Jehova Wasisita ‘Sachakaza Njengembhali’ Nobe Ngukuphi Labesihlanyelwe Khona

BakaKassholm baya eSikolweni saseGileyadi nga-1979 futsi kuyo yonkhe leminyaka babelwe e-Iran, eMauritius, eMyanmar, eTanzania, e-Uganda naseZaire. KuseGileyadi lapho khona thishela wabo, lokunguJack Redford, abaniketa seluleko lesabasita ngaso sonkhe sikhatsi nabatfola sabelo lesisha, lokuyintfo lebeyenteka tikhatsi letinyenti. Ase basicocele.

Mats, sicela usicocele kutsi walitfola njani liciniso.

Mats: Babe bekahlala ePoland ngesikhatsi seMphi Yelive Yesibili, futsi bekabone kutentisa lokunyenti eSontfweni lemaKatolika. Nanobe kunjalo, bekavame kutsi: “Kufutile kube ikhona inkholo yeliciniso!” Ngekuhamba kwesikhatsi, ngatitfolela kutsi loko bekuliciniso. Ngatsenga tincwadzi letinyenti lebetisebentile. Lenye yato beyiluhlata sasibhakabhaka, inesihloko lesitsi The Truth That Leads to Eternal Life. Lesihloko sangidvonsa, futsi lencwadzi ngayifundza ebusuku ngayicedza ngalelilanga lengayitsenga ngalo. Ekuseni, besengati kutsi ngilitfolile liciniso!

Kusukela nga-April 1972, ngafundza tincwadzi letinyenti taBoFakazi BaJehova futsi ngatfola timphendvulo temibuto lebenginayo ngeliBhayibheli. Ngativa njengemtsengisi lokukhulunywa ngaye emfanekisweni waJesu lowatsi ngemuva kwekutfola lipharele linye lelidule kakhulu, watsengisa konkhe bekanako kuze alitsenge. Njengobe bengihlele kuya enyuvesi futsi ngibe ngudokotela, “ngakutsengisa” loko kuze ngitotsenga “lelipharele,” lokuliciniso lebesengilitfolile. (Mat. 13:45, 46) Ngabhajatiswa ngaDecember 10, 1972.

Kungakapheli umnyaka, batali bami nabhuti wami lomncane nabo balemukela liciniso futsi babhajatiswa. NgaJuly 1973, ngacala kwenta umsebenti wasikhatsi sonkhe. Emkhatsini wemahlahlandlela lebekakhutsele ebandleni letfu, bekunadzadze lomuhle lotsandza Nkulunkulu, ligama lakhe kungu-Ann-Catrin. Satsandzana futsi sashada nga-1975, sacitsa iminyaka lemine edolobheni lelihle lebelinebantfu labafuna kwati Nkulunkulu, lokutsiwa yiStrömsund, eSweden.

Ann-Catrin: Babe wafundza liciniso nasekayocedza enyuvesi eStockholm. Benginetinyanga letintsatfu budzala ngaleso sikhatsi, kodvwa bekahamba nami emihlanganweni yelibandla nasemsebentini wekushumayela. Make bekangakutsandzi loko futsi wetama kukhombisa kutsi boFakazi bebanemanga. Kodvwa wehluleka, ngako ngekuhamba kwesikhatsi naye wabhajatiswa. Ngabhajatiswa nangineminyaka lengu-13, futsi ngacala kuba lihlahlandlela ngineminyaka lengu-16. Ngemuva kwekuba se-Umeå, lapho khona bekunesidzingo lesikhulu sebamemeteli, ngaba lihlahlandlela lelikhetsekile.

Ngemuva kwekutsi sishade naMats, sajabulela kusita bantfu labanyenti kutsi bafundze liciniso. Lomunye wabo bekunguMaivor, lebekayintfombatane leseminyakeni yekutfomba leyashiya temidlalo futsi yaba lihlahlandlela kanye nasisi wami lomncane. Baya eGileyadi nga-1984 futsi batitfunywa telivangeli e-Ecuador.

Etabelweni tenu letinyenti nititfunywa telivangeli, nasilalela njani seluleko sekutsi “nichakaze njengembhali”?

Mats: Satfola tabelo letinyenti letinsha. Kodvwa setama kwenta konkhe lesingakwenta kuze silingise sibonelo saJesu, ikakhulukati nakutiwa endzabeni yekutfobeka. (Khol. 2:6, 7) Sibonelo nje, kunekutsi silindzele kutsi boFakazi bendzawo bente tintfo ngendlela yetfu, setama kufundza kutsi yini lebenta bente tintfo ngendlela letsite. Besifuna kuyicondza indlela labacabanga ngayo nelisiko labo. Njengobe besichubeka setama kulingisa Jesu, besiva ngatsi ‘sisihlahla lesihlanyelwe ngasemfuleni’ futsi besichakaza nobe ngukuphi lasabelwe khona.​—Hla. 1:2, 3.

Ann-Catrin: Kuze sihlahla sikhule nasisuswe labesihlanyelwe khona sahlanyelwa kulenye indzawo, sidzinga lilanga. Jehova bekahlale afana “nelilanga” kitsi. (Hla. 84:11) Wasenta sativa sifutfumele asebentisa banaketfu nabodzadze labanelutsandvo. Sibonelo nje, ebandleni lelincane lebesikulo eTehran, e-Iran, bazalwane nabodzadze bebanemoya wekungenisa tihambi futsi banetandla letivulekile, lebekuyintfo levamile ngebantfu lokukhulunywa ngabo eBhayibhelini. Besingakutsandza kuchubeka sise-Iran, kodvwa ngaJuly 1980, BoFakazi BaJehova bavalwa ngalokusemtsetfweni kulelive, futsi satjelwa kutsi siphume siphele kungakapheli ema-awa langu-48. Sabelwa eZaire (nyalo lesekutsiwa yiCongo) e-Africa.

Nangiva kwekucala kutsi sabelwe e-Africa, ngakhala. Bengive kutsi e-Africa kunetinyoka netifo futsi loko kwangesabisa. Kodvwa labanye bangani betfu lababili lebebake baba sesabelweni e-Africa iminyaka leminyenti batsi: “Awukase waya e-Africa! Kuzame futsi ubone, i-Africa ubese uyayitsandza.” Vele ngayitsandza! Bazalwane nabodzadze banelutsandvo futsi banebungani. Ecinisweni, nasekufanele sihambe e-Zaire ngemuva kweminyaka lengu-6 ngenca yekuvinjelwa, ngamoyitela nangibona kutsi besekungimi nyalo lebekathantaza kuJehova atsi: “Sicela kungahambi e-Africa.”

Ngutiphi tintfo lenitijabulele kuyo yonkhe leminyaka?

Mats: Ngijabulele kwakha bungani netitfunywa telivangeli takulamanye emave futsi letikhuliswe ngetindlela letingafani. Ngetulu kwaloko, kuletinye tabelo ngijabule kakhulu ngenca yekudadisha liBhayibheli nebantfu labanyenti, ngalesinye sikhatsi ngamunye wetfu bekafundza nebantfu labangu-20! Ngeke ngilukhohlwe lutsandvo lwebazalwane nabodzadze base-Africa kanye nemoya wabo wekungenisa tihambi. Nasivakashele emabandla eTanzania, bazalwane nabodzadze labanyenti basiphatsa ngetandla letifutfumele, basipha ‘lokungetulu kwaloko bebanako’ nasipake ikhumbi lebesilala kuyo emakhaya abo. (2 Khor. 8:3) Sikhatsi lebesisitsandza kakhulu bekusikhatsi lebesisibita ngekutsi sikhatsi sekucoca tindzaba. Bekuba sikhatsi lapho khona njalo nakuphela lilanga, mine na-Ann-Catrin besihlala phansi sicoce ngetintfo letentekile ngalelo langa futsi sibonge Jehova ngekuba natsi.

Ann-Catrin: Mine lokungijabulise kakhulu kuhlala nebazalwane nabodzadze labavela emhlabeni wonkhe. Sifundze tilwimi letinsha, letifaka ekhatsi, siFarsi, siFulentji, siLuganda, nesiSwahili​—ngesikhatsi lesifanako sibe sifundza emasiko lehlukahlukene nalajabulisako. Sente bafundzi labasha, satfola bangani sibili, futsi sasebenta nabo “lihlombe ngelihlombe” emsebentini waJehova.​—Zef. 3:9.

Siphindze sabona indalo yaJehova lenhle leyehlukahlukene. Sonkhe sikhatsi nasitfola sabelo lesisha, besiva shengatsi sihamba naJehova futsi yena uyasicondzisa. Usifundzise tintfo lebesingeke sikhone kutifundza sisodvwa.

Ngutiphi tinkinga lenibe nato, futsi nibhekene njani nato?

Mats: Kuleminyaka, sitfole tifo letinyenti, letifaka ekhatsi malaleveva. Ann-Catrin uhlindvwe tikhatsi letimbalwa. Ngetulu kwaloko, besikhatsateka ngebatali betfu lasebakhulile, ngako sibabonga kakhulu bantfwabakitsi lebebahamba embili ekubanakekeleni. Loku bachubeke bakwenta ngesineke, bajabulile nangelutsandvo. (1 Thim. 5:4) Nobe kunjalo, besihle siva buhlungu ngobe besifisa ngatsi besingakhona kubentela lokunyenti batali betfu kunekubasita sikhashane.

Ann-Catrin: Ngesikhatsi siseZaire nga-1983, ngaphatfwa sifo semsheko kamatima. Dokotela watjela Mats watsi: “Kungasi akulelive!” Ngakusasa ekuseni, sagibela indiza lelayisha imitfwalo kuphela, bekungiyo yodvwa lebeyikhona, saya eSweden.

Mats: Besicabanga kutsi sesiphelile sabelo setfu sekuba titfunywa telivangeli, ngako sakhala tinyembeti telusizi. Kodvwa ngalokuphambene naloko lokwashiwo ngulodokotela, Ann-Catrin waphila. Ngemuva kwemnyaka sabuyela eZaire, futsi nyalo saya ebandleni lelincane lesiSwahili eLubumbashi.

Ann-Catrin: Ngesikhatsi siseLubumbashi, ngaphunyelwa sisu. Nanobe bekungekho engcondvweni kutsi sicalise umndeni, kulahlekelwa ngumntfwanetfu kwaba matima kakhulu kimi kukubeketelela. Kodvwa kuleso sikhatsi selusizi, satfola sipho lebesingakasilindzeli kuJehova. Sacalisa tifundvo teliBhayibheli letinyenti kakhulu kunalesake saticalisa. Kungakapheli nemnyaka, libandla lakhula lisuka kubamemeteli labangu-35 laya kulabangu-70, futsi linani lebantfu lababakhona emihlanganweni yelibandla lesuka ku-40 laya ku-220. Besimatasatasa kakhulu emsebentini wekushumayela, futsi sibusiso saJehova sangidvudvuta kakhulu. Nobe kunjalo, sihle sicabanga futsi sikhuluma ngemntfwanetfu. Sisibuke ngalabovu sikhatsi lapho khona Jehova atawelapha tinhlitiyo tetfu ngalokuphelele.

Mats: Sikhona sikhatsi lapho khona Ann-Catrin bekadzinwa kakhulu. Ngesikhatsi lesifanako, kwatfolakala kutsi nginamdlavuza futsi bekudzingeka ngihlindvwe. Kodvwa lamuhla ngiphilile, na-Ann-Catrin uyancenga.

Sibonile kutsi akusitsi sodvwa lesibhekene netinkinga. Ngemuva kwekubulalana kwetinhlanga nga-1994 eRwanda, savakashela banaketfu nabodzadze labanyenti lebebasetinkambu tebakhoseli. Kubona kukholwa kwabo, kucinisela kanye nemoya wabo longapheli wekungenisa tihambi, kwasifundzisa kutsi Jehova unemandla ekusekela bantfu bakhe kunobe nguyiphi inkinga.​—Hla. 55:22.

Ann-Catrin: Lenye inkinga yavela ngesikhatsi siye e-Uganda nga-2007 nakuniketelwa ligatja. Ngemuva kwaloluhlelo, besihamba silicembu lebantfu labangaba ngu-25, kunetitfunywa telivangeli netisebenti taseBethel siya eNairobi, eKenya. Ngaphambi kwekutsi sifike ehhekeni laseKenya, kwachamuka silolana lesaphuma elayinini laso sasishayisa. Umshayeli nebangani betfu labasihlanu bashona khona lapho; lomunye dzadze washonela esibhedlela. Akusho nekutsi siyakulangatelela kuphindze sibabone bangani betfu!​—Jobe 14:13-15.

Ngagcine ngipholile labengilimele khona. Kodvwa mine naMats sisemkhatsini walabo bebakulengoti labahlaselwa kucindzeteleka kakhulu (post-traumatic stress disorder). Lokucindzeteleka bekungihlasela ebusuku, kungivuse kube ngatsi ngimelwa yinhlitiyo. Loko bekwesabisa mbamba. Kuthantaza kuJehova ngalokujulile kanye nendvudvuto lesayitfola kulamanye emavesi etfu lesiwatsandzako kwasisita sakhona kubhekana nalesimo. Ngetulu kwaloko, saya kubodokotela futsi basisita kakhulu. Nyalo sesincono, futsi sicela Jehova kutsi asisite sikhone kudvudvuta labanye lababhekene nesimo lesifana nesetfu.

Nanichaza indlela lenikhone ngayo kubhekana netimo letimatima, nitsite Jehova waniphatsisa “kwemacandza.” Benisho kutsini?

Mats: Leso sisho sesiSwahili lesitsi “Tumebebwa kama mayai mabichi,” nobe “Saphatsiswa kwemacandza.” Njengobe umuntfu acaphelisisa nakaphetse emacandza laluhlata kuze angaphihliki, Jehova wasiphatsa ngemusa futsi wasisekela kuto tonkhe tabelo tetfu. Besisolo sinako lesikudzingako, size sibe nalokungetulu kwaloko besikudzinga. Lenye indlela lesibone ngayo kutsi Jehova uyasitsandza futsi uyasisekela, ngumusa lesikhonjiswe wona Sigungu Lesibusako.

Ann-Catrin: Ngicela kunicocela ngalokunye lokwenteka lokukhombisa kutsi Jehova uyasisekela. Ngalelinye lilanga satfola lucingo lolusitjela kutsi babe wami usesibhedlela eSweden, futsi kwembulwa kuyembheswa. Mats bekasandza kwelulama kumalaleveva. Besite imali yekutsenga emathikithi endiza kuze siye ekhaya, ngako sancuma kutsengisa imoto yetfu. Sabese sitfola tincingo letimbili; lolunye beluvela kulabanye labashadene labeva ngesimo setfu futsi bebafuna kusitsengela lithikithi linye. Lolunye beluvela kulomunye dzadze losakhulile lebekabeke imali ebhokisini lalibhale kutsi “Yaloweswele.” Kungakapheli imizuzu lenganani, Jehova besekasisitile!​—Heb. 13:6.

Nanibuka emuva kuleminyaka lengetulu kwalengu-50 leniyicitse emsebentini wasikhatsi sonkhe, yini leniyifundzile?

Ann-Catrin: Ngifundzile kutsi sitawuba nemandla nangabe ‘singeke sesabe futsi sitawetsembela’ kuJehova. Nangabe setsembela kuJehova, ngandlela tsite kuba ngatsi timphi tetfu timphi takhe. (Isa. 30:15; 2 Khr. 20:15, 17) Nasenta konkhe lokusemandleni etfu emsebentini waJehova kuto tonkhe tabelo lesititfolako, sitfola tibusiso letinyenti kunaleto lebesingatitfola kube asikakwenti loko.

Mats: Sifundvo lesibalulekile lengisifundzile kutsi kufanele ngetsembele kuJehova kuto tonkhe timo futsi ngibone indlela latangisita ngayo. (Hla. 37:5) Akaze wehluleka kusifeza lesetsembiso sakhe. Sisakubona kuba liciniso kwaloko nyalo esabelweni lesikuso laBethel yaseMyanmar.

Siyetsemba kutsi bantfu labasha labanyenti labafuna kumentela lokunyenti Jehova batalubona lutsandvo lolucotfo Jehova lasikhombise lona natsi. Siyaciniseka kutsi batalubona nangabe bavumela Jehova abasite bente lushintjo, futsi bajabule nobe ngabe ngukuphi lababelwe khona.