Bewati Yini?
Yini leyenta liBhayibheli liphindze intfo yinye?
BABHALI beliBhayibheli bebahle basebentisa emagama lafanako nabaphindza intfo yinye. Cabanga nganati tizatfu letintsatfu lokungenteka betibenta bente njalo:
Sikhatsi lelabhalwa ngaso. Ka-Israyeli, bantfu labanyenti bebete emakhophi eMtsetfo. Labanyenti bebawuva ngesikhatsi lesive sihlangene ndzawonye ethendeni lekukhontela. (Dut. 31:10-12) Kungenteka bekuba khona lokubaphatamisako njengobe baselalele futsi beme ema-awa lamanyenti emkhatsini webantfu labanyenti. (Neh. 8:2, 3, 7) Kuleso sikhatsi, kuphindza emagama labalulekile bekwenta kutsi kube melula ngalabantfu kukhumbula lemibhalo futsi bayisebentise. Kuphindza emagama latsite bekubasita kutsi bawukhumbule kahle loMtsetfo lebebanikwe wona nguJehova.—Lev. 18:4-22; Dut. 5:1.
Indlela yekubhala. Letinye tincenye teliBhayibheli titingoma. Sibonelo saloko yincwadzi yeTihlabelelo, Ingoma Yetingoma kanye neSililo. Ngalesinye sikhatsi tingoma betinemagama laphindvwaphindvwako. Loku bekugcizelela loko lebekukhulunywa ngako kuleyo ngoma futsi bekusita labo labalalele kutsi bawabambe ngenhloko emagama ayo. Sibonelo nje, naka nawa emavi latfolakala kuTihlabelelo 115:9-11: “Awu Israyeli, yetsembela kuJehova—Ungumsiti wenu nesihlangu senu. Nine situkulwane sa-Aroni, yetsembelani kuJehova—Ungumsiti wenu nesihlangu senu. Nine lenesaba Jehova, yetsembelani kuJehova—Ungumsiti wenu nesihlangu senu.” Kuphindzaphindza lamagama bekungasita labahlabelako kutsi bawagcine etingcondvweni tabo nasetinhlitiyweni tabo.
Kuze kugcizelelwe tindzaba letibalulekile. Babhali beliBhayibheli bebahle baphindzaphindza emagama labalulekile. Sibonelo nje, ngesikhatsi Jehova atjela ema-Israyeli kutsi angayidli ingati, watjela Mosi kutsi aphindzaphindze sizatfu saloko tikhatsi letinyenti. Nkulunkulu bekafuna kugcizelela kutsi kuphila kusengatini, lokusho kutsi ingati imelela kuphila. (Lev. 17:11, 14) Ngesikhatsi baphostoli nemadvodza lamadzala eJerusalema babhala ngaloko emaKhristu lokufanele angakwenti kuze ajabulise Nkulunkulu, baphindze bagcizelela kubaluleka kwekutsi ingasetjentiswa ingati.—Imis. 15:20, 29.
Nanobe liBhayibheli litiphindzaphindza, loko akusho kutsi Jehova ufuna sikwente umkhuba kuphindzaphindza emagama lafanako laseBhayibhelini. Sibonelo nje, Jesu watsi: “Nawuthantaza, ungaphindzaphindzi intfo yinye.” (Mat. 6:7) Wabese ukhuluma ngetintfo letikahle lesingatithantazela letivumelana nentsandvo yaNkulunkulu. (Mat. 6:9-13) Ngako nanobe sikugwema kuphindzaphindza emagama lafanako nasithantaza, sikhululekile kusho tintfo letifanako ngalokuphindzaphindziwe.—Mat. 7:7-11.
Ngako kunetizatfu letivakalako letenta liVi laNkulunkulu liphindzaphindze emagama lafanako. Lena ngulenye yetindlela uMfundzisi wetfu Lomkhulu layisebentisako nakasifundzisa kute sizuze.—Isa. 48:17, 18.