Khutsata Labalalele kutsi Nabo Bafundze Ebhayibhelini

SIFISO setfu kwenta wonkhe umuntfu anake liVi laNkulunkulu liBhayibheli. Umlayeto lesiwushumayelako siwusekela kuyo lencwadzi lengcwele, futsi sifuna bantfu babone kutsi lesikushoko akuveli kitsi kodvwa kuvela kuNkulunkulu. Bantfu kudzingeka baletsembe liBhayibheli.

Ensimini. Ngaso sonkhe sikhatsi nawulungiselela kuya ensimini, khetsa umbhalo munye nome ngetulu, lotawucoca ngawo nebantfu labafisa kukulalela. Ngisho nome uhlela kusebentisa inshumayelo lemfisha nawutawuhambisa incwadzi letsite, kuvame kuzuzisa kufundza umbhalo lofanele eBhayibhelini. LiBhayibheli linemandla ekucondzisa bantfu labafana netimvu, kwendlula nome yini tsine lesingase siyisho. Nangabe ungeke ukhone kulifundza ngalokucondzile liBhayibheli, ungase ulicaphune. Ngelikhulu lekucala leminyaka, bantfu labanyenti bebete imiculu yemiBhalo. Nome kunjalo, esikhatsini lesinyenti Jesu nebaphostoli bakhe bebacaphuna kakhulu emiBhalweni. Natsi kufanele setame kubamba imibhalo ngenhloko futsi siyisebentise kahle ensimini, mhlawumbe ngalesinye sikhatsi siyicaphune.

Nawutawufundza liBhayibheli, libambe ngesandla kuze loyo lococa naye akhone kuhambisana nawe nawufundza. Nangabe lococa naye ahambisana nawe eBhayibhelini lakhe, imiphumela ingaba mihle kakhulu.

Nome kunjalo, kufanele ukhumbule kutsi labanye bahumushi beliBhayibheli batentele ngendlela yabo nabahumusha liVi laNkulunkulu. Emahumusho abo angase angahambisani ngaso sonkhe sikhatsi nalokushiwo yimiBhalo yetilwimi tekucala. Lamuhla, emahumusho lamanyenti alikhiphile ligama laNkulunkulu, futsi akwente kwaba matima kucondza lokushiwo yimibhalo yetilwimi tekucala mayelana nesimo salabafile. Akufihlile naloko lokushiwo liBhayibheli mayelana nenjongo yaNkulunkulu ngemhlaba. Kuze umuntfu umkhombise loko lokwentiwe ngulabahumushi, kungase kudzingeke kutsi ucatsanise emavesi layinhloko emaBhayibhelini lehlukehlukene nobe emahumushweni akadzeni elulwimi lolufanako. Etihlokweni letinyenti, incwadzi letsi “Ukubonisana NgemiBhalo” iveta indlela emahumusho lamanyenti labeka ngayo emagama layinhloko emavesini lavame kusetjentiswa. Umuntfu lotsandza liciniso angakujabulela kutfola lolo lwati.

Emihlanganweni Yelibandla. Emihlanganweni yelibandla, bonkhe labakhona kufanele bakhutsatwe kutsi basebentise emaBhayibheli abo. Loku kusita ngetindlela letinyenti. Kwenta kutsi labalalele bahlale banake lokukhulunywa ngako futsi bakubone ngeliso lengcondvo loko sikhulumi lesikhuluma ngako. Kuphindze kwente labo labatsandza kufundza ngeliBhayibheli babone kutsi vele ngilo lelingumtfombo wetinkholelo tetfu.

Kuze labakulalele nabo bahambisane nawe emaBhayibhelini abo nawufundza umBhalo, kudzingeka ubakhutsate kutsi bawavule. Lenye indlela lencono kakhulu kuvele ubacele ngalokucondzile kutsi bawavule.

Njengobe usikhulumi, kungumtfwalo wakho kuncuma kutsi ngumiphi imibhalo lofuna kuyigcamisa, ngekutsi ucele labakulalele bahambisane nawe nawuyifundza. Kuhle kufundza imibhalo letakusita kutsi utfutfukise emaphuzu layinhloko. Nangabe sikhatsi sivuma, fundza naleminye lembalwa lesekela loko lokushoko.

Akukeneli kumane nje usho umbhalo nobe ucele labakulalele kutsi bawuvule. Nangabe ufundza umbhalo lotsite bese uyendlula uyofundza lomunye babe basengakawutfoli ngisho nalowekucala, ngekushesha batawudvumala bese bayayekela kuhambisana nawe emaBhayibhelini abo nawufundza umbhalo. Ngako-ke kufanele unake. Nangabe labanyenti sebawutfolile lowo mbhalo, ungachubeka nekuwufundza.

Kufanele ucabange kusesenesikhatsi. Umbhalo wusho kusesele sikhatsi kutsi uwufundze. Kwenta njalo kutakusita kutsi ungemi sikhatsi lesidze solo ulindze kutsi labo labakulalele bawutfole. Atawuba mbalwa emaphuzu lotawahlanganisa nangabe uniketa labakulalele sikhatsi sekutfola imibhalo, kodvwa umphumela utawuba muhle kakhulu.