Imibhalo Yetfulwe Kahle

LOKO lesikufundza emihlanganweni yelibandla kusekelwe emiBhalweni. Naloko lesikushoko nasisensimini nako kusekelwe eBhayibhelini. Kodvwa kuze loku kube nemphumela lomuhle, kutawuya ngekutsi siyetfule kahle yini imibhalo.

Kudzingeka wente lokungetulu kwekumane usho umbhalo nobe ucele umuntfu lokhuluma naye kutsi ahambisane nawe njengobe uwufundza. Nawetfula umbhalo, yetama kufeza lemigomo lemibili: (1) Yenta lomuntfu alangatelele kuva lombhalo, futsi (2) usho nesizatfu sekuwufundza. Lemigomo ingase ifinyelelwe ngetindlela letehlukehlukene.

Buta Umbuto. Lendlela iphumelela kakhulu nangabe imphendvulo ingacaci ngekushesha kulabo labakulalele. Yetama kubuta umbuto ngendlela letawukwenta bantfu bacabange. Jesu wakwenta loko. Ngesikhatsi baFarisi beta kuye ethempelini futsi bamlinga embikwebantfu kutsi uyati kangakanani imiBhalo, Jesu wababuta watsi: “Nicabanga kutsi Khristu uyindvodzana yabani?” Bamphendvula batsi: “Uyindvodzana yaDavide.” Jesu waphindze wababuta watsi: “Kungani-ke ngesikhatsi Davide achutjwa ngumoya longcwele, ambita ngekutsi ‘yiNkhosi’?” Jesu wabese ucaphuna Tihlabelelo 110:1. LabaFarisi behluleka kumphendvula. Nome kunjalo, bantfu lebebalapho bamlalela ngekujabula lokukhulu.​—Mat. 22:41-46.

Kuze wetfule umbhalo nawusensimini, ungasebentisa imibuto lefana nalena: “Tsine sobabili sinemagama. Nkulunkulu yena unalo yini ligama? Imphendvulo singayitfola kuTihlabelelo 83:18.” “Kuyoke kwenteke yini kutsi kube nahulumende munye lobusa wonkhe umhlaba? Asewunake kutsi Danyela 2:44 uwuphendvula njani lombuto.” “LiBhayibheli liyakhuluma yini ngetintfo letenteka esikhatsini setfu? Ase ucatsanise loko lokushiwo ngu-2 Thimothi 3:1-5 kanye netimo letikhona.” “Kuyoke kuphele yini kuhlupheka kanye nekufa? LiBhayibheli liyayiveta imphendvulo yalombuto kuSembulo 21:4, 5.”

Nawetfula inkhulumo, kusebentisa kahle imibuto nawetfula umbhalo kungase kwente labakulalele bafise kuwuva ngisho nobe bawetayele. Batawuba naso yini vele leso sifiso? Loko kutawuya ngekutsi imibuto loyibutako iyabatsintsa yini bona nome cha. Ngisho nome indzaba lokhuluma ngayo ibatsintsa, tingcondvo tabo tingazula nangabe ufundza imibhalo labayetayele. Kuze kungenteki loko, kudzingeka ucabangisise nawulungiselela kute inkhulumo yakho itewutsandzeka.

Shano Inkinga. Ungase uvete inkinga bese usho umbhalo lokhuluma ngesisombululo sayo. Ungenti labakulalele balindzele lokukhulu kunalabatakutfola embhalweni. Esikhatsini lesinyenti, umbhalo awusiniketi tonkhe tisombululo. Nome kunjalo, nasewufundza lowo mbhalo ungase ucele labo labakulalele banake kutsi usiniketa siphi sicondziso kuze sisombulule leyo nkinga.

Ngendlela lefanako, ungase usho simiso sekutiphatsa lokwemukelwa nguNkulunkulu bese usebentisa indzaba leseBhayibhelini kuze ukhombise kutsi kusita ngani kusilandzela. Nangabe umbhalo unemaphuzu lamabili (nobe lamanyenti) lahlobene nalokukhulunywa ngako, letinye tikhulumi ticela labalalele kutsi bawanake lawo maphuzu. Nangabe labakulalele bangayicondzi inkinga loyishito, ungase ubente bacabange ngekutsi wena usho tintfo letingenteka bese uvumela umbhalo kutsi ubanikete imphendvulo.

Khombisa Kutsi LiBhayibheli Linemandla. Nangabe sewubentile labo labakulalele kutsi balangatelele indzaba lokhuluma ngayo futsi washo lokutsite ngayo, ungase wetfule umbhalo ngekutsi utsi: “Naka kutsi liVi laNkulunkulu litsini ngalendzaba.” Loko kutawuveta kutsi kubalulekile loko lotakufundza.

Jehova wasebentisa emadvodza latsite kutsi abhale tincenye teliBhayibheli. Lamadvodza abefaka ekhatsi boJohane, Lukha, Pawula naPhetro. Jehova nguye uMbhali, kodvwa abesebentisa lamadvodza kuze ambhalele. Kwetfula umBhalo ngekutsi utsi “Phetro wabhala watsi,” nobe ngekutsi “Pawula watsi,” ngeke kube nemandla njengalapho uwetfula ngekuveta kutsi lombhalo ulivi laNkulunkulu. Loku kubalulekile ikakhulukati nawukhuluma nebantfu labangayifundzi iMibhalo Lengcwele. Kuyaphawuleka kutsi ngaletinye tikhatsi Jehova abetjela Jeremiya kutsi etfule timemetelo takhe ngekutsi atsi: ‘Vanini livi laSimakadze.’ (Jer. 7:2; 17:20; 19:3; 22:2) Ngisho nobe sisebentisa ligama laJehova nasetfula umbhalo nobe cha, kufanele sitimisele kutsi njengobe sichubeka nekukhuluma sivete kutsi loko lokuseBhayibhelini kulivi lakhe.

Naka Ingcikitsi Yendzaba. Nawuncuma indlela lotawetfula ngayo umbhalo, kufanele uyinake ingcikitsi yawo. Ngaletinye tikhatsi, utawuvele uyisho ngalokucondzile ingcikitsi yembhalo; nobe kunjalo, ingcikitsi ingase incume kutsi yini lotawuyisho. Ase sibekise: Emavi aJobe lobekesaba Nkulunkulu ungawetfula yini ngendlela longetfula ngayo emavi alomunye webadvudvuti mbumbulu bakhe? Incwadzi yeMisebenti yabhalwa nguLukha, kodvwa ucaphuna emavi lashiwo ngulabanye, labafaka ekhatsi Jakobe, Phetro, Pawula, Filiphu, Stefano, tingilosi, Gamaliyeli nalamanye emaJuda labengasiwo emaKhristu. Ungatsi ashiwo ngubani emavi embhalo lowucaphunako? Nasi sibonelo: Khumbula kutsi akusito tonkhe tihlabelelo letacanjwa nguDavide, nekutsi incwadzi yeTaga ayizange ibhalwe nguSolomoni kuphela. Kuyasita nekwati kutsi umbhali weliBhayibheli abekhuluma nabani nekutsi yini labekhuluma ngayo.

Sebentisa Kwatiswa Lokuchaza Indzaba. Loku kuphumelela kakhulu nangabe utawuveta kutsi timo lebetikhona nakubhalwa loko kulandzisa lokuseBhayibhelini, tiyafana naleto lokhuluma ngato. Ngaletinye tikhatsi, kuyadzingeka kwatiswa lokuchaza indzaba kuze umbhalo lotsite ucondzakale kahle. Nasi sibonelo: Nawufundza umbhalo wemaHebheru 9:12, 24, enkhulumeni lekhuluma ngenhlawulo, kungase kudzingeke wetfule lombhalo ngekutsi uchaze kafishane likamelo lelisekhatsi nelithende lekukhontela, lombhalo lolichaza ngekutsi limelela indzawo Jesu langena kuyo nakenyukela ezulwini. Kodvwa-ke ungachazi kakhulu uze ungasakhanyi umbhalo lowetfulako.

Kuze utfutfukise indlela lowetfula ngayo imibhalo, hlatiya kutsi tenta njani tikhulumi letinalokuhlangenwe nako. Naka tindlela letehlukehlukene letitisebentisako. Hlolisisa kutsi tiphumelela kangakanani leto tindlela. Nawulungiselela tinkhulumo takho, tfola kutsi ngumiphi imibhalo leyinhloko bese ucabangisisa ngekutsi umbhalo ngamunye kufanele ufeze ini. Hlela ngekucophelela indlela yekwetfula umbhalo ngamunye kuze ibe nemiphumela lemihle. Ngekuhamba kwesikhatsi, yetama kwenta loku kuyo yonkhe imibhalo loyisebentisako. Njengobe utfutfuka, utawukhona kugcamisa kakhulu liVi laNkulunkulu.