INDLELA YEKUNCAMULA UMJIKELETO WENZONDO

4 | Ncoba Inzondo Ngelusito LwaNkulunkulu

Lokufundziswa LiBhayibheli:

“Titselo temoya nguleti: Lutsandvo, yinjabulo, kuthula, kubeketela, ngumusa, buhle, kukholwa, ngumoya lophansi nekutibamba.”—KUBASEGALATHIYA 5:22, 23.

Lokuchazwa NgulomBhalo:

Singayincoba inzondo ngelusito loluvela kuNkulunkulu. Umoya wakhe longcwele ungasisita sibe nebuntfu lebesingeke sibe nabo ngaphandle kwawo. Ngako kunekwetsembela emandleni etfu kuze sicedze inzondo, senta kahle ngekwetsembela elusitweni loluvela kuNkulunkulu. Nasenta njalo, sitawutiva njengemphostoli Pawula lowabhala watsi: “Nginemandla ekwenta tonkhe tintfo ngenca yaloyo longipha emandla.” (KubaseFiliphi 4:13) Ecinisweni, sitawukhona nekutsi: ‘Ngisitwa nguJehova.’—Tihlabelelo 121:2.

Loko Longakwenta:

“Jehova ungente ngagucuka, ngasuka ekubeni ngumuntfu lonebudlova ngaba nekuthula.”—WALDO

Thantaza kuJehova ngalokusuka enhlitiyweni umcele akuphe umoya wakhe longcwele. (Lukha 11:13) Mcele akusite ube nebuntfu lobuhle. Fundza loko liBhayibheli lelikushoko ngebuntfu lobungacedza inzondo, njengelutsandvo, kuthula, kubeketela kanye nekutibamba. Bese ufuna tindlela tekukhombisa lobuntfu ekuphileni kwakho futsi ucitse sikhatsi nebantfu labetama kuba nebuntfu lobufanako. Bantfu labanjalo bangasikhutsata “elutsandvweni nasemisebentini lemihle.”—KumaHebheru 10:24.

Lokwenteke Ekuphileni Kwebantfu—WALDO

Wancoba Inzondo Lehambisana Nebudlova

Waldo wakhula kabuhlungu futsi loko kwamenta waba nenzondo. Utsi: “Bengihlale ngilwa emgwacweni nebantfu labatsengisa tidzakamiva . . . Ngalelinye lilanga, licembu letitsa latsenga umuntfu lotsite kutsi angibulale, kepha ngakwati kubaleka nginelinceba lekugwazwa kuphela.”

Waldo akazange ajabule ngesikhatsi umkakhe acala kutadisha liBhayibheli naBoFakazi BaJehova. “Bengibatondza boFakazi, futsi bengihlale ngibetfuka. Kodvwa ngaso sonkhe sikhatsi bebaba nemusa,” kusho Waldo.

Ngekuhamba kwesikhatsi, naWaldo wacala kutadisha liBhayibheli. Utsi: “Bekusematima kusebentisa loko lebengikufundza. Ngangiciniseka ngekutsi ngeke ngize ngikwati kulawula lulaka lwami.” Nobe kunjalo, kunalokutsite lakufundza eBhayibhelini lokwashintja indlela lebekacabanga ngayo.

Waldo uyachaza: “Ngalelinye lilanga, Alejandro, labengifundzela liBhayibheli watsi angifundze incwadzi yaKubaseGalathiya 5:22, 23. . . Alejandro wangichazela kutsi kuze ngibe naletitselo, bengingeke ngikwati kukwenta ngemandla ami, kodvwa bengitawusitwa ngumoya longcwele waNkulunkulu. Loku kwawushintja ngalokuphelele umbono wami!”

Ngekwetsembela elusitweni loluvela kuNkulunkulu, Waldo ukhonile kuncoba inzondo ekuphileni kwakhe. Utsi: “Tihlobo tami kanye nebangani bami bakadzeni abayikholwa indlela lesengishintje ngayo.” Uchubeka atsi: “Jehova ungente ngagucuka, ngasuka ekubeni ngumuntfu lonebudlova ngaba nekuthula.”