Intfombatana Isita Indvodza Lenemandla

UYATI yini kutsi lentfombatana lencane itsini? Itjela lenkhosikati ngemphrofethi waJehova longu-Elisha, nangetintfo letinhle Jehova lamsita kutsi atente. Lenkhosikati beyingati ngaJehova ngoba beyingesuye umIsrayeli. Ase sibone-ke kutsi kungani lentfombatana beyisendlini yalenkhosikati.

Lenkhosikati yayingumSiriya. Indvodza yayo kwakunguNamani, labeyindvuna yemphi yaseSiriya. EmaSiriya atfumba lentfombatana lencane yaka-Israyeli, futsi yaletfwa kumkaNamani kutsi ibe sisebenti sakhe.

Namani abenesifo lesibi lesibitwa ngekutsi bulephelo. Lesifo singenta nenyama yemuntfu kutsi idzilike. Lentfombatana yamtjela loku umkaNamani: ‘Kubemane inkhosi yami beyingaya kumphrofethi waJehova loka-Israyeli, beyingaphiliswa kulobulephelo.’ Ngemuva kwesikhatsi lenkhosikati yatjela indvodza yayo ngalomphrofethi waNkulunkulu.

Namani abekufuna ngenhlitiyo yakhe yonkhe kwelashwa, ngako wavele waya ka-Israyeli. Nakefika khona wacondza ngco emtini wa-Elisha. Elisha watfumela inceku yakhe kutsi itjele Namani ahambe ayogeza eMfuleni iJordane kasikhombisa. Watfukutsela kakhulu Namani nakeva loko, waze watsi: ‘Imifula lelena emuva ekhaya incono kunayo yonkhe imifula yalana ka-Israyeli.’ Watsi nakacedza kusho loku wahamba.

Lenye yetinceku takhe yeta kuye yatsi: ‘Nkhosi, kube Elisha abetsite yenta intfo lelukhuni bewungeke yini uyente? Manje umane watsi nje geza utewuhlambuluka.’ Namani wayilalela inceku yakhe wahamba waticwilisa kasikhombisa eMfuleni iJordane. Ngemuva kwaloko umtimba wakhe wahlambuluka, wabuyela esimweni sawo.

Namani wajabula kakhulu, futsi wabuyela ku-Elisha wafike watsi: ‘Manje sengiyati kutsi emhlabeni wonkhe kute Nkulunkulu lofanana naNkulunkulu wema-Israyeli. Ngako ngicela kutsi utsatse nasi sipho lesiphuma kimi.’ Kodvwa Elisha wamphendvula watsi: ‘Cha, ngingeke ngisemukele lesipho.’ Bekati kutsi akusiyo intfo lenhle kutsatsa lesipho, ngoba kwakunguJehova lobekalaphe Namani. Kodvwa inceku ya-Elisha lenguGehazi yayisifuna lesipho.

Ngako watsi nakahamba nje Namani, Gehazi wavele wamgijimisa. Nakefika kuye watsi: ‘Elisha utsi abengatsandza kutsi umuphe letinye taletipho ngoba ufuna kutiniketa labanye bangani bakhe labasandza kufika labamvakashele.’ Lawa kwakungemanga. Kodvwa Namani abengati kutsi Gehazi ukhuluma emanga, ngako wamnika letinye taletipho.

Nakabuyela ekhaya Gehazi, Elisha abekwati kahle labekwentile, ngoba Jehova abemtjeleli. Ngako watsi kuye: ‘Ngoba wente lentfo lembi kangaka, bulephelo baNamani sebutawunamatsela kuwe.’ Kwenteka njengoba abeshito.

Sifundzani kuyo yokhe lendzaba? Kwekucala, kufanele silingise lentfombatana lencane, sikhulume ngaJehova, ngoba loku kungaletsa lusito lolukhulu. Kwesibili, akukafaneli sitigcabhe njengoba Namani enta ekucaleni, kodvwa kufanele sitihloniphe tinceku taNkulunkulu. Kwesitsatfu, sifundza kutsi akukafaneli sikhulume emanga njengaGehazi. Uyabona yini kutsi singazuza lokunyenti lapho sifundza liBhayibheli?