Ruthe NaNawomi

EBHAYIBHELINI utawutfola incwadzi lokutsiwa nguRuthe. Ikhuluma ngendzaba lemayelana nemndeni lowaphila ngesikhatsi ema-Israyeli anetikhulu. Ruthe abengulomsikati losemusha waseveni lakaMowabi, abengesuye lomunye wesive saNkulunkulu saka-Israyeli. Kodvwa watsi nasekafundze ngaNkulunkulu Jehova, wamtsandza kakhulu. Nawomi yena abengulomsikati losakhulile lowasita Ruthe kutsi afundze ngaJehova.

Nawomi abengumIsrayeli. Yena nendvodza yakhe kanye nemadvodzana akhe lamabili batfutsela eveni lakaMowabi ngalesikhatsi live laka-Israyeli likhungetfwe yindlala. Ngalelinye lilanga indvodza yakhe yafa. Emadvodzana aNawomi abese ashada nemantfombatana lamabili akaMowabi, boRuthe na-Opha. Ngemuva nje kweminyaka lengu-10, emadvodzana lamabili aNawomi nawo afa. Weva buhlungu Nawomi kanye nalamantfombatana lamabili. Abetawenta njani Nawomi?

Ngalelinye lilanga Nawomi watsatsa sincumo sekuhamba abuyele emuva ekhaya kubantfu bakubo. BoRuthe na-Opha bebangafuni kuhlukana naye, ngako bavele bahamba naye. Sebahambe libangana, Nawomi watsi kubo: ‘Ncandzekani nibuyele emakhaya akini niyohlala nabomake benu.’

Nawomi wabanga, wabavalelisa. Bacala kukhala, ngoba bebamtsandza kakhulu. Batsi: “Cha, sitawuhamba nawe siye esiveni sakini.” Watsi kubo: ‘Ncandzekani madvodzakati ami. Kutawuba ncono kutsi nibuyele emakhaya kini.’ Opha wabuyela emuva ekhaya, kodvwa Ruthe akancandzekanga.

Nawomi watsi kuRuthe: ‘Angitsi uyabona kutsi Opha sewuhambile wabuyela kubo, nawe-ke buyela kini.’ Kodvwa Ruthe watsi: “Ngicela ungangincengi kutsi ngikushiye. Ngiyekele, ngihambe nawe. Lapho uya khona, nami ngitawuya khona; lapho uyawuhlala khona, nami ngiyawuhlala khona. Sive sakini kuyawuba sive sami; naNkulunkulu wakho kube nguNkulunkulu wami. Lapho uyawufela khona, nami ngiyawungcwatjwa khona.” Nakacedza kusho lamavi Ruthe, Nawomi wavele wangabe asachubeka nekumncenga kutsi ancandzeke.

Ekugcineni bobabili bafika ka-Israyeli, lapho bahlala khona. Ngekushesha, Ruthe wacala kusebenta emasimini ngoba kwakusikhatsi sekuvunwa kwakolo. Indvodza ligama layo lokunguBowazi yatsi angavuna ensimini yayo. Uyati kutsi kwakungubani make waBowazi? KwakunguRahabi wasedolobheni laseJerikho.

Ngalelinye lilanga Bowazi watsi kuRuthe: ‘Sebangitjele konkhe ngawe, nangemusa lowubonise Nawomi. Bangitjelile nangekusuka kwakho kini, washiya make wakho nababe wakho, nelive lakini, weta kubantfu longabati. Shengatsi Jehova angakunika umvuzo.’

Ruthe watsi: ‘Maye ube nemusa kimi mnumzane, ngoba sewungidvudvutile wangikhulumisa kahle.’ Bowazi wamtsandza kakhulu Ruthe, ngemuva kwesikhashana nje bashada. Loku kwamjabulisa Nawomi. Wajabula nakakhulu nalapho boRuthe naBowazi baba nendvodzana yabo yekucala, labayetsa ngekutsi ngu-Obedi. Kamuva Obedi waba ngumkhulu waDavide. Sitawufundza lokunyenti ngaDavide etincenyeni letilandzelako.