Ingilosi Ivakashela Mariya

LENTFOMBI lenhle nguMariya. IngumIsrayelikati lohlala eNazaretha. Nkulunkulu uyati kutsi Mariya ungumuntfu lolungile. Kungako atfumele ingilosi yakhe Gabhriyeli kutsi ikhulume naye. Uyati kutsi yini Gabhriyeli latoyitjela Mariya? Ase sibone.

Gabhriyeli watsi kuye: ‘Sawubona wena lobusisekile, Jehova unawe.’ Mariya abecala kumbona lomuntfu. Ngako wamangala, ngobe abengati kutsi usho kutsini, kodvwa Gabhriyeli wamcinisa.

Watsi kuye: ‘Ungesabi Mariya ngoba utfole umusa kuJehova. Kungako atokwentela lokuhle. Utawutala umntfwana, umetse ligama utsi nguJesu.’

Gabhriyeli wachubeka nekuchaza: ‘Lomntfwana uyawuba mkhulu, abitwe ngekutsi yiNdvodzana yaNkulunkulu Lophakeme Kunako Konkhe. Jehova utawumenta inkhosi njengaDavide. Kepha Jesu uyawuba yinkhosi kuze kube phakadze, futsi nembuso wakhe angeke ube nesiphetfo.’

Mariya wase utsi engilosini: ‘Kepha loko kungenteka kanjani ngoba ngite indvodza?’

Gabhriyeli wamphendvula watsi: ‘Emandla aNkulunkulu atawuba nawe. Ngako-ke lomntfwana utawubitwa ngekutsi yiNdvodzana yaNkulunkulu.’ Wachubeka watjela Mariya watsi: ‘Khumbula sihlobo sakho Elizabethe, lebekutsiwa sewuguge kakhulu kutsi angaba nemntfwana, kepha nyalo sewutawuba nendvodzana. Uyabona-ke kutsi Nkulunkulu akehlulwa lutfo!’

Mariya wase utsi: ‘Ngiyincekukati yaJehova! Akwenteke kimi loko, njengoba sewushito.’ Yase iyamshiya ingilosi.

Mariya wabese utilungiselela ngekushesha kuyovakashela Elizabethe. Kwatsi lapho Elizabethe nakeva livi laMariya, umntfwana losesiswini sakhe wagcuma ngenca yenjabulo. Elizabethe wagcwala umoya longcwele waNkulunkulu, futsi watsi kuMariya: ‘Ubusiseke kakhulu kunabo bonkhe labasikati.’ Mariya wahlala na-Elizabethe cishe tinyanga letintsatfu, wabese ubuyela eNazaretha.

Mariya besatawushada nelijaha lelinguJosefa. Kepha lapho Josefa atfola kutsi Mariya abesatawuba nemntfwana, wabese ucabanga kutsi kuncono angasamshadi. Ingilosi yaNkulunkulu yatsi kuye: ‘Ungesabi kumtsatsa Mariya abe ngumkakho, ngoba nguNkulunkulu lomnike indvodzana.’ Ngako-ke, Mariya naJosefa bashada futsi balindzela kutalwa kwaJesu.