“Nyalo Sengiyakutsandza Kushumayela!”

INJABULO YAMI IYAPHELA

Lokubuhlungu kutsi ngesikhatsi ngingena eminyakeni yekutfomba, buhlobo bami naJehova bacala kuba butsakatsaka. Lebengifundza nabo esikolweni bebabonakala banenkhululeko lenyenti, futsi nami bengifuna kukhululeka njengabo. Ngeva shengatsi imitsetfo yebatali bami netimiso tebuKhristu bekucindzetela, futsi ngacabanga kutsi kukhonta Jehova kungumsebenti lomatima. Nanobe bengikholwa kutsi Jehova ukhona, kodvwa bengiva shengatsi angikasondzelani naye.

Angizange ngiyekele kushumayela, kodvwa besengicitsa sikhatsi lesincane. Bengingalungiseleli nangiyoshumayela, ngako bengikutfola kumatima kucala incociswano nebantfu nobe kuchubeka nayo. Ngenca yaloko, bengite bantfu lebengibuyela kubo nobe lebengifundza nabo liBhayibheli, futsi bengingasakujabuleli kushumayela, loko kwenta kutsi ngingasakutsandzi. Bengitibuta, ‘Bantfu bakhona njani kuwenta lomsebenti liviki ngeliviki, inyanga ngenyanga?’

Ngesikhatsi ngineminyaka lengu-17, besengifuna inkhululeko. Ngako ngapakisha tikhwama tami, ngahamba ekhaya ngayohlala e-Australia. Batali bami beva buhlungu nabangibona ngihamba. Bebakhatsatekile, kepha bebacabanga kutsi ngitawuchubeka ngikhonta Jehova.

E-Australia, besengenta lokuncane kakhulu emsebentini waJehova. Bengihle ngingayi emihlanganweni. Ngacala kutihlanganisa nalabanye labasebasha lebebafana nami, bahle baya esifundvweni kodvwa ngelilanga lelilandzelako baye kuyonatsa tjwala futsi bajayive ema-nightclub. Nangicabanga ngemphilo lebengiyiphila ngaleso sikhatsi, ngiyabona kutsi bengisecinisweni kodvwa ngesikhatsi lesifanako ngiseveni, kepha kute lapho bengitfola khona injabulo mbamba.

SIFUNDVO LEBENGINGAKASILINDZELI KEPHA LEBESIBALULEKILE

Ngemuva kweminyaka lemibili, ngahlangana nalomunye dzadze lowangenta ngacabanga ngemphilo lebengiyiphila. Bengihlala kulenye indlu nabodzadze labasihlanu labangakashadi, futsi samema umbonisi wesigodzi kanye nemkakhe Tamara, kutsi batohlala natsi liviki. Nangabe indvodza yakhe imatasatasa ngetintfo tasebandleni, Tamara bekacitsa sikhatsi natsi futsi sihleke kanye kanye. Bengikutsandza loko. Bekalunge kakhulu futsi angeneka. Ngajabula kakhulu kubona kutsi nanobe bekanebuhlobo lobuhle naJehova kepha bekumnandzi kucitsa sikhatsi naye.

Tamara bekanemdlandla. Kutsandza kwakhe liciniso kanye nekushumayela bekwenta kutsi nawe ukutsandze. Bekakujabulela kunika Jehova lokuncono kakhulu, kodvwa mine bengingajabuli ngobe benginika Jehova lokuncane kakhulu. Buntfu bakhe lobuhle kanye nenjabulo bekanayo kwakutsintsa kakhulu kuphila kwami. Sibonelo sakhe sangenta ngacabanga ngeliciniso lelibalulekile lelisemiBhalweni, lelitsi: Jehova ufuna kutsi sonkhe simkhonte ‘sijabulile’ futsi ‘simemeta sitfokotile.’—Hla. 100:2.

LOKWANGISITA KUTSI NGIPHINDZE NGIKUTSANDZE KUSHUMAYELA

Nami bengifuna kujabula njengaTamara, kodvwa kuze ngijabule bekudzingeka ngente lushintjo ekuphileni kwami. Kwangitsatsa sikhatsi, kepha ngacala kwenta lushintjo kancane kancane. Ngacala kulungiselela nangiyoshumayela futsi ngaletinye tikhatsi bengiba lihlahlandlela lelisitako. Loko kwangisita kutsi ngingasabi nemahloni futsi ngibe nesibindzi. Ngenca yekutsi besengilisebentisa kakhulu liBhayibheli nangishumayela, bese ngikujabulela. Ngekushesha, besengilihlahlandlela lelisitako lelichubekako.

Ngacala kusondzelana nebazalwane nabodzadze bebudzala lobehlukene lebebentela Jehova lokunyenti futsi bakujabulela kumkhonta. Sibonelo sabo sangisita ngacabanga ngetintfo lebetita kucala ekuphileni kwami, futsi ngacala kufundza liBhayibheli onkhe malanga. Ngacala kuwujabulela kakhulu umsebenti wekushumayela futsi ekugcineni ngaba lihlahlandlela lelivamile. Ngemuva kweminyaka leminyenti, ngaphindze ngativa ngijabulile futsi ngisekhaya nangiseHholweni leMbuso.

NGATFOLA LIHLAHLANDLELA LEBENGITAWUHLALE NGISHUMAYELA NALO

Ngemuva kwemnyaka, ngahlangana na-Alex, lebekanemusa, amtsandza Jehova kanye nemsebenti wekushumayela. Bekayinceku lesebentako, futsi besekabe lihlahlandlela iminyaka lesitfupha. Alex bekasebente sikhatsi lesitsite eMalawi, asita lapho kunesidzingo lesikhulu khona sebamemeteli. Nakalapho wacitsa sikhatsi netitfunywa telivangeli letaba sibonelo lesihle kuye, futsi tamkhutsata kutsi kukhonta Jehova kute kucala ekuphileni kwakhe.

Nga-2003, mine na-Alex sashada, futsi solo siyachubeka sisemsebentini wasikhatsi sonkhe. Sitfole tifundvo letinyenti letinhle, futsi Jehova usibusise kakhulu.

JEHOVA WACHUBEKA ASIBUSISA

Nga-2009, sacelwa kutsi siyoba titfunywa telivangeli eTimor-Leste, lokulive lelincane lelisetichingini tase-Indonesia. Samangala, sajabula, ngesikhatsi lesifanako sesaba. Ngemuva kwetinyanga letisihlanu, sefika eDili, lokuyinhlokodolobha yalelive.

Impilo ekhaya letfu lelisha beyehlukile kunaleyo besiyiphila ngaphambili. Kwadzingeka kutsi setayele lisiko lelisha, lulwimi, kudla kanye nendlela yakhona yekuphila. Nasishumayela, besivame kubona bantfu labaphuye kakhulu, labafundze kancane nobe labangakafundzi sanhlobo nalabacindzetelekile. Besibona labanyenti labalimele emtimbeni nobe emoyeni ngenca yetimphi nebudlova.a

Bekumnandzi kushumayela kulendzawo! Sibonelo nje, ngalelinye lilanga ngahlangana nalenye intfombatane lebeyilusizi, lokutsiwa nguMaria, futsi beyineminyaka lengu-13.b Beyishonelwe ngumake wayo eminyakeni lembalwa leyendlulile futsi beyingavami kumbona babe wayo. Njengalabanye bantfwana labangangaye, Maria bekangati kutsi ufunani ekuphileni. Ngikhumbula ngalelinye lilanga akhala, angitfululela sifuba. Kodvwa bengingamuva kutsi utsini ngobe bengisengakalwati kahle lolulwimi. Ngathantaza ngacela Jehova kutsi angisite, futsi ngabese ngicala kumfundzela imibhalo letamdvudvuta. Ngemuva kweminyaka lembalwa leyalandzela, ngalibona liciniso lishintja buntfu baMaria, indlela labukeka ngayo, nako konkhe nje kuphila kwakhe. Wabhajatiswa futsi nyalo sewunebantfu labafundzisa liBhayibheli. Lamuhla, Maria unemndeni lomkhulu wetikhonti taJehova futsi uyeva kutsi uyatsandvwa.

Jehova uyawubusisa umsebenti wekushumayela eTimor-Leste. Banyenti bamemeteli lababhajatisiwe kuleminyaka lengu-10 leyendlulile, labanye bangemahlahlandlela, tinceku letisebentako nobe labadzala belibandla. Labanye basebenta ehhovisini lekuhumusha futsi bahumusha tincwadzi letisekelwe eBhayibhelini ngetilwimi tendzawo. Ngijabule kakhulu kubeva bahlabela emihlanganweni yelibandla, kubona buso babo lobumoyitelako nekubabona baba bangani baJehova.

LENA YIMPHILO LEMNANDZI KAKHULU

Imphilo lebesiyiphila eTimor-Leste beyehluke kakhulu kunalebesiyiphila e-Australia, kodvwa beyingijabulisa kakhulu. Ngaletinye tikhatsi besiminyetelana nebantfu ebhasini lencane kanye netimfishi letonyisiwe netibhidvo letitsengiswa emakethe. Ngaletinye tikhatsi, besichuba tifundvo teliBhayibheli etindlini letishisako, letingcolile futsi letigijima tinkhukhu. Kepha ngetulu kwaletinkinga, bengivame kucabanga ngitsi, ‘Loku kuyangijabulisa!’

Nangibuka emuva, ngiyajabula ngekutsi batali bami benta konkhe lokusemandleni abo kuze bangifundzise ngetindlela taJehova futsi bangisekele ngisho nangesikhatsi lesimatima sekutfomba lebengibhekene naso. Emavi lakuTaga 22:6 ngiwabonile aliciniso ekuphileni kwami. Make nababe bayatigcabha ngami nanga-Alex; bayajabula kusibona sisetjentiswa nguJehova. Kusukela nga-2016 besisolo senta umsebenti wekujikeleta ensimini yeligatja lase-Australasia.

Kumatima kucabanga kutsi ngake ngangawujabuleli umsebenti wekushumayela. Nyalo sengiyakutsandza kushumayela! Ngibonile kutsi ngisho nobe kungentekani ekuphileni, injabulo sibili sitayitfola ngekukhonta Nkulunkulu ngenhlitiyo yetfu yonkhe. Leminyaka lengu-18 leyendlulile sikhonta Jehova sina-Alex, bekuyiminyaka lemnandzi kakhulu ekuphileni kwami. Nyalo sengiyabona kutsi aliciniso kangakanani emavi lashiwo ngumhlabeleli Davide kuJehova nakatsi: “Batawujabula bonkhe labakhosela kuwe; Batawuhlale bamemeta ngenjabulo.  . . Futsi labo labatsandza libito lakho batawujabula ngawe.”—Hla. 5:11.