Setfulo Lesenta Bantfu Babe Nesifiso Sekulalela

SETFULO siyincenye lebalulekile kunobe nguyiphi inkhulumo. Nangabe wente labo lokhuluma nabo baba nelilukuluku lekulalela, batakulalelisisa loko lotawukusho. Nawusensimini, ngeke ukhone kuchubeka ucoca nebantfu nangabe setfulo sakho singabenti babe nesifiso sekulalela. Nawetfula inkhulumo eHholweni LeMbuso, labo lokhuluma nabo ngeke basukume bahambe kodvwa kungenteka bacale kucabanga ngaletinye tintfo nangabe ungakabenti kutsi babe nelilukuluku lekulalela.

Nawulungiselela setfulo, cabanga ngalemigomo lelandzelako: (1) kwenta labo lokhuluma nabo bakunake, (2) kusisho ngalokucacile sihloko sakho, kanye (3) nekukhombisa kutsi leso sihloko sibaluleke ngani kulabo labakulalele. Kuletinye timo, lemigomo lemitsatfu ungayifeza ngesikhatsi sinye. Kodvwa ngaletinye tikhatsi, ungase unake munye walemigomo ngesikhatsi, futsi ungayilandzelanisa ngetindlela letehlukehlukene.

Indlela Yekwenta Labo Lokhuluma Nabo Bakunake. Kutsi bantfu betile kutewulalela inkhulumo akusho kutsi batakulalelisisa nawuyetfula. Kungani kunjalo? Kungobe kunetintfo letinyenti labacabanga ngato. Kungenteka bakhatsateke ngenkinga letsite yasekhaya nobe ngaletinye tintfo. Ngako-ke nawusikhulumi, umsebenti lomkhulu lonawo kwenta labo lokhuluma nabo kutsi bakunake futsi bachubeke bakulalele. Kunetindlela letinyenti tekwenta loku.

INshumayelo YaseNtsabeni ingulenye yetinkhulumo letidvumile letake tetfulwa. Sasinjani setfulo sayo? Ngekusho kwekulandzisa lokutfolakala kuLukha, Jesu watsi: “Niyajabula nine leneswele, . . . Niyajabula nine lenilambile nyalo, . . . Niyajabula nine lenikhalako nyalo, . . . Niyajabula nobe nini lapho bantfu banitondza.” (Luk. 6:20-22) Kungani loko kwabangela kutsi bantfu babe nelilukuluku lekulalela? Ngemavi lambalwa, Jesu wakhombisa kutsi abetati tinkinga letimatima labo labekhuluma nabo lebebanato. Ngemuva kwaloko, esikhundleni sekukhuluma sikhatsi lesidze ngaleto tinkinga, wakhombisa kutsi bantfu labebanaleto tinkinga bebangakhona kujabula, futsi loku wakwenta ngendlela leyabenta bafuna kuchubeka balalele.

Imibuto ingasetjentiswa ngemphumelelo ekwenteni bantfu babe nesifiso sekulalela, kodvwa kufanele kube yimibuto lefanele. Nangabe imibuto yakho ikhombisa kutsi utawukhuluma ngentfo lesebake beva ngayo labo lokhuluma nabo, kungenteka bangasabi naso sifiso sekulalela. Ungabuti imibuto letababangela emahloni bantfu lokhuluma nabo nobe letawubenta babonakale babantfu lababi. Kodvwa timisele kutsi ubute imibuto ngendlela letawubenta bacabange. Hlaba likhefu kancane ngemuva kwekubuta umbuto ngamunye kuze kutsi labo labakulalele babe nesikhatsi sekuwuphendvula ngengcondvo. Nangabe beva shengatsi bacoca nawe, usuke ukhonile kubenta bakunake.

Kusebentisa lokuhlangenwe nako kungulenye indlela lekahle yekwenta bantfu bakunake. Kodvwa kungenteka ungawufezi umgomo wakho nangabe ucoca ngalokuhlangenwe nako lokubabangela emahloni labanye lokhuluma nabo. Nangabe loku lokuhlangenwe nako kungiko lokukhunjulwako kunesifundvo lesitfolakala kuko, usuke ungakawufezi umgomo wakho. Nangabe usebentisa lokuhlangenwe nako esetfulweni, kufanele kube sisekelo seliphuzu lelibalulekile lenkhulumo yakho. Nanobe kudzingeka imininingwane letsite kuze lokuhlangenwe nako kucace, kufanele ucaphele kutsi ungakwenti kube kudze ngisho nobe kungadzingeki.

Letinye tikhulumi ticala ngendzaba lesematseni, nobe ngekucaphuna lokutsite lokutfolakala ephephandzabeni, nobe ngekusho emavi lashiwo ngumuntfu losesikhundleni. Leto tintfo nato tingaphumelela nangabe tihambelana kahle nesihloko futsi tifanelana nebantfu lokhuluma nabo.

Nangabe inkhulumo yakho iyincenye yeluchungechunge nobe iyincenye yeMhlangano Wemsebenti, kuba kuhle kutsi wente setfulo sakho sibe sifisha futsi sivele sicondze endzabeni. Nangabe wetfula inkhulumo yelinyenti, namatsela esikhatsini lesibekelwe setfulo. Inkhulumo yakho ngiyo letawuba nekwatiswa lokubalulekile kulabo labakulalele.

Ngaletinye tikhatsi ungase ukhulume nebantfu labanekungabata nobe labete bungani. Ungakhona njani kubenta bakunake? Stefano, umKhristu wangelikhulu lekucala lochazwa ngekutsi ‘abegcwele umoya waNkulunkulu nekuhlakanipha,’ wamiswa ngenkhani embikweNkantolo YemaJuda. Ngesikhatsi alapho wabusekela ngalokucacile buKhristu. Wasebentisa setfulo lesinjani? Wakhuluma ngendlela lekhombisa inhlonipho futsi wakhuluma ngalokutsite lebebavumelana ngako. Watsi: “Banaketfu nani bobabe, ngilaleleni. Nkulunkulu wenkhatimulo wabonakala kukhokho wetfu Abrahama.” (Imis. 6:3; 7:2) Ngesikhatsi asembikwenkantolo yase-Ariyophagusi e-Athene, umphostoli Pawula wenta setfulo sakhe savumelana nebantfu labekhuluma nabo, watsi: “Bantfu base-Athene, ngiyabona kutsi kuto tonkhe tintfo nitinikele kakhulu ekukhonteni bonkulunkulu kwendlula labanye bantfu.” (Imis. 17:22) Ngenca yaletetfulo letiphumelelako, omabili lamacembu aba nesifiso sekuchubeka alalele.

Nawusemsebentini wekushumayela kufanele wente bantfu bakunake. Nangabe bewungakalindzelwa kutsi utawufika, umnikati welikhaya kungenteka umkhandze amatasatasa ngaletinye tintfo. Kuletinye tincenye temhlaba, bantfu labafika ekhaya bangakalindzelwa kudzingeka kutsi bavele basho ngekushesha kutsi bete ngani. Kuletinye tindzawo, emasiko akhona adzinga kutsi wente tintfo letitsite ngembikwekutsi usho kutsi ute ngani.​—Luk. 10:5.

Kunobe ngusiphi simo, kukhombisa bungani lobusuka enhlitiyweni kungenta bantfu bakhululeke kucoca nawe. Esikhatsini lesinyenti kuyasita kucala ngentfo letsite loyo muntfu lasuke acabanga ngayo. Ungancuma njani kutsi yini longayisebentisa? Mhlawumbe nje nawufika kuye kukhona labekakwenta. Kungenteka abelima, alungisa libala nobe imoto, apheka, awasha, nobe anakekela bantfwana. Kukhona yini labekubuka, mhlawumbe liphephandzaba nobe lokutsite lokwenteka emgwacweni? Tikhona yini tintfo letikhombisa kutsi utsandza kudweba, imidlalo, umculo, kuvakasha, bongcondvomshini, nobe lokunye? Bantfu bavame kukhatsateka ngetintfo labasandza kutiva emsakatweni nobe ku-TV. Kubuta umbuto nobe kusho lokutsite lokumayelana naleto tindzaba kungenta kutsi nicoce kamnandzi.

Ngesikhatsi Jesu akhuluma nemfati waseSamariya emtfonjeni lowawusedvute neSikhari, wabeka sibonelo lesihamba embili sendlela yekucoca nemuntfu ngenjongo yekuniketa bufakazi.​—Joh. 4:5-26.

Kudzingeka usilungiselele kahle setfulo sakho, ikakhulukati nangabe libandla lakini liyisebenta njalo insimu yalo. Ngaphandle kwaloko, ungase ungakhoni kufakaza kubantfu.

Shano Sihloko Sakho. Ngalokuvamile ebandleni lebuKhristu, sihlalo nobe umzalwane locedza kwetfula inkhulumo utawukusho sihloko senkhulumo yakho bese uyakwetfula. Nobe kunjalo, kungazuzisa kutsi ubakhumbute labo lokhuluma nabo ngesihloko sakho njengobe usho emavi esetfulo. Lesihloko ungasisho njengobe sinjalo, kodvwa akudzingeki kutsi wente njalo ngaso sonkhe sikhatsi. Kunobe nguyiphi indlela loyisebentisako, sihloko sakho kufanele sivele njengobe uchubeka nenkhulumo. Esetfulweni, kufanele wente sihloko sigcame.

Ngesikhatsi atfuma bafundzi bakhe kutsi bayoshumayela, Jesu wakusho ngalokucacile loko lobekufanele bakhulume ngako. Watsi: “Njengobe nihamba, niboshumayela nitsi: ‘UMbuso welizulu sewusondzele.’” (Mat. 10:7) Mayelana nesikhatsi lesiphila kuso, Jesu watsi: “Letindzaba letimnandzi teMbuso tiyawushunyayelwa.” (Mat. 24:14) Sikhutsatwa kutsi ‘sishumayele livi,’ lokusho kutsi sinamatsele kuloko lokushiwo liBhayibheli nasishumayela. (2 Thim. 4:2) Kodvwa-ke ngembikwekutsi uvule liBhayibheli nobe ukhulume ngeMbuso, esikhatsini lesinyenti kudzingeka kutsi ucale uvete lokutsite lokukhatsata bantfu ngaleso sikhatsi. Ungase ukhulume ngebugebengu, kusweleka kwemsebenti, kungalungi, timphi, indlela yekusita bantfu labasha, kugula, nobe kufa. Loko loshumayela ngako kuyakha, ngako ungakhulumi sikhatsi lesidze ngetintfo letimbi. Yetama kutsi nanikhuluma nicoce ngeliVi laNkulunkulu kanye nelitsemba leMbuso wakhe.

Khombisa Kutsi Kungani Sihloko Sakho Sibalulekile Kulabo Lokhuluma Nabo. Nangabe utawube ukhuluma nelibandla, ungaciniseka kutsi labo lokhuluma nabo basuke bafuna kukuva loko lokhuluma ngako. Kodvwa batawulalela ngendlela umuntfu lalalela ngayo yini nakafundza ngalokutsite lokumtsintsako? Batawulalela ngesizatfu sekutsi bayabona kutsi loko lokhuluma ngako kuhambelana nesimo sabo yini, nangesizatfu sekutsi ubenta babe nesifiso sekwenta lokutsite ngako? Loku kutawukwenteka nangabe ucabangisise kahle ngalabo lotawube ukhuluma nabo nawusalungiselela inkhulumo yakho, kutsi ngutiphi timo labakuto, tintfo letibakhatsatako kanye nesimo sabo sengcondvo. Nangabe ukwentile loko, kuvete esetfulweni sakho.

Ngisho nobe wetfula inkhulumo ebandleni nobe ufakaza kumuntfu lotsite, indlela lencono yekwenta umuntfu abe nelilukuluku lekulalela indzaba lokhuluma ngayo kutsi naye umfake kuleyondzaba. Khombisa kutsi tinkinga tabo, tidzingo labanato, nobe imibuto labanayo ihlobene njani nendzaba lokhuluma ngayo. Nawukwenta kucace kutsi ngeke ukhulume ngetintfo labatatiko, kodvwa utawucoca ngemininingwane letsite yaleyo ndzaba, batakulalelisisa. Kuze ukhone kukwenta loko, kufanele ulungiselele kahle.

Indlela Losetfula Ngayo. Loko lokushoko esetfulweni sakho kubaluleke kakhulu, kodvwa indlela lokusho ngayo nayo ingabenta bantfu kutsi babe nelilukuluku lekulalela. Ngako-ke nawulungiselela, ungacabangi kuphela ngaloko lotawukusho kodvwa cabanga nangendlela lotawukusho ngayo.

Kusebentisa emagama lafanele kubalulekile ekufezeni umgomo wakho, ngako-ke kungaba lusito kuyilungiselela kahle imisho yekucala lemibili nobe lemitsatfu. Esikhatsini lesinyenti kuhle kusebentisa imisho lemifisha futsi lemelula. Nangabe utawetfula inkhulumo ebandleni, ungase uyibhale phansi eluhlakeni lwakho leyo misho nobe uyibambe ngenhloko kuze emavi akho esetfulo abe nemandla ngendlela lefanele. Kwenta setfulo lesiphumelelako ube ungakajaki kungakusita kutsi ukhululeke kuyo yonkhe inkhulumo yakho.

Kufanele Usilungiselele Nini? Kunemibono leyehlukahlukene kulendzaba. Letinye tikhulumi letinalokuhlangenwe nako titsi nawulungiselela inkhulumo kufanele ucale ngesetfulo. Labanye bantfu labafundze kukhuluma embikwelinyenti batsi setfulo kufanele usilungiselele nasewuyicedze yonkhe inkhulumo yakho.

Ngembikwekulungiselela loko lotawukusho esetfulweni, kufanele wati kutsi sitsini sihloko sakho kanye nekutsi ngumaphi emaphuzu layinhloko lofuna kuwachaza. Kodvwa kutsiwani nangabe ulungiselela inkhulumo leseluhlakeni? Ngemuva kwekufundza lolohlaka, futsi sewucabangile kutsi utawutsini esetfulweni, kute lokubi ngekutsi usibhale phansi. Khumbula nekutsi kuze setfulo sakho sibe yimphumelelo kufanele ucabange ngalabo labatawube bakulalele kanye nangekwatiswa lokuseluhlakeni lwakho.