Kuhlolisisa ImiBhalo Malanga Onkhe Kuyakuzuzisa Yini?

Luhlelo lwakho lolwenta onkhe malanga kute ucinise buhlobo bakho naNkulunkulu, lufaka ekhatsi kufundza umBhalo welusuku yini kanye nekufundza sigaba lesifundvwa ngalelolanga lesikubhukwana lotsi Kuhlolisisa ImiBhalo Malanga Onkhe? Nakungesiko njalo, ungakwenta yini kutsi kube seluhlelweni lwakho? Labanye umBhalo welusuku bawufundza ekuseni kakhulu kute bacabange ngawo nabenta imisebenti yangalelolanga. (Josh. 1:8; Hla. 119:97) Yini longayenta kute uzuze kakhulu emBhalweni welusuku? Fundza ingcikitsi yalelovesi leliseBhayibhelini kute utfole kutsi bekwentekeni kuze kubhalwe lamavi lawo. Yetama kucabanga ngendzaba leseBhayibhelini lefanekisa leliphuzu lokukhulunywa ngalo kulombhalo losetjentisiwe. Bese usebentisa leso sifundvo lositfolile ekuphileni kwakho. Nangabe liVi laNkulunkulu litsintsa tincumo lotentako, kutawusho kutsi licondzisa kuphila kwakho futsi likuzuzisa kakhulu.—Hla. 119:105.

Imindeni yaseBethel emhlabeni wonkhe, Kuhlolisisa Imibhalo Malanga Onkhe ikwenta njalo nayidla kudla kwasekuseni. Kuleminyaka yakamuva, loko labacoca ngako kufakwa eluhlelweni lweMsakato we-JW ngephansi kwencenye yema-video letsi IMIHLANGANO NEMIBUTSANO. Wagcina nini kubukela yinye nobe lamanyenti awo? Kungenteka loko lokukhunywa ngako kulama-video, nguloko lokudzingako. Sibonelo nje, indzaba yeLoti ingatitsintsa njani tincumo lotentako?

BUKELA I-VIDEO LETSI UNGALITSANDZI LIVE (1 JOH. 2:15) BESE UPHENDVULA LEMIBUTO LELANDZELAKO:

• LoKukhonta Kwasekuseni bekusekelwe kusiphi simiso lesiseBhayibhelini?

• Indzaba yaLoti ibuveta njani bungoti bekutsandza live nobe tintfo letikulo?—Gen. 13:12; 14:12; 19:3, 12, 13, 24-26

• Singakhombisa njani kutsi siyamtsandza Jehova, hhayi live netintfo letikulo?