Umfati WaseSamariya Emtfonjeni Wemanti

Ngemva kweliPhasika, Jesu nebafundzi bakhe bendlula eSamariya nabaya eGalile. Jesu wefika wema endzaweni lebitwa ngekutsi ngumtfombo waJakobe loseceleni kwelidolobha laseSikhari. Wefika waphumula lapho futsi bafundzi bakhe bahamba baya edolobheni bayotsenga kudla.

Kwefika lomunye umfati kulomtfombo atewukha emanti. Jesu watsi kuye: “Ngicela unginatsise.” Lomfati watsi: ‘Ungakhulumi nami ngobe ngingumSamariya. EmaJuda akakhulumisani nemaSamariya.’ Jesu watsi kuye: ‘Kube bewati kutsi ngingubani, bewutawucela ngikunatsise futsi bengitakunika emanti ekuphila.’ Lomfati wambuta watsi: ‘Usho kutsini? Ute ngisho nelibhakede lekukha emanti.’ Jesu watsi: ‘Noma ngubani lonatsa lamanti lengitamnika wona ngeke aphindze ome.’ Lomfati watsi: ‘Mnumzane, ngicela ungiphe lamanti.’

Jesu watsi kulomfati: ‘Hamba uyobita indvodza yakho nite lamtfonjeni.’ Yena watsi: “Ngite indvodza.” Jesu watsi: ‘Ucinisile, ngoba washada tikhatsi letisihlanu, futsi nyalo uhlala nendvodza longakashadi nayo.’ Lomfati watsi: ‘Sengiyabona kutsi ungumphrofethi. Bantfu bakitsi batsi singamkhonta Nkulunkulu kulendzawo, kodvwa emaJuda atsi singamkhonta kuphela eJerusalema. Mine ngikholwa kutsi Mesiya nakefika, utasifundzisa kutsi singamkhonta njani Nkulunkulu.’ Ngako Jesu wase umtjela intfo lebekangakayitjeli muntfu, watsi: ‘Ngimi loMesiya.’

Lomfati wagijima waya edolobheni watjela bantfu baseSamariya watsi: ‘Ngicabanga kutsi sengimtfolile Mesiya. Wati konkhe ngami. Wotani nitombona.’ Bahamba naye baya kuJesu futsi wafike wabafundzisa.

BaseSamariya bacela Jesu kutsi ahlale kulelidolobha. Wahlala khona emalanga lamabili afundzisa futsi labanyenti bakukholwa labekusho. Batsi kulomfati waseSamariya: ‘Ngemuva kwekulalela lendvodza, sesiyakholwa kutsi inguye umsindzisi welive.’