Imbongolo YaBhalamu Iyakhuluma

Ema-Israyeli ahlala ehlane iminyaka lecishe ibe ngu-40. Abencobe emadolobha lamanyenti. Manje, ngemva kwekuhlala ehlane lakaMowabi ngesheya kweJordane, besekusikhatsi sekutsi angene eVeni Lesetsembiso. Bhalakhi iNkhosi yakaMowabi bekesaba kutsi ema-Israyeli atawutsatsa live lakhe. Ngako-ke, wacela lenye indvodza lokutsiwa nguBhalamu kutsi ite kaMowabi itewucalekisa ema-Israyeli.

Jehova watsi kuBhalamu: ‘Ungawacalekisi ema-Israyeli.’ Bhalamu wabese akasayi. INkhosi Bhalaki yaphindze yamcela futsi yetsembisa kumnika konkhe lakufunako. Nalapho Bhalamu wala. Nkulunkulu watsi: ‘Ungahamba nawo, kodvwa utawukhuluma kuphela loko lengitakutjela kona.’

Bhalamu wagibela imbongolo yakhe waya kaMowabi. Wabese ukhetsa kuwacalekisa ema-Israyeli nanobe Jehova abetsite angakwenti loko. Ingilosi yaJehova yetama kumvimba emgwacweni tikhatsi letintsatfu. Bhalamu abengayiboni lengilosi kodvwa lembongolo yakhe beyiyibona. Kwekucala, lembongolo yaphuma emgwacweni, yagudla lubondza yampintjetela lunyawo lwaBhalamu kulo. Ekugcineni lembongolo yalala phasi ekhatsi emgwacweni. Bhalamu wayishaya ngendvuku yakhe.

Ngemva kwekuyishaya katsatfu, Jehova wenta lembongolo yakhuluma. Lembongolo yabuta Bhalamu yatsi: ‘Ungishayelani?’ Bhalamu watsi: ‘Kungobe ungente silima. Kube nje bengiphetse inkemba, bengitakubulala.’ Lembongolo yatsi: ‘Angisiyo yini imbongolo yakho lebewusolo uyigibela kuphila kwakho konkhe? Ngike ngakuphatsa yini ngalendlela ngaphambili?’

Jehova wase wenta Bhalamu wayibona lengilosi. Lengilosi yatsi: ‘Jehova utsite ungawacalekisi ema-Israyeli.’ Bhalamu watsi: ‘Ngonile, ngitawubuyela emuva ekhaya.’ Kodvwa lengilosi yatsi: ‘Hamba uye kaMowabi, kodvwa utawukhuluma kuphela loko Jehova lakutjela kona.’

Wasifundza yini sifundvo Bhalamu? Cha. Ngemva kwaloko Bhalamu wetama kucalekisa ema-Israyeli tikhatsi letintsatfu, kodvwa sikhatsi ngasinye nakawacalekisa Jehova bekamenta awabusise. Ngemva kwesikhatsi, ema-Israyeli ahlasela bakaMowabi futsi Bhalamu wabulawa. Abetawusindza yini Bhalamu kube abelalele Jehova?