Imbongolo Iyakhuluma

WAKE wayiva imbongolo ikhuluma? Ungaphendvula ngekutsi ‘Cha, tilwane atikhulumi.’ Kodvwa liBhayibheli lisitjela ngembongolo leyakhuluma. Ase sibone kutsi kwenteka njani loko.

Ema-Israyeli abesakulungele kuhamba aye eveni laseKhenani. Bhalaki inkhosi yakaMowabi abewesaba ema-Israyeli, ngako watfumela indvodza lehlakaniphile ligama layo lokunguBhalamu kutsi iyowacalekisa. Wamtsembisa kumnika imali lenyenti, ngako Bhalamu wavele wagibela imbongolo yakhe waya kuBhalaki.

Jehova abengafuni kutsi Bhalamu acalekise bantfu Bakhe. Watfumela ingilosi yakhe lebeyiphetse inkemba lendze kutsi iyomncandza. Bhalamu akazange ayibone lengilosi, kodvwa imbongolo yakhe yona yayibona. Lembongolo yetama kubalekela lengilosi, kodvwa yagcina seyihleti phasi emgwacweni. Watfukutsela kakhulu Bhalamu, waze wayishaya ngendvuku.

Jehova wenta kutsi lembongolo ikhulume naBhalamu. ‘Kodvwa ngenteni kuwe kutsi ungaze ungishaye?’ kubuta lembongolo.

Waphendvula Bhalamu watsi: ‘Ungente silima, kube bengiphetse inkemba, ngabe ngiyakubulala nyalo.’

“Ngake ngakwenta yini loku kuwe?” kubuta imbongolo.

Watsi: “Cha.”

Jehova wase wenta kutsi Bhalamu ayibone lengilosi ime ekhatsi endleleni iphetse inkemba. Lengilosi yatsi kuye: ‘Uyishayeleni lembongolo yakho? Ngite lapha kutewuncandza wena, ngoba akukalungi kuyocalekisa sive saka-Israyeli. Kube beyingangibalekeli lembongolo yakho, ngabe wena sengikubulele nyalo, kodvwa yona bengitayishiya iphila.’

Bhalamu watsi kulengilosi: ‘Ngonile, bengingati kutsi ume lapha endleleni kutewuncandza mine.’ Lengilosi yamyekela wahamba, kodvwa Bhalamu wachubeka wayobona Bhalaki. Abesolo afuna kucalekisa ema-Israyeli, kodvwa Jehova wamenta wawabusisa katsatfu.