Indvodza Lenesibindzi

KWATSI bantfu nabacala kwandza emhlabeni wonkhe, labanyenti babo benta tintfo letimbi njengaKhayini. Kodvwa bekunendvodza yinye lebeyehlukile, ligama layo kwakungu-Enoki. Enoki abeyindvodza lenesibindzi. Bonkhe bantfu labephila nabo bebenta tintfo letimbi kakhulu, kodvwa yena wachubeka akhonta Nkulunkulu.

Uyati yini kutsi kungani bantfu labebaphila ngaleso sikhatsi benta tintfo letinyenti letimbi? Uyakhumbula yini kutsi ngubani lowenta bo-Adamu na-Eva kutsi bangamlaleli Nkulunkulu, badle sitselo abetsite bangasidli? Kwakuyingilosi lembi. LiBhayibheli liyibita ngekutsi nguSathane, futsi yetama kwenta bonkhe bantfu kutsi bente lokubi.

Ngalelinye lilanga Nkulunkulu Jehova watfuma Enoki kutsi atjele bantfu intfo labangazange bayitsandze. Naku latsi abatjele kona: ‘Nkulunkulu utawubhubhisa bonkhe bantfu labangakalungi.’ Bantfu batfukutsela kakhulu nabakuva loko, futsi kungenteka betama ngisho nekumbulala. Ngako Enoki abedzinga kuba nesibindzi kuze akwati kutjela bantfu ngaloko Nkulunkulu abetawukwenta.

Nkulunkulu akazange amvumele Enoki kutsi aphile sikhatsi lesidze nalabantfu labangakalungi. Enoki waphila iminyaka lengu-365 nje kuphela. Kungani sitsi waphila “iminyaka lengu-365 kuphela”? Kungoba bantfu bangaleso sikhatsi bebanemphilo lencono, futsi bebaphila sikhatsi lesidze. Ngekwesibonelo, indvodzana ya-Enoki Methusela yaphila iminyaka lengu-969.

Ngemuva kwekufa kwa-Enoki, bantfu bachubeka benta lokubi nakakhulu. LiBhayibheli litsi ‘imizindlo nemicabango yetinhlitiyo tabo yayimibi ngaso sonkhe sikhatsi,’ futsi ‘umhlaba wagcwala budlova.’

Uyasati yini sizatfu lesenta kwaba netinkinga letinyenti kangaka emhlabeni ngaleto tikhatsi? Kungenca yekutsi Sathane bese analenye indlela yekubangela bantfu kutsi bente tintfo letimbi. Sitawufundza ngaloko encenyeni lelandzelako.