Tilwane Tiyaya Yini Ezulwini?
Lokushiwo liBhayibheli
LiBhayibheli lifundzisa kutsi kuto tonkhe tidalwa letisemhlabeni, kunebantfu labambalwa kuphela labatawukuya ezulwini. (Sembulo 14:1, 3) Batawubusa njengemakhosi nebaphristi kanye naJesu. (Lukha 22:28-30; Sembulo 5:9, 10) Linyenti lebantfu litawuvuselwa emhlabeni lolipharadisi.—Tihlabelelo 37:11, 29.
LiBhayibheli alikhulumi ngelizulu letilwane—futsi kunesizatfu lesihle saloko. Tilwane atikwati kwenta lokudzingekile kute tifanelekele ‘lubito lwasezulwini.’ (Hebheru 3:1) Loku kufaka ekhatsi kungenisa lwati, kuba nekukholwa, nekulalela imiyalo yaNkulunkulu. (Matewu 19:17; Johane 3:16; 17:3) Bantfu kuphela labadalwa kutsi baphile phakadze.—Genesisi 2:16, 17; 3:22, 23.
Tidalwa tasemhlabeni kudzingeka tivuswe kucala, kuze tiye ezulwini. (1 Khorinte 15:42) Kumbalwa kuvuswa lokukhulunywa ngako eBhayibhelini. (1 Emakhosi 17:17-24; 2 Emakhosi 4:32-37; 13:20, 21; Lukha 7:11-15; 8:41, 42, 49-56; Johane 11:38-44; Imisebenti 9:36-42; 20:7-12) Noma kunjalo, bantfu labavuswa, hhayi tilwane.
Tilwane tinayo yini imiphefumulo?
Chake. LiBhayibheli litsi kokubili bantfu netilwane kuyimiphefumulo. (Umshumayeli 3:19, 20) Nakudalwa umuntfu wekucala, Adamu, akazange anikwe umphefumulo, kodvwa ‘wase uba ngumuntfu [umphefumulo] lophilako.’ (Genesisi 2:7) Umphefumulo wakhiwa tintfo letimbili: “lutfuli lwemhlabatsi” kanye “nemoya wekuphila.”
Imiphefumulo ingafa yini?
Yebo, liBhayibheli lifundzisa kutsi imiphefumulo iyafa. (Levithikhusi 21:11, Hezekeli 18:20) Nakufa, kokubili tilwane nebantfu kubuyela emhlabatsini. (Umshumayeli 3:19, 20) Ngalamanye emagama, akusabibikho.a
Tiyona yini tilwane?
Chake. Kwenta sono kusho kutsi uyakhona kucabanga, kuba nemiva, noma wente lokutsite lokwephula timiso taNkulunkulu. Kuze sone, sidalwa kufanele sikwati kwenta tincumo letimayelana nekutiphatsa, kodvwa tilwane atinalo lelo khono. Tivamise kwenta ngekwemiva yemvelo kuphila kwato konkhe. (2 Phetro 2:12) Ekugcineni kwako konkhe, tiyafa ngisho tingasenti sono.
Kuvumelekile yini kuhlukumeta silwane?
Chake. Nkulunkulu waniketa bantfu ligunya etikwetilwane kodvwa akazange abanike lilungelo lekutihlukumeta. (Genesisi 1:28; Tihlabelelo 8:6-8) Nkulunkulu unendzaba nenhlalakahle yato tonkhe tilwane—ngisho netinyoni letincane. (Jona 4:11; Matewu 10:29) Uyale tikhonti takhe kutsi titiphatse kahle tilwane.—Eksodusi 23:12; Dutheronomi 25:4; Taga 12:10.