Incwadzi Yekufundzisa NgeliBhayibheli Leyehluke Kakhulu

NgaJanuary 2021 Sigungu Lesibusako samemetela kukhululwa kwencwadzi lensha yekufundzisa ngeliBhayibheli letsi Jabulela Kuphila Kuze Kube Phakadze!a Wena wativa njani nawuva lesimemetelo? Matthew, waseCanada, utsi: “Ngajabula, futsi injabulo yami yakhula nangilalela tinkhulumo futsi ngibukela nema-video lachaza kutsi yentiwe leni lencwadzi nendlela lehlolwe ngayo kutsi iyasebenta yini. Bengilangatelela kuyibona nekucala kuyisebentisa.”

Lencwadzi Jabulela Kuphila Kuze Kube Phakadze! isisita sisebentise indlela lensha yekufundzisa bantfu liBhayibheli. Nobe kunjalo, akusiko loko kuphela lokwenta lencwadzi yehluke kuletinye tincwadzi lesike satisebentisa nasifundzisa. Nangabe usebentisa ikhophi lephrintiwe yalencwadzi, kungenteka nawuyitsintsa uyivile kutsi yehlukile kuleletinye tincwadzi lesike satisebentisa. Kuze sitfole kutsi yini lokuyenta yehluke, asesibuke indlela leyentiwe ngayo.

Incwadzi Lensha Leyehlukile Kuletinye

Liphepha lelicinile. Yini leyente kwasetjentiswa liphepha lelicinile? Kungobe lencwadzi Jabulela Kuphila Kuze Kube Phakadze! inetitfombe letimibalabala letingetulu kwa-600, lokutiphindza kangu-10 titfombe letisencwadzini letsi Lingasifundzisani? Emakhasi lamanyenti kulencwadzi lensha anetikhala letite titfombe nobe lokubhalwe kuto, lokungaba yinkinga nangabe leliphepha limelula ngobe kungabonakala titfombe nobe lokubhaliwe lokungemuva kwalelokhasi. Kuze babalekele lenkinga, bazalwane labasebenta ku-International Printing Department (IPD), eWallkill, eNew York, e-U.S.A., bahlole tinhlobo letine temaphepha lasetjentiswako nakuphrintwa tincwadzi tetfu. IKomidi Yekubhala yeSigungu Lesibusako ihlole liphepha ngalinye yase ikhetsa lelicinile kunalawa lamanye. Ngisho nobe leliphepha lidule ngemaphesenti langu-16 kunaleli lelivame kusetjentiswa nakuphrintwa tincwadzi tetfu, loku kwenta labo labadadisha liBhayibheli bakhone kufundza likhasi ngalinye ngaphandle kwekuphazanyiswa titfombe letisekhasini lelingemuva.

I-Cover Leyehlukile. I-cover yalencwadzi lensha yehlukile kunaleyaleletinye tincwadzi ngobe imbonywe ngeli-plastic lelicinile futsi leliyivikelako. Kunekutsi kusetjentiswe li-plastic lelimanyako, kulencwadzi lensha kusetjentiswe li-plastic lelingamanyi, lelingasheshi liguge futsi lelenta titfombe tigcame. Leli-plastic lelingamanyi lenta lencwadzi ingasheshi iguge ngisho seyisetjentiswe sikhatsi lesidze. Nobe kunjalo, leli-plastic lidulile futsi kungadzingeka uyiphindze kangu-5 imali yeli-plastic lelimanyako kuze utfole leli lelingamanyi. Ngako lamanye emagatja asebente ngekubambisana kuze atfole leli-plastic lelingamanyi ngelinani leliphansi.

Kusetjentiswe leni i-cover ledule kangaka? Nakachaza, umzalwane losebenta ne-IPD utsi: “Silindzele kutsi lencwadzi isetjentiswe sikhatsi lesidze, ngako sifuna ihlale isesimeni lesikahle.” Eduardo, losebenta eHhovisini Lekushicilela eBrazil, utsi: “Siyajabula kutsi inhlangano yaJehova isebentise tintfo letisezingeni lelisetulu kuze yente lencwadzi ibe yinhle futsi ihlale sikhatsi lesidze, ngesikhatsi lesifanako ibe iyisebentisa kahle iminikelo.”

Kuphrinta Ngesikhatsi Se-COVID-19

Sacala kuphrinta lencwadzi Jabulela Kuphila Kuze Kube Phakadze! ngaMarch 2021. Loku kwaba yinkinga ngobe kwenteka ngesikhatsi salomkhuhlane. Ngenca yekutsi iBethel beyiku-lockdown, bazalwane labasebenta e-printery bebangeke balutfole lusito lwalabo labasebenta eBethel ngemalanga latsite futsi bangeke bakhone nekucela labanye bazalwane kutsi batokhonta eBethel sikhatsi sonkhe. Ngako letinye tindzawo tekuphrinta betite bantfu labenele labangasita kuto, kantsi letinye tato tavalwa ngenca yemitsetfo yahulumende.

Tancotjwa njani letinkinga? Naseticale kusebenta letindzawo tekuphrinta, labanye bazalwane nabodzadze labakulamanye ematiko aseBethel, babelwa kutsi bayosita kwesikhashana kuletindzawo tekuphrinta. “Kutidzela kwabo kanye nesifiso sabo sekufuna kufundza imisebenti lemisha kwasita ekwenteni umsebenti lebekudzingeka wentiwe,” kusho Joel, losebenta ne-IPD.

Ngisho nobe kube naletinkinga, sesiphrinte emakhophi alencwadzi Jabulela Kuphila Kuze Kube Phakadze! langaba tigidzi. Kuyiphrinta kudzinga tintfo letinyenti letehlukahlukene letifaka ekhatsi ema-printing plate, li-plastic lelingamanyi, liphepha, i-ink kanye nekwekunamatsisela. Etinyangeni tekucala letingu-5 tekuphrinta, kwasetjentiswa imali lengetulu kwa-E34 000 000 ($2.3 million, U.S.) kuze kutsengwe tintfo letatidzingeka nje kuphela. Kuze kongiwe imali, siphrinte kuphela linani letincwadzi letidzingwa ngemabandla.

“Yinhle Kakhulu”

Labo labafundzelwa liBhayibheli kanye nalabo lababafundzisako bativa njani ngalencwadzi lensha? Paul, umzalwane wase-Australia, utsi: “Kumnandzi kakhulu kusebentisa lencwadzi, ingenta ngikujabulele kufundzisa labanye liBhayibheli. Indlela lencwadzi lehlelwe ngayo iyakhanga futsi yenta sicoce. Inekwatiswa lokucacile, imibuto letsintsa inhlitiyo, ema-video, titfombe, ema-chart kanye nemigomo lebekelwe umfundzi. Yinhle kakhulu futsi ingenta ngifune kutfutfukisa indlela lengifundzisa ngayo.”

Lomunye lodadisha liBhayibheli e-United States utsi: “Ngiyitsandza kakhulu lencwadzi lensha. Titfombe letikuyo tingisita ngicondze tifundvo letibalulekile. Ema-video angitsintsa inhlitiyo futsi angikhutsata kutsi ngente lokutsite.” Lomfundzi udadisha liBhayibheli kabili ngeliviki futsi ubakhona kuyo yonkhe imihlangano yelibandla.

Kusenetigidzi temakhophi alencwadzi lokusafanele tiphrintwe ngaletinye tilwimi. Ecinisweni, kuze kube ngulamuhla, Sigungu Lesibusako sinikete imvume yekutsi kushicilelwe lencwadzi ngetilwimi letingu-710, lokusho kutsi kwengeteke tilwimi lengu-340 kuletavunywa encwadzini letsi Lingasifundzisani?

Siyitsatsaphi imali yekubhadala kuphrintwa kwalencwadzi? Siyitsatsa eminikelweni leyentelwa umsebenti wemhlaba wonkhe, leminyenti yayo leyentiwa ku-website letsi donate.jw.org. Sibonga kakhulu ngekwephana kwenu lokusisita siphrinte tincwadzi letisita bantfu badadishe liBhayibheli, bati Jehova futsi bajabulele kuphila “kuze kube phakadze.”—Tihlabelelo 22:26.