INkhosi Lembi Ibusa EGibhithe

LAMADVODZA lowabonako asebentisa labantfu ngenkhani. Ase ubuke lendvodza leshaya lomunye ngesiswebhu. Phela letisebenti tingulabanye bemndeni waJakobe, futsi tibitwa ngekutsi ngema-Israyeli. Lamadvodza lasebentisa labantfu ngenkhani angemaGibhithe. Ema-Israyeli aba tigcili tawo. Kwenteka kanjani loko?

Kwase kuyiminyaka leminyenti umndeni waJakobe lomkhulu uhlala eGibhithe ngekuthula. Njengoba Josefa abeyindvodza lebalulekile eGibhithe, abewunakekela. Kodvwa ekugcineni Josefa wafa. Ngako-ke inkhosi lensha yaseGibhithe beyingawatsandzi ema-Israyeli.

Lenkhosi lembi lengu Faro yenta ema-Israyeli tigcili. Yabeka emadvodza lanetinhlitiyo letimbi kutsi awasebentise ngenkhani. Awasebentisa kamatima kute akhele Faro emadolobha. Kodvwa ema-Israyeli achubeka andza. Loko kwabetfusa bantfu baseGibhithe ngoba ema-Israyeli abetawuchubeka andza futsi abetawuba nemandla kakhulu kunabo.

Uyati kutsi yini Faro layenta? Wakhuluma nebabelekisi bebafati bema-Israyeli watsi: ‘Nanibabelekisa nibobulala tonkhe tinswane letibafana.’ Kodvwa abazange batibulale, ngoba labafati bekubantfu labalungile.

Ngako-ke Faro wayala bonkhe bantfu bakhe watsi: ‘Tonkhe tinswane letibafana bema-Israyeli nibotibulala, kodvwa tinswane letingemantfombatane nibotiyekela tiphile.’ Uyabona yini kutsi bekuyintfo lembi kanjani lena lebeyishiwo nguFaro? Ase sibone kutsi lolunye luswane lolungumfana lwasindziswa njani.