Kubuka Labo Labakulalele

EMEHLO etfu aveta simo sengcondvo lesinaso kanye nendlela lesitiva ngayo. Angaphindze akhombise kutsi simangele nobe kutsi siyesaba. Angase akhombise nekutsi sineluvelo nobe kutsi sinelutsandvo. Ngaletinye tikhatsi, angase akhombise kungabata nobe lusizi. Mayelana nebantfu baseveni lakubo lebebahlupheke kakhulu, lomunye mkhulu watsi: “Sikhuluma ngemehlo.”

Labanye bantfu bangase bafinyelele esiphetfweni lesitsite ngatsi nangaloko lesikushoko kuye ngekutsi emehlo etfu abuke kuphi. Emasikweni lamanyenti, bantfu bavame kumetsemba umuntfu lobabuka ngemusa nakakhuluma nabo. Kodvwa umuntfu lobuka phansi nobe lobuka intfo letsite kunekutsi abuke loyo lakhuluma naye bangase bakungabate loko lakushoko kanye nelikhono lakhe. Kulamanye emasiko kubuka umuntfu emehlweni sikhatsi lesidze kutsatfwa njengekwedzelela, kulwa, nobe kumchukuluta. Loku kuliciniso ikakhulukati nawukhuluma nemuntfu walobunye bulili, sikhulu nobe lomunye umuntfu lonesikhundla. Kuletinye tindzawo, nangabe umntfwana abuka umuntfu lomdzala emehlweni nakakhuluma naye, loko kutsatfwa ngekutsi kungahloniphi.

Nobe kunjalo, nangabe kungatsatfwa njengendzelelo, kubuka loyo lokhuluma naye emehlweni nangabe usho intfo lebalulekile kungagcizelela loko lokushoko. Kungatsatfwa ngekutsi uyaciniseka ngaloko lokushoko. Asewunake indlela Jesu lenta ngayo ngesikhatsi bafundzi bakhe bamangala, futsi batsi: “Pho-ke ngubani loyawusindziswa?” LiBhayibheli litsi: “Jesu wababuka emehlweni wase utsi: ‘Kumuntfu loku ngeke kwenteke, kodvwa kuNkulunkulu tonkhe tintfo tingenteka.’” (Mat. 19:25, 26) ImiBhalo iphindze ivete kutsi umphostoli Pawula wayinakisisa indlela bantfu labebamlalele labatsintseka ngayo. Ngalelinye lilanga Pawula nakakhuluma bekukhona indvodza lebeyisishosha kusukela yatalwa. Imisebenti 14:9, 10 itsi: “Lendvodza beyilalele njengobe Pawula akhuluma. Watsi nakayibukisisa wabona kutsi iyakholwa kutsi ingaphila, ngako watsi kuyo: ‘Sukuma ume ngetinyawo.’”

Lesingakwenta Nasisensimini. Nawusensimini bani nebungani nawukhuluma nebantfu. Nakufanele, buta imibuto leyenta umuntfu acabange kuze ucoce naye ngalokutsite lenivumelana ngako. Njengobe wenta loku, yetama kumbuka emehlweni, nobe lokungenani umbuke ebusweni ngenhlonipho nangemusa. Injabulo umuntfu layikhombisa ebusweni ngekumoyitela yenta kutsi bantfu bamnake. Kumoyitela kungamkhombisa lokunyenti loyo lokhuluma naye mayelana nekutsi wena ungumuntfu lonjani, futsi kungamenta akhululeke njengobe nicoca.

Lapho kufanele khona, kubuka indlela lativa ngayo, lebonakala emehlweni, kungakusita ubone kutsi ungenta njani kuleso simo lesisuke sikhona. Ungakhona kubona nangabe umuntfu atfukutsele nobe angenandzaba naloko lokushoko. Ungaphindze ubone nangabe angakucondzi loko lokushoko. Esikhatsini lesinyenti utawumbona ngisho nobe sekadzineka. Nakakutsandza mbamba loko lenicoca ngako, naloko futsi kutawubonakala. Loko lokushiwo ngemehlo akhe kutakukhombisa nakudzingeka ushintje litubane lokhuluma ngalo, nakudzingeka uchubeke umenta kutsi naye akhulume, nobe usale wephetsa nobe umkhombise indlela sifundvo seliBhayibheli lesichutjwa ngayo.

Nome ngabe ushumayela etindzaweni tawonkhe wonkhe nome uchuba sifundvo seliBhayibheli, yetama kumbuka ngenhlonipho umuntfu lokhuluma naye. Ungambuki sikhatsi lesidze ngobe loko kungamenta adliwe ngemahloni. (2 Khos. 8:11) Kodvwa kudzingeka ubohle umbuka, kepha loku ukwente ngendlela leyejwayelekile futsi lenebungani. Etindzaweni letinyenti, kubuka umuntfu kanjalo kukhombisa kutsi umkhatsalela mbamba. Kuliciniso kutsi nawufundza liBhayibheli nobe lenye incwadzi, emehlo akho atawunaka loko lokufundzako, kodvwa kuze ugcizelele liphuzu lelitsite ungase umbuke ngalokucondzile umuntfu lokhuluma naye, kepha loku ungakwenti sikhatsi lesidze. Nawuhle umbuka umuntfu lokhuluma naye, loko kutakusita ubone kutsi kuyamtsintsa yini loko lokufundzako.

Nangabe ekucaleni, emahloni akwenta kube matima kubuka umuntfu lokhuluma naye, ungapheli emandla. Nawuchubeka uphrakthiza, loku kutawutentakalela futsi kutawukwenta uphumelele nawukhuluma nalabanye.

Nawetfula Inkhulumo. LiBhayibheli litsi ngembikwekucala iNshumayelo Yasentsabeni, Jesu “waphakamisa emehlo wabuka bafundzi bakhe.” (Luk. 6:20) Fundza kulesibonelo saJesu. Nawutawukhuluma nelicembu lebantfu, babuke bese uhlaba likhefu kancane ngembikwekutsi ukhulume. Etindzaweni letinyenti loko kungadzinga kutsi ubuke labatsite kulabo labakulalele. Loko kungakusita unciphise luvalo losuke unalo. Kungaphindze kusite labo labalalele kutsi bahambisane nesimo sakho sengcondvo kanye nemiva levetwa buso bakho. Ngetulu kwaloko, loku kutawunika labo lokhuluma nabo litfuba lekutsi balungele kulalela futsi bakunake njengobe wetfula inkhulumo yakho.

Nawusachubeka nenkhulumo yakho, buka labo labakulalele. Ungababuki bonkhe kodvwa yetama kubuka umuntfu ngamunye. Cishe kuwo onkhe emasiko, kulindzelekile kutsi umuntfu lowetfula inkhulumo ababuke labo labamlalele.

Kubuka labo labakulalele akusho kumane wendlulise emehlo, ubuke lena nalena. Ngenhlonipho buka lotsite kulabo labakulalele, futsi nangabe kwemukeleka, shano umusho wonkhe solo umbukile. Ngemuva kwaloko, buka lomunye, futsi usho umusho munye nobe lemibili solo umbukile. Ungambuki umuntfu sikhatsi lesidze aze adliwe mahloni, futsi ungabuki bantfu banye. Yisebentise lendlela, ubuke umuntfu ngamunye kulabo labakulalele, kodvwa njengobe ubuka umuntfu lotsite kubo, khuluma naye futsi unake nendlela latsintseka ngayo ngembikwekutsi wendlulele kulomunye.

Luhlaka lwakho lubeke etafuleni lesikhulumi, nobe uluphatse ngesandla nobe ulufake eBhayibhelini lakho kuze ukhone kuhle ulubuka kancane. Ngeke ukhone kubuka labo labakulalele nangabe kutawudzingeka kutsi ugobe inhloko kute ubone luhlaka lwakho. Kufanele uhlele kutsi utalubuka kanyenti kangakanani luhlaka kanye nekutsi utalubuka nini. Nawufundza phansi kantsi sewusephuzwini lelibalulekile, ngeke ukhone kubona indlela labo labakulalele labatsintseka ngayo futsi loko lokushoko ngeke kube nemandla. Ngendlela lefanako, nawulubuka njalo luhlaka lwakho ngeke ukhone kubuka labo labakulalele.

Nawujikela lotsite ibhola, uyabuka kutsi uyayibamba yini. Liphuzu ngalinye lenkhulumo yakho lifana nebhola ‘lejikwako.’ Nangabe ‘balibambile’ utawubona ngekutsi bavume ngenhloko, bamoyitele nobe bakubukisise. Nawubabuka emehlweni, loko kutakusita uciniseke kutsi emaphuzu lowashoko ‘bayawabamba.’

Nangabe wabelwe kufundza ebandleni, kufanele yini kutsi ubuke labo labakulalele nawusafundza? Nangabe labo labakulalele bahambisana nawe, bafundza emaBhayibhelini abo, labanyenti ngeke babone kutsi ubabukile nome cha. Kubabuka kutakusita kutsi ufundze ngemdlandla ngobe utawube uyibona indlela labatsintseka ngayo. Nangabe kukhona labangakawavuli emaBhayibheli abo nalokungenteka tingcondvo tabo tiyazula, kubabuka kutawubasita kutsi banake loko lokufundvwako. Kuliciniso kutsi ngeke ukhone kubabuka sikhatsi lesidze futsi akukafaneli ubabuke ngendlela letakwenta kutsi ubambeke nawufundza. Ngaleso sizatfu, kuncono kakhulu kubamba liBhayibheli ngesandla uphakamise inhloko, futsi silevu sakho singanamatseli esifubeni.

Ngaletinye tikhatsi, labadzala babelwa kwetfula tinkhulumo letifundvwako emihlanganweni lemikhulu. Kuze uyetfule kahle inkhulumo lenjalo, kudzingeka lokuhlangenwe nako, kulungiselela ngekucophelela kanye nekuphrakthiza kanyenti. Kuliciniso kutsi inkhulumo lefundvwako ayiniketani ematfuba lamanyenti ekubuka labo labalalele, kodvwa nangabe sikhulumi silungiselele kahle, kufanele sikhone kubabuka kepha singalahleki kutsi sesikuphi. Nangabe sikhulumi senta kanjalo, labo labalalele batawuhlale basinakile futsi batawuzuza kakhulu kuloko Nkulunkulu labafundzisa kona.