwtsty
letingakafaneli kubongwa: Nalihunyushwe njengoba linjalo, litsi “letingenamsebenti; letingakabaluleki.” Lomfanekiso waJesu awusho kutsi bafundzi bakhe, noma tisebenti, bekufanele batibone babantfu labangakabaluleki noma labangenamsebenti. Emavesi lahambisana naleli asenta sibone kutsi inkhulumo letsi “letingakafaneli kubongwa” isho kutsi letisebenti betingeke titiphakamise futsi betingeke ticabange kutsi tifanelwe ngemalungelo neludvumo lolutsite. Letinye tati titsi lenkhulumo isihabiso lesinemcondvo wekutsi “simane sitisebenti nje, futsi ludvumo alukasifaneli.”
(Lukha 18:8) Ngiyanitjela ngitsi: Utawubentela lokulungile ngekushesha. Kodvwa-ke, nayifika iNdvodzana yemuntfu, itakutfola yini kukholwa lokunjengaloku emhlabeni?”
Liphuzu lelicwaningiwe laLuk 18:8 leliku-nwtsty
kukholwa lokunjengaloku: Noma, “luhlobo lwekukholwa lolunjengalolu.” Nalihunyushwe njengoba linjalo, litsi “lokukholwa.” SiGriki sisebentisa sabito lesikhomba edvute ngaphambi kwaleligama lelitsi “kukholwa,” futsi loko kusitjela kutsi Jesu bekangakhulumi ngekukholwa nje, kepha bekasho kukholwa kweluhlobo lolutsite, njengalolo lomfelokati labekanalo. (Luk 18:1-8) Kungafaka ekhatsi kukholwa kutsi Jehova uyayiphendvula imithantazo, nekutsi bantfu bakhe utawubaniketa umvuzo lobafanele. Kubonakala ngatsi Jesu washiya lombuto ungakaphendvuleki kute bafundzi bakhe bacabange ngekutsi kungakanani kukholwa kwabo. Njengoba Jesu abesandza kuchaza tilingo lebetitawehlela bafundzi bakhe, leso bekusikhatsi lesihle sekutsi Jesu ente lomfanekiso lokhuluma ngemthantazo nekukholwa.—Luk 17:22-37.
Kufundvwa KweliBhayibheli
(Lukha 18:24-43) Jesu wambuka wase utsi: “Kutawuba matima kakhulu ngalabo labanemali kutsi bangene eMbusweni waNkulunkulu! 25 Kumelula kutsi likamela lingene embotjeni yenyalitsi yekutfunga kunekutsi umuntfu lonjingile angene eMbusweni waNkulunkulu.” 26 Labo labeva loku batsi: “Ngubani-ke loyawusindziswa?” 27 Yena watsi: “Tintfo letibonakala tingeke tenteke emehlweni emuntfu, tingenteka kuNkulunkulu.” 28 Kodvwa Phetro watsi: “Nkhosi, sishiye tonkhe tintfo sakulandzela.” 29 Jesu watsi kubo: “Ngicinisile ngitsi kini: Kute umuntfu loshiye tindlu, umfati, banakabo, batali, nobe bantfwana ngenca yeMbuso waNkulunkulu, 30 longeke akutfole loku sekuphindvwe kanyenti kulesikhatsi sanyalo bese kutsi esikhatsini lesitako atfole kuphila lokuphakadze.” 31 Wabitela eceleni bafundzi bakhe labalishumi nakubili, watsi kubo: “Nyalo senyukela eJerusalema, futsi tonkhe tintfo letabhalwa baphrofethi mayelana neNdvodzana yemuntfu titawugcwaliseka. 32 Itawunikelwa kubantfu betive, bahlekise ngayo, bayiphatse kabi, futsi bayikhafulele. 33 Nasebayibhambabulile batayibulala, kutsi ngelilanga lesitsatfu ivuswe.” 34 Kodvwa-ke, abazange bacondze kutsi letintfo labetisho tatichaza kutsini, ngobe lamavi abefihlekile kubo, futsi abazange bawacondze. 35 Watsi nakasondzela eJerikho, indvodza letsite lebeyiyimphumphutse yayihleti eceleni kwemgwaco icela. 36 Yatsi nayiva kuphitsitela kwesicumbi sebantfu yabuta kutsi kwentekani. 37 Bayitjela batsi: “Kwendlula Jesu waseNazaretha!” 38 Ngako yamemeta yatsi: “Jesu, Ndvodzana yaDavide, ngihawukele!” 39 Labo lebebasembili bayekhuta batsi ayibindze, kodvwa yona yachubeka imemeta kakhulu itsi: “Ndvodzana yaDavide, ngihawukele!” 40 Ngako Jesu wema, wase utsi ayiletfwe lendvodza. Yatsi nayifika wayibuta watsi: 41 “Ufuna ngikwenteleni?” Yona yatsi: “Nkhosi, ngente ngiphindze ngibone.” 42 Ngako Jesu watsi kuyo: “Phindze ubone; kukholwa kwakho kukuphilisile.” 43 Ngekushesha lendvodza yaphindze yabona futsi yacala kumlandzela, ikhatimulisa Nkulunkulu. Nabakubona loku, bonkhe bantfu nabo badvumisa Nkulunkulu.
AUGUST 13-19
UMCEBO LOSEVINI LANKULUNKULU | LUKHA 19-20
“Lesikufundzako Emfanekisweni Wemamina Lalishumi”
(Lukha 19:12, 13) Watsi: “Indvodza letsite yasebukhosini yaya eveni lelikhashane kute iyewubekwa kutsi ibe yinkhosi, bese iyabuya. 13 Yabita tisebenti tayo letilishumi, yatinika emamina lalishumi, yatsi kuto: ‘Wataliseni ngite ngibuye.’
jy 232 ¶2-4
Umfanekiso Wemamina Lalishumi
Jesu watsi: “Indvodza letsite yasebukhosini yaya eveni lelikhashane kute iyewubekwa kutsi ibe yinkhosi, bese iyabuya.” (Lukha 19:12) Luhambo lolunjalo belungatsatsa sikhatsi. Kuyacaca kutsi nguJesu ‘lendvodza yasebukhosini’ leya “eveni lelikhashane,” lokungusezulwini, lapho Babe wakhe abetawufike ambeke njengenkhosi.
Kulomfanekiso, ngaphambi kwekutsi ‘lendvodza yasebukhosini’ ihambe, yabita tisebenti letilishumi, yatinika emamina elisiliva, futsi yatsi kuto: “Wataliseni ngite ngibuye.” (Lukha 19:13) Emamina elisiliva bekuyimali leligugu. Imina iyinye beyiliholo leliholwa sisebenti lesisebente engadzeni emalanga langaba ngu-100.
Kungenteka bafundzi baJesu bebati kutsi bebanjengaletisebenti kulomfanekiso, ngoba Jesu bekake wabafananisa netisebenti tekuvuna. (Matewu 9:35-38) Kusebaleni kutsi Jesu bekangasho kutsi bekufanele baletse sivuno semabele, kodvwa bekasho kuvuna labanye bafundzi labatawungena eMbusweni waNkulunkulu. Labafundzi basebentisa konkhe labebanako kute bente tindlalifa teMbuso.
(Lukha 19:16-19) Ngako sisebenti sekucala sefika satsi: ‘Nkhosi, imina yakho ngiyitalise ngatfola lamanye lalishumi.’ 17 Yatsi kuso: ‘Wente kahle sisebenti lesihle! Njengobe utivete wetsembekile etintfweni letincane kakhulu, yengamela emadolobha lalishumi.’ 18 Kwase kuta sisebenti sesibili satsi: ‘Nkhosi, imina yakho ngiyitalise ngatfola lamanye lasihlanu.’ 19 Nakulesi yatsi: ‘Nawe yengamela emadolobha lasihlanu.’
jy 232 ¶7
Umfanekiso Wemamina Lalishumi
Nangabe labafundzi bati kutsi basebentise konkhe labanako kute bente bafundzi, njengaletisebenti letikulomfanekiso, bangaciniseka kutsi Jesu uyajabula ngaloko. Futsi bangetsemba nekutsi Jesu utawubanika umvuzo ngekutimisela kwabo. Kuliciniso kutsi akusibo bonkhe bafundzi baJesu labanetimo, emakhono, noma ematfuba lafanako ekuphileni. Noma kunjalo, Jesu, lobekwe ‘kutsi abe yinkhosi,’ utayibona imetamo yabo yekwenta bafundzi futsi ayibusise.—Matewu 28:19, 20.
(Lukha 19:20-24) Kodvwa lesinye sefika satsi: ‘Nkhosi, nayi imina yakho, bengisolo ngiyigocotele ngendvwangu. 21 Bengikwesaba kakhulu, ngobe bengati kutsi unelulaka; utsatsa lapho ungazange ubeke khona, uvune nalapho ungazange uhlanyele khona.’ 22 Yatsi kuso: ‘Sisebenti lesibi, ngitakwehlulela ngaloko lokushito. Angitsi bewati kutsi nginelulaka, nekutsi ngitsatsa lapho ngingazange ngibeke khona, ngivune nalapho ngingazange ngihlanyele khona? 23 Lemina yami awuyifakanga ngani-ke endzaweni yekulondvolota imali? Bengitawutsi nangibuya ngiyitsatse seyinentalo.’ 24 “Ngako yatsi kulabo lebebeme edvutane: ‘Tsatsani lemina lekuye niyinike lona lonalalishumi.’
jy 233 ¶1
Umfanekiso Wemamina Lalishumi
Lesisebenti lesehluleka kutalisa imali yemcashi waso salahlekelwa kakhulu. Baphostoli balindzele kubusa kwaJesu njengeNkhosi eMbusweni waNkulunkulu. Ngaloko Jesu lakusho ngesisebenti sekugcina, bayabona kutsi nangabe bangatimiseli, ngeke bangene eMbusweni.
Kufunisisa Umcebo EVini LaNkulunkulu
(Lukha 19:43) Sikhatsi siyeta lapho titsa takho titawukwakha lutsango ngetigodvo leticijile futsi tikuvimbetele, tikuhlasele kuto tonkhe tinhlangotsi.
Liphuzu lelicwaningiwe laLuk 19:43 leliku-nwtsty
lutsango ngetigodvo leticijile: Ligama lesiGriki lelitsi khaʹrax livela kulelivesi kuphela emiBhalweni yemaKhristu yesiGriki. Lichazwe “njengelugodvo lolucijile lolusetjentiswa nakubiyelwa,” laphindze lachazwa “njengenkambu lebiyelwe ngetingodvo.” Loko Jesu lakusho kwenteka ngemnyaka wa-70 C.E. ngesikhatsi Titus ahola emaRoma kutsi akhe lutsango ngetingodvo eJerusalema. Tintsatfu tintfo Titus labetihlosile—kuvimba emaJuda kutsi angabaleki, kuwaphocelela kutsi aphakamise tandla, nekulambisa takhamuti kute kube ngulapho tititfoba kuye. Kute lakhe lolutsango lwetingodvo eJerusalema, libutfo lemaRoma lagawula tihlahla lebetikuleyo ndzawo.
(Lukha 20:38) Yena unguNkulunkulu walabaphilako, hhayi walabafile, ngobe ngekwembono wakhe bonkhe bayaphila.”
Liphuzu lelicwaningiwe laLuk 20:38 leliku-nwtsty
ngekwembono wakhe bonkhe bayaphila: Noma, “bayaphila kuye.” LiBhayibheli litsi labo labaphilako, kodvwa labatehlukanisile naNkulunkulu, bafile ngekwembono wakhe. (Efe 2:1; 1Tm 5:6) Ngalokufanako, tikhonti taNkulunkulu letetsembekile lesetifile tisaphila ngekwembono wakhe, ngoba nakanjani utawutivusa.—Rom 4:16, 17.
Kufundvwa KweliBhayibheli
(Lukha 19:11-27) Njengobe bafundzi bakhe basalalele, washo umfanekiso ngobe abesondzela eJerusalema, futsi bebacabanga kutsi uMbuso waNkulunkulu wawutawuvela ngaso leso sikhatsi. 12 Watsi: “Indvodza letsite yasebukhosini yaya eveni lelikhashane kute iyewubekwa kutsi ibe yinkhosi, bese iyabuya. 13 Yabita tisebenti tayo letilishumi, yatinika emamina lalishumi, yatsi kuto: ‘Wataliseni ngite ngibuye.’ 14 Kodvwa takhamiti takulelo live betiyitondza, ngako tatfumela emancusa kuyo kute afike atsi: ‘Asifuni kutsi ube yinkhosi yetfu.’ 15 “Yatsi naseyibekiwe kutsi ibe yinkhosi yabuya, yabita letisebenti lebeyitinikete emamina kute ive kutsi tiwatalise kangakanani. 16 Ngako sisebenti sekucala sefika satsi: ‘Nkhosi, imina yakho ngiyitalise ngatfola lamanye lalishumi.’ 17 Yatsi kuso: ‘Wente kahle sisebenti lesihle! Njengobe utivete wetsembekile etintfweni letincane kakhulu, yengamela emadolobha lalishumi.’ 18 Kwase kuta sisebenti sesibili satsi: ‘Nkhosi, imina yakho ngiyitalise ngatfola lamanye lasihlanu.’ 19 Nakulesi yatsi: ‘Nawe yengamela emadolobha lasihlanu.’ 20 Kodvwa lesinye sefika satsi: ‘Nkhosi, nayi imina yakho, bengisolo ngiyigocotele ngendvwangu. 21 Bengikwesaba kakhulu, ngobe bengati kutsi unelulaka; utsatsa lapho ungazange ubeke khona, uvune nalapho ungazange uhlanyele khona.’ 22 Yatsi kuso: ‘Sisebenti lesibi, ngitakwehlulela ngaloko lokushito. Angitsi bewati kutsi nginelulaka, nekutsi ngitsatsa lapho ngingazange ngibeke khona, ngivune nalapho ngingazange ngihlanyele khona? 23 Lemina yami awuyifakanga ngani-ke endzaweni yekulondvolota imali? Bengitawutsi nangibuya ngiyitsatse seyinentalo.’ 24 “Ngako yatsi kulabo lebebeme edvutane: ‘Tsatsani lemina lekuye niyinike lona lonalalishumi.’ 25 Kodvwa batsi kuyo: ‘Nkhosi, lomuntfu sewuvele unemamina lalishumi!’ 26 Yona yaphendvula yatsi: ‘Ngitsi kini: Wonkhe umuntfu lonalokunyenti uyawunikwa lokwengetiwe, kodvwa loyo lote lutfo, ngisho naloko lanako kuyawutsatfwa. 27 Ngako letsani letitsa tami lebetingafuni kutsi ngibe yinkhosi, nitibulale embikwami.’”
AUGUST 20-26
UMCEBO LOSEVINI LANKULUNKULU | LUKHA 21-22
“Kusindziswa Kwenu . . . Sekusedvute”
(Lukha 21:25) “Kuyawuba netibonakaliso elangeni, enyangeni, nasetinkhanyetini, futsi emhlabeni tive tiyawucindzeteleka tingati kutsi kufanele tente njani ngenca yekubhodla kwelwandle nangenca yemagagasi alo.
UMbuso WaNkulunkulu Ususa Titsa Tawo
9 Lokuyowenteka esibhakabhakeni. Jesu watsi: “Lilanga liyawufiphala, inyeti ayiyukhanyisa, tinkhanyeti tiyawukuwa esibhakabhakeni.” Siyaciniseka kutsi baholi benkholo ngeke basatsatfwa njengekukhanya, lokusho kutsi bantfu ngeke basatsembela kubo kutsi babanikete ticondziso. Jesu bekasho tibonakaliso letingakavami yini letitawenteka esibhakabhakeni? Kungenteka bekasho tona. (Isa. 13:9-11; Jow. 2:1, 30, 31) Yini letawentiwa bantfu nababona loko? ‘Bayawucindzeteleka’ ngobe bayawube ‘bangati kutsi kufanele bente njani.’ (Luk. 21:25; Zef. 1:17) Ngalokucinisekile titsa teMbuso waNkulunkulu, letifaka ekhatsi ‘emakhosi netigcili,’ ‘tiyawukwesaba kakhulu ngenca yaloko letitawube tilindzele kutsi kwenteke’ futsi titawufuna indzawo yekubhaca. Nanobe kunjalo, angeke tiyitfole indzawo levikelekile yekukhosela lengatisita kutsi tibalekele lulaka lweNkhosi yetfu.—Luk. 21:26; 23:30; Semb. 6:15-17.
(Lukha 21:26) Bantfu bayawukwesaba kakhulu ngenca yaloko labatawube balindzele kutsi kwenteke emhlabeni, ngobe tintfo letinemandla tasezulwini tiyawunyakatiswa.
(Lukha 21:27, 28) Ngemuva kwaloko, bayawubona iNdvodzana yemuntfu ita isemafini, inemandla nenkhatimulo lenkhulu. 28 Kodvwa naticala kwenteka letintfo, nibosukuma, niphakamise tinhloko tenu, ngobe kusindziswa kwenu kutawube sekusedvute.”
Timisele ‘Kuhlala Unelutsandvo Lwebuzalwane’!
17 Bani ‘nesibindzi.’ (Fundza Hebheru 13:6.) Kwetsembela kuJehova kusenta sibe nesibindzi sekubeketelela kuvivinywa lokumatima. Lesibindzi sisisita kutsi sibe nesimo sengcondvo lesihle. Nasinesimo sengcondvo lesihle, sitawukhona kukhombisa lutsandvo lwebuzalwane ngekutsi sikhutsate futsi sidvudvute bazalwane nabodzadzewetfu. (1 Thesalonika 5:14, 15) Ngisho nangesikhatsi sekuhlupheka lokukhulu, sitawuba nesibindzi ngobe sitawube sati kutsi kukhululwa kwetfu sekusemnyango.—Lukha 21:25-28.
“Kusindziswa Kwenu . . . Sekusedvute”!
13 Yini letawentiwa timbuti natibona kutsi setitawubhujiswa? ‘Titawukhala tilile.’ (Matewu 24:30) Batawenta njani labagcotjiwe nalabo lababasekelako? Batawenta loko lokwashiwo nguJesu, nakatsi: “Naticala kwenteka letintfo, nibosukuma, niphakamise tinhloko tenu, ngobe kusindziswa kwenu kutawube sekusedvute.”—Lukha 21:28.
Kufunisisa Umcebo EVini LaNkulunkulu
(Lukha 21:33) Lizulu nemhlaba kuyawukwendlula, kodvwa emavi ami wona ngeke endlule.
Emaphuzu lacwaningiwe aLuk 21:33 laku-nwtsty
Lizulu nemhlaba kuyawukwendlula: Leminye imiBhalo itsi lizulu nemhlaba kuyawuhlala phakadze. (Ge 9:16; Hla 104:5; Shu 1:4) Ngako kungenteka emavi aJesu kulelivesi asihabiso, futsi asho kutsi noma bekungatsiwa umhlaba nelizulu bekungagcina kwendlulile, wona abetawenteka njengobe Jesu abeshito. (Catsanisa naMat 5:18.) Kepha kusenekwenteka nekutsi umhlaba nelizulu lokushiwo kulelivesi kumelela “lizulu lelisha nemhlaba lomusha” lokukhulunywa ngako kuSem 21:1.
emavi ami wona ngeke endlule: Noma, “emavi ami nakanjani ngeke endlule.” Kulomusho, liphindvwa kabili ligama lesiGriki lelilandvulako, futsi loku kuyindlela lenemandla yekuphikisa umcondvo lotsite, lokwenta kutsi kusikhanyele bha kutsi emavi aJesu atawuhlala kuze kube phakadze.
(Lukha 22:28-30) “Nine benisolo ninami ekulingweni kwami, 29 ngako ngenta sivumelwane nani njengobe naBabe enta sivumelwane seMbuso nami, 30 kute nidle futsi ninatse etafuleni leliseMbusweni wami, niphindze nihlale etihlalweni tebukhosi khona nitekwehlulela tive letilishumi nakubili taka-Israyeli.
Niyawuba “Ngumbuso Webaphristi”
15 Ngemuva kwekucalisa Sidlo SeNkhosi Sakusihlwa, Jesu wenta sivumelwane nebafundzi bakhe labetsembekile, lesibitwa ngekutsi sivumelwane seMbuso. (Fundza Lukha 22:28-30.) Ngekungafani naletinye tivumelwane Jehova laba nencenye kuto, lesivumelwane sisemkhatsini waJesu nebalandzeli bakhe labagcotjiwe. Ngesikhatsi atsi “njengobe naBabe enta sivumelwane . . . nami,” kungenteka kutsi Jesu abekhuluma ngesivumelwane Jehova lasente naye sekutsi abe ‘ngumphristi kuze kube phakadze njengaMelkhisedeki.’—Heb. 5:5, 6.
16 Baphostoli baJesu labetsembekile labangu-11 ‘bebasolo banaye ekulingweni kwakhe.’ Sivumelwane seMbuso sabacinisekisa kutsi bebatawuba naye ezulwini futsi bahlale etihlalweni tebukhosi kute babuse njengemakhosi nanjengebaphristi. Nanobe kunjalo, laba labangu-11 bekungeke kube ngibo bodvwa lebebatawutfola lelilungelo. Jesu lokhatinyulisiwe wabonakala embonweni kumphostoli Johane futsi watsi: “Loncobako ngitamvumela kutsi ahlale nami esihlalweni sami sebukhosi, njengobe nami ngancoba ngase ngihlala naBabe esihlalweni sakhe sebukhosi.” (Semb. 3:21) Ngako-ke, sivumelwane seMbuso sentiwa nemaKhristu lagcotjiwe langu-144 000. (Semb. 5:9, 10; 7:4) Lesivumelwane sakha sisekelo lesisemtsetfweni sekutsi babuse naJesu ezulwini. Loku kufana namakoti losuka emndenini lohloniphekile loshada nenkhosi bese ubusa nayo embusweni. Ecinisweni, imiBhalo ikhuluma ngemaKhristu lagcotjiwe ‘njengamakoti’ waKhristu, ‘intfombi ntfo’ letsembisene umshado naKhristu.—Semb. 19:7, 8; 21:9; 2 Khor. 11:2.
Kufundvwa KweliBhayibheli
(Lukha 22:35-53) Waphindze watsi kubo: “Ngesikhatsi nginitfuma kutsi nihambe ningakaphatsi sipatji nobe sikhwama sekudla nobe tincabule, angitsi anizange neswele lutfo?” Bona batsi: “Yebo kunjalo.” 36 Wase utsi kubo: “Kodvwa nyalo ngitsi loyo lonesipatji akasiphatse, kanjalo nangesikhwama sekudla, naloyo lote inkemba akatsengise ingubo yakhe yangetulu kute ayitsenge. 37 Ngobe ngiyanitjela ngitsi loko lokwabhalwa kufanele kugcwaliseke kimi, kutsi: ‘Utawubalwa kanye nebantfu lababi.’ Ngako loko lokumayelana nami sekuyagcwaliseka.” 38 Batsi kuye: “Nkhosi, sinetinkemba letimbili.” Yena watsi: “Tenele.” 39 Nakaphuma waya eNtsabeni Yemincuma njengobe abehlale enta, futsi bafundzi bakhe bamlandzela. 40 Nakefika lapho, watsi kubo: “Chubekani nithantaza kute ningangeni ekulingweni.” 41 Yena wabashiya, wahamba libanga lelingaba ngangemjikijelo, wafike waguca phansi wathantaza, 42 watsi: “Babe, nangabe utsandza, yendlulise lendzebe kimi. Kodvwa akwenteke intsandvo yakho, hhayi intsandvo yami.” 43 Wabese ubona ingilosi levela ezulwini, futsi yamcinisa. 44 Waba lusizi futsi wachubeka ajula kakhulu emthantazweni, kangangekutsi titfukutfuku takhe taba njengematfonsi engati lawela emhlabatsini. 45 Ngemuva kwekuthantaza, waya kubafundzi bakhe, wabakhandza balele ngenca yelusizi, 46 ngako watsi kubo: “Nileleleni? Vukani futsi nichubeke nithantaza kute ningangeni ekulingweni.” 47 Watsi asakhuluma kweta sicumbi sebantfu lesasiholwa nguJudasi, labengulomunye webafundzi labalishumi nakubili. Judasi weta kuJesu wamanga. 48 Kodvwa Jesu watsi kuye: “Judasi, iNdvodzana yemuntfu uyitsengisa ngekuyanga?” 49 Ngesikhatsi labo lebebanaJesu babona loko lokwakutakwenteka batsi: “Nkhosi, sigadle yini ngaletinkemba tetfu?” 50 Lomunye wabo wavele washaya sisebenti semphristi lophakeme, wasisusa indlebe yangesekudla. 51 Kodvwa Jesu waphendvula watsi: “Sekwenele.” Wase utsintsa lendlebe yalesisebenti, wayelapha. 52 Jesu wakhuluma nebaphristi labakhulu, tindvuna telithempeli, nemadvodza lamadzala labebete kutembamba, watsi: “Nite kimi niphetse tinkemba netindvuku shengatsi nitewubamba sigelekece? 53 Ngesikhatsi ngisesenani ethempelini malanga onkhe, anizange ningibambe. Kodvwa lesi sesikhatsi senu, nesikhatsi sekutsi bumnyama bube nemandla.”
AUGUST 27–SEPTEMBER 2
UMCEBO LOSEVINI LANKULUNKULU | LUKHA 23-24
“Kulungele Kutsetselela Labanye”
(Lukha 23:34) [[Kodvwa Jesu watsi: “Babe, batsetselele ngobe abakwati labakwentako.”]] Ngetulu kwaloko, benta inkatho kute behlukaniselane tingubo takhe.
cl 297 ¶16
“Kwati Lutsandvo LwaKhristu”
16 Jesu walukhombisa kahle lutsandvo lwaBabe wakhe nangalenye indlela—‘bekakulungele kutsetselela.’ (Tihlabelelo 86:5) Lokutsetselela kwaphindze kwabonakala nangalesikhatsi alenga elugodvweni lwekuhlushwa. Yini Jesu lakhuluma ngayo ngalesikhatsi abulawa kabuhlungu futsi abetselwa ngetipikili etandleni takhe nasetinyaweni? Wacela Jehova kutsi abajezise kabuhlungu yini labo bebambulala? Ngalokwehlukile, emavini aJesu ekugcina, sifundza kutsi watsi: “Babe, batsetselele ngobe abakwati labakwentako.”—Lukha 23:34.
(Lukha 23:43) Yena watsi kuso: “Lamuhla ngiyakutjela ngitsi: Utawuba nami ePharadisi.”
g 2/08 11 ¶5-6
Nkulunkulu Uyatitsetselela Yini Tono Letinkhulu?
Jehova akabuki nje sono kuphela, kodvwa uphindze abuke nesimo sengcondvo saloyo lowonile. (Isaya 1:16-19) Asewucabange ngaloko lokwenteka kuletoni letimbili lebetibetselwe eceleni kwaJesu. Totimbili betente emacala lamabi kakhulu, kangangekutsi lelenye yaze yavuma yatsi: “Tsine sisifanele ngobe sivuna loko lesikuhlanyele, kodvwa lona [Jesu] kute lokubi lakwentile.” Lamavi alesoni akhombisa kutsi kukhona besikwati ngaJesu. Lololwati lwasibangela kutsi sente lushintjo lolukhulu engcondvweni yaso. Loku kubonakala kahle kuloko lesase siyakusho nasicela Jesu sitsi: “Ungikhumbule nawufika eMbusweni wakho.” Wenta njani Jesu nakeva lesicelo lesisuka enhlitiyweni? Watsi kuso: “Lamuhla ngiyakutjela ngitsi: Utawuba nami ePharadisi.”—Lukha 23:41-43.
Cabanga ngaloku: Emavi aJesu lawasho njengemuntfu afaka ekhatsi emavi emusa labekawabhekise endvodzeni lebeyivuma kutsi ifanelwe sigwebo sekufa. Loku kusikhutsata kakhulu! Singaciniseka kutsi Jesu Khristu naBabe wakhe, Jehova, batababonisa umusa bonkhe labo labaphendvuka ngekweliciniso, kungakhatsaliseki kutsi bente tono letinjani ngaphambilini.—Roma 4:7.
(Lukha 24:34) futsi bebatsi: “Vele iNkhosi ivusiwe, ngobe ibonakele nakuSimoni!”
cl 297-298 ¶17-18
“Kwati Lutsandvo LwaKhristu”
17 Lesinye sibonelo saJesu sekutsetselela lesitsintsa inhlitiyo sisibona endleleni laphatsa ngayo umphostoli Phetro. Asingabati kutsi Phetro bekamtsandza kakhulu Jesu. Nga-Nisan 14, ngebusuku bekugcina baJesu, Phetro watsi kuye: “Nkhosi, ngikulungele kuboshwa nekufa kanye nawe.” Noma kunjalo, ngemva kwema-awa lambalwa nje akushito loku, Phetro waphika kutsi uyamati Jesu tikhatsi letintsatfu. LiBhayibheli liyasitjela kutsi yini leyenteka ngesikhatsi Phetro amphika kwesitsatfu. Litsi: “INkhosi yagucuka yabuka Phetro.” Eva buhlungu ngesono lebesasentile, Phetro “waphumela ngephandle wadzindza sililo.” Ngesikhatsi Jesu afa kamuva ngalelo langa, kungenteka lomphostoli watibuta kutsi, ‘INkhosi yami ingicolele yini?’—Lukha 22:33, 61, 62.
18 Akudzingekanga kutsi Phetro alindzele imphendvulo yalombuto sikhatsi lesidze. Jesu wavuswa ekuseni nga Nisan 16, futsi kungenteka ngalelo langa wavakashela Phetro. (Lukha 24:34; 1 Khorinte 15:4-8) Yini leyenta Jesu wamnaka ngalokukhetsekile lomphostoli nanobe bekamphike walala ngesisu? Kungenteka Jesu bekafuna kucinisekisa Phetro lobekasaphendvukile kutsi bekasamtsandza nekutsi bekabalulekile eNkhosini yakhe. Kodvwa Jesu wenta lokungetulu nje kuze acinisekise Phetro.
Kufunisisa Umcebo EVini LaNkulunkulu
(Lukha 23:31) Nangabe benta letintfo sihlahla nasisemanti, kutawukwentekani-ke nasesomile?”
Liphuzu lelicwaningiwe laLuk 23:31 leliku-nwtsty
sihlahla nasisemanti . . . nasesomile: Kulamavi, kungenteka Jesu bekabhekisela esiveni semaJuda. Lesive besifana nesihlahla lesifako, kodvwa lesisemanti, ngobe Jesu bekasekhona, futsi nalamanye emaJuda labekholwa kuye bewasesekhona. Noma kunjalo, Jesu bekatawubulawa madvutane, futsi emaJuda letsembekile bewatawugcotjwa ngemoya longcwele futsi abe yincenye ya-Israyeli waNkulunkulu. (Rom 2:28, 29; Gal 6:16) Ngaleso sikhatsi, Israyeli longekwemvelo bekatawube afile ebuhlotjeni bakhe naNkulunkulu, lokumelelwa sihlahla lesomile.—Mat 21:43.
(Lukha 23:33) Nabefika endzaweni lebitwa ngekutsi Sikobho, bambetsela kanye naletigelekece, sinye sibetselwe ngesekudla sakhe, kantsi lesinye sibetselwe ngesencele.
Sitfombe lesiku-nwtsty
Sipikili Etsanjeni Lesitsendze
Lesi sitfombe selitsambo lesitsendze semuntfu lesishayelwe ngesipikili lesingemasentimitha langu-11.5 budze. Litsambo lelingilo mbamba latfolakala nga-1968 ngesikhatsi bacwaningi bemlandvo bavubukula enyakatfo yeJerusalema. Lomlandvo uniketa bufakazi bekutsi tipikili betivame kusetjentiswa nakubetselwa umuntfu lotsite elugodvweni. Lesipikili kungenteka siyefana naleso emasotja emaRoma lasisebentisa nakabetsela Jesu elugodvweni. Lelitsambo latfolakala ebhokisini lebelakhiwe ngematje lapho bekufakwa khona ematsambo emuntfu lofile nangabe inyama seyibole yaphela (ossuary). Loku kusho kutsi umuntfu lobekabetselwe elugodvweni bekangcwatjwa.
Kufundvwa KweliBhayibheli
(Lukha 23:1-16) Ngako bonkhe besuka bammikisa kuPilatu. 2 Bambeka licala batsi: “Lomuntfu simtfole adukisa sive sakitsi, avimbela kukhokhwa kwemtselo kuKhesari, atibita nangekutsi unguKhristu inkhosi.” 3 Ngako Pilatu wambuta watsi: “UyiNkhosi yemaJuda yini?” Jesu wamphendvula watsi: “Sewuvele ushito.” 4 Pilatu wase utsi kubaphristi labakhulu nasesicunjini sebantfu: “Angitfoli cala kulomuntfu.” 5 Kodvwa baphikelela batsi: “Lomuntfu ususa lutfutfuva ngekufundzisa kulo lonkhe laseJudiya, kusukela eGalile kute kube ngulapha.” 6 Nakeva loko, Pilatu wabuta kutsi Jesu waseGalile yini. 7 Ngako nasevile kutsi uvela esifundzeni saHerodi, wamtfumela kuye, njengobe Herodi abeseJerusalema ngaleso sikhatsi. 8 Herodi wajabula kakhulu nakabona Jesu, ngobe kwasekusikhatsi lesidze afuna kumbona ngenca yekutsi kwasekukunyenti labekuvile ngaye, futsi abenelitsemba lekutsi utawumbona enta simangaliso. 9 Ngako wambuta imibuto leminyenti, kodvwa akazange aphendvule. 10 Nanobe kunjalo, baphristi labakhulu kanye netati temtsetfo bebasolo basukuma bambeka licala ngekutfukutsela. 11 Ngako Herodi nemasotja akhe bamedzelela futsi bahlekisa ngaye, bamembatsisa ingubo lemhlophe babese bambuyisela kuPilatu. 12 Kusukela ngalelo langa, boHerodi naPilatu baba bangani, nanobe ngembikwaloko bebatitsa. 13 Pilatu wase ubita baphristi labakhulu, baholi kanye nebantfu, 14 watsi kubo: “Niletse lomuntfu kimi ngobe nitsi wenta bantfu bavukele. Kodvwa ngimphenyisise embikwenu ngangasitfoli sizatfu semacala lenimbeke wona. 15 NaHerodi umtfole ete licala, kungako ambuyise kitsi, futsi kute lakwentile lomuntfu lokumenta afanelwe kufa. 16 Ngako ngitamjezisa bese ngiyamkhulula.”