Libutfo LaseSiriya Nentfombatana Lencane

Eveni laseSiriya bekunentfombatana lencane yaka-Israyeli lebeyihlala khashane nasekhaya. Libutfo laseSiriya layehlukanisa nemndeni wakubo futsi nyalo beseyisebentela umfati waNahamani indvuna yelibutfo. Lentfombatana lencane beyikhonta Jehova ngisho nobe bantfu lebeyihlala nabo bebangamkhonti Jehova.

Nahamani abenetilondza letesabekako emtimbeni wakhe futsi abehlale eva buhlungu. Lentfombatana lencane beyifisile kumsita. Ngako yatsi kumfati waNahamani: ‘Kube inkhosi yami beyingavakashela umphrofethi Elisha eSamariya! Yena abengayelapha kulesifo sebulephelo.’

Lomfati wacocela Nahamani konkhe lentfombatana lencane lebeyikushito. Nahamani abetimisele kwenta nobe yini, ngako wahamba waya ku-Elisha ka-Israyeli. Nahamani abetitjele kutsi Elisha utawuta atomhlangabeta njengobe asesikhundleni lesisetulu. Kodvwa kunaloko, Elisha watfumela sitfunywa kutsi sitsi kuye: ‘Hamba uye eJordane ufike ugeze tikhatsi letisikhombisa. Utawelapheka.’

Nahamani wajabha kakhulu. Watsi: ‘Mine bengititjela kutsi utawuphuma ete kimi, eme lambikwami bese ubita ligama laJehova Nkulunkulu wakhe, ahambise tandla takhe tiye emuva nasembili kuze elaphe lobulephelo. Kunaloko ungitjela kutsi angiyogeza emfuleni waka-Israyeli. Tsine sinemifula lencona eSiriya. Angeke yini ngigeze kuyo ngihlanteke?’ Nahamani watfukutsela futsi wahamba.

Tisebenti taNahamani tamsita wacabangisisa ngalendzaba. Tatsi kuye: ‘Angeke yini wente nobe yini kuze welapheke? Imelula lentfo lomphrofethi latsi yente. Kungaba njani uyente?’ Nahamani watilalela. Wahamba waya emfuleni iJordane wafike wageza tikhatsi letisikhombisa. Watsi nakacedza kugeza kwesikhombisa, tilondza tase tisukile emtimbeni wakhe. Wajabula kakhulu futsi wahamba wayobonga ku-Elisha. Nahamani watsi: ‘Nyalo sengiyati kutsi Jehova unguNkulunkulu weliciniso.’ Ucabanga kutsi yativa njani lentfombatana lencane nayibona Nahamani sekaphilile?