Lokwenta Mosi Wabaleka

ASE ubuke Mosi, uyabaleka eGibhithe. Uyawabona yini lamadvodza lamcoshako? Uyati yini kutsi afuna kumbulalelani? Ase sibone kutsi singayitfola yini imphendvulo.

Mosi wakhulela kaFaro, inkhosi yaseGibhithe. Abeyindvodza lehlakaniphile futsi leyatiwako. Bekati kutsi yena akasuye umGibhithe, nekutsi batali bakhe bebatigcili letingema-Israyeli.

Kwatsi ngalelinye lilanga asaneminyaka lengu-40 budzala, wabona kuncono kutsi ahambe ayobona kutsi bantfu bakubo bebaphila njani. Yayimvisa buhlungu indlela bebaphetfwe ngayo. Wabona umGibhithe ashaya kabuhlungu umIsrayeli losigcili. Wacalata ngala nangala, watsi kube abone kutsi kute lombonako, washaya wabulala lomGibhithe wammbela esihlabatsini.

Ngakusasa Mosi waphindze wavakashela bantfu bakubo. Abecabanga kutsi angabasita baphume ebugcilini. Watsi uyabuka wabona ema-Israyeli lamabili alwa. Wesuke watsi kulona lowonile: ‘Umshayelani lomnakenu?’

Lendvodza yaphendvula yatsi: ‘Ngubani losakwente indvuna nemahluleli wetfu wena? Sewufuna kungibulala nami njengalomGibhithe lombulele itolo?’

Mosi wetfuka futsi wesaba kakhulu. Wabona kutsi bantfu sebayati kutsi ubulele umGibhithe. Ngisho naFaro imbala abesati ngalendzaba, waze watfumela bantfu kutsi bahambe bayombulala. Kungako-ke Mosi abaleka eGibhithe.

Nakesuka eGibhithe Mosi, waya khashane eveni lakaMidiyani. Kulelo live wahlangana nemndeni waJethro, futsi washada nendvodzakati yakhe lenguSiphora. Mosi waba ngumelusi wetimvu taJethro. Wahlala kulelo live iminyaka lengu-40. Abesaneminyaka lengu-80 budzala ngaleso sikhatsi. Kwatsi ngalelinye lilanga eluse timvu taJethro, kwenteka intfo lesimanga leyashintja imphilo yakhe. Vula likhasi lelilandzelako, sibone kutsi yini lentfo leyenteka.