Tihlabelelo 46:10​—“Titfobeni Futsi Nati Kutsi NginguNkulunkulu”

“Titfobeni futsi nati kutsi nginguNkulunkulu. Ngitawuphakanyiswa emkhatsini wetive; Ngiphakanyiswe nasemhlabeni.”​—Tihlabelelo 46:10, Lihumusho Lemhlaba Lomusha.

Tisho kutsini Tihlabelelo 46:10?

Nkulunkulu ukhutsata bonkhe bantfu kutsi bamkhonte futsi bavume kutsi nguye lofanelwe kubusa umhlaba wonkhe. Nkulunkulu unemandla lamakhulu futsi lelo liciniso bonkhe labafuna kuphila lokuphakadze lokufanele balivume.​—Sembulo 4:11.

“Titfobeni futsi nati kutsi nginguNkulunkulu.” Emagama esiHebheru lahunyushwe ngekutsi “titfobeni futsi nati kutsi nginguNkulunkulu” asicelo lesivela kuJehovaa Nkulunkulu lesiya kubantfu bato tonkhe tive. Nkulunkulu ucela bantfu kutsi bayekele kumelana naye futsi bavume kutsi nguye lofanelwe kukhontwa.

Sicelo lesifanako sitfolakala kuTihlabelelo 2. Kulesehluko Nkulunkulu wetsembisa kwenta lokutsite kulabo labamelene naye. Ngakulokunye labo labalemukelako ligunya lakhe bakhombisa ngekutsi bafune sicondziso, kuhlakanipha kanye nemandla kuye. Labo “labakhosela kuye,” bayajabula futsi balondzeke ikakhulukati ngetikhatsi letimatima.​—Tihlabelelo 2:9-12.

“Ngitawuphakanyiswa emkhatsini wetive; ngiphakanyiswe nasemhlabeni.” Kadzeni, Jehova Nkulunkulu wadvunyiswa nakasebentisa emandla akhe kuze avikele bantfu bakhe. (Eksodusi 15:1-3) Esikhatsini lesitako, utawudvunyiswa ngelizinga lelisetulu kakhulu lapho wonkhe umuntfu emhlabeni atitfoba egunyeni lakhe futsi amkhonta.​—Tihlabelelo 86:9, 10; Isaya 2:11.

Loko Tihlabelelo 46:10 lokhuluma ngako

Lenye incwadzi ibita Tihlabelelo 46 ngekutsi “yingoma yekudvumisa emandla aNkulunkulu, longumvikeli lomkhulu webantfu bakhe.” Nabahlabela lengoma lekuTihlabelelo 46, bantfu baNkulunkulu bebaveta indlela lebebatsemba ngayo kutsi Jehova angabavikela aphindze abasite. (Tihlabelelo 46:1, 2) Lamavi ayo bekabakhumbuta kutsi Jehova bekahlale anabo.​—Tihlabelelo 46:7, 11.

Kuze bacinise kwetsembela kwabo emandleni aJehova ekubavikela, lengoma beyibakhutsata kutsi bacabange ngetintfo letimangalisako Jehova lebekatentile. (Tihlabelelo 46:8) Sibonelo nje, beyibasita banake emandla akhe ekucedza timphi. (Tihlabelelo 46:9) Njengobe nje ngetikhatsi tekubhalwa kweliBhayibheli Jehova bekacedza timphi ngekutsi avikele bantfu bakhe etiveni letititsa. Nobe kunjalo, liBhayibheli letsembisa kutsi madvutane Nkulunkulu utawuvikela bantfu bakhe ngekucedza timphi emhlabeni wonkhe.​—Isaya 2:4.

Jehova usatisita yini tikhonti takhe lamuhla? Yebo. Ecinisweni, umphostoli Pawula wakhutsata emaKhristu kutsi etsembele kuYe kuze awasite. (KumaHebheru 13:6) Loko Tihlabelelo 46 letikhuluma ngako kucinisa kwetsembela kwetfu emandleni aJehova ekusivikela. Asisita sibone kutsi Nkulunkulu “usiphephelo setfu nemandla etfu.”​—Tihlabelelo 46:1.

Bukela le-video lemfishane kuze ubone loko lokukhulunywa ngako kulencwadzi yeTihlabelelo.