Jesu Ukanye Nemfati WaseSamariya Emtfonjeni

JESU abephumulile eceleni kwemtfombo waseSamariya. Bafundzi bakhe bebayawutsenga kudla edolobheni. Lomfati Jesu lakhuluma naye abetewukha emanti. Watsi kuye: ‘Ase unginatsise.’

Loku kwammangalisa kakhulu lomfati. Uyati kutsi kungani? Kungoba Jesu abengumJuda, kantsi lomfati yena angumSamariya. EmaJuda lamanyenti abengawatsandzi emaSamariya. Abengakhulumi ngisho nekukhuluma nawo. Kepha Jesu abebatsandza bonkhe bantfu. Ngako-ke watsi: ‘Kube mane bewati kutsi ngubani lona lotsi munatsise, ngabe ucele kuye, futsi yena abetakunika emanti ekuphila.’

Lomfati wase utsi: ‘Nkhosi, awunalutfo lwekukha emanti, kantsi nalomtfombo uyashona, pho, utawuwatsatsaphi lawo manti ekuphila?’

Jesu wamphendvula watsi: ‘Wonkhe umuntfu lonatsa lamanti, uphindze ome futsi, kepha lamanti lengiyawumnika wona, ayawumenta aphile phakadze.’

Lomfati watsi: ‘Nkhosi, ngiphe nami lawo manti! Khona ngingenawuphindze ngome, futsi ngingenawuphindze ngite lapha.’

Lomfati abecabanga kutsi Jesu ukhuluma ngemanti sibili. Kepha abekhuluma ngeliciniso leliphatselene naNkulunkulu nembuso wakhe. Leliciniso lifana nemanti ekuphila. Linganiketa umuntfu kuphila lokuphakadze.

Jesu wase utsi kulomfati: “Hamba ubite indvodza yakho, nite lapha.”

Waphendvula watsi: “Ngite indvodza.”

Jesu watsi: ‘Usho sibili, ngoba sewuke waba nemadvodza lasihlanu, futsi nalena lohlala nayo nyalo akusiyo yakho.’

Lomfati wamangala ngoba konkhe lokwakushiwo nguJesu kwakuliciniso. Jesu wakwati kanjani konkhe loku? Kungoba Jesu abenguLotsenjisiwe waNkulunkulu, futsi Nkulunkulu nguye lowamtjela konkhe loku. Ngalesosikhatsi bafundzi bakhe babuya, futsi bamangala ngekutsi Jesu abekhuluma nalomfati waseSamariya.

Sifundzani kuko konkhe loku? Sifundza kutsi Jesu abenemusa kubantfu bato tonkhe tive. Natsi kufanele sibe njengaye. Akukafanele sicabange kutsi labanye bantfu babi ngenca yekutsi bangulesinye sive. Jesu abefuna tonkhe tinhlobo tebantfu titfole liciniso leliholela ekuphileni lokuphakadze. Natsi-ke kufanele sisite bantfu bafundze liciniso.