Sifundvo 3

Jesu Khristu Ungubani?

Kushiwo ngani kutsi Jesu uyiNdvodzana yaNkulunkulu “yematubulo”? (1)

Kushiwo ngani kutsi “unguLivi”? (1)

Jesu wetelani emhlabeni angumuntfu? (2-4)

Bekatentelani timangaliso? (5)

Yini Jesu lekatawuyenta esikhatsini lesitako lesisedvute? (6)

1. Asengaketi emhlabeni, Jesu bekahlala ezulwini angumuntfu longumoya. Bekayindalo yaNkulunkulu yekucala, ngiko abitwa ngekutsi uyiNdvodzana yaNkulunkulu “yematubulo.” (Kholose 1:15) NguJesu kuphela iNdvodzana Nkulunkulu layidala matfupha. Jehova wasebentisa Jesu “njengengcweti yekwakha” letinye tintfo ezulwini nasemhlabeni. (Taga 8:22-31; Kholose 1:16, 17) Nkulunkulu waphindze wamsebentisa njengemkhulumeli waKhe logcamile. Ngiko Jesu kutsiwa “unguLivi.”—Johane 1:1-3; Sembulo 19:13.

2. Nkulunkulu watfumela iNdvodzana yaKhe emhlabeni ngekufaka kuphila kwayo esiswini saMariya. Ngaloko, Jesu bekete babe longumuntfu. Ngiko atalwa ete sono nobe kungapheleli. Nkulunkulu watfumela Jesu emhlabeni ngetizatfu letintsatfu: (1) Kutsi asifundzise liciniso ngaNkulunkulu. (Johane 18:37), (2) kutsi abambelele ebucotfweni lobuphelele, kanjalo asishiyela sibonelo sekutsi simlandzele (1 Phetro 2:21), nekutsi (3) anikele ngemphilo yakhe sitewukhululeka esonweni nasekufeni. Bekudzingeke ngani loko?—Matewu 20:28.

3. Ngekungawulaleli umyalo waNkulunkulu, umuntfu wekucala, longu-Adamu, wenta loko liBhayibheli lelikubita ngekutsi “sono”. Ngaleso sizatfu, Nkulunkulu wamgwebela kufa. (Genesisi 3:17-19) Bekangasaphili ngaloko Nkulunkulu bekakufuna kuye. Ngaloko, walahlekelwa kuphelela. Kancane kancane waguga wagcina afile. Adamu wendlulisela sono kubo bonkhe bantfwana bakhe. Ngiko natsi siguga, sigula, futsi sifa. Bantfu bebangasindziswa kanjani?—Roma 3:23; 5:12.

4. Jesu bekangumuntfu lophelele njenga-Adamu. Ngekungefani na-Adamu, Jesu walalela Nkulunkulu ngalokuphelele ngisho noma sekatfola luvivinyo lolukhulu. Ngaleso sizatfu, wakwati kunikela ngekuphila kwakhe lokuphelele, wahlawulela sono sa-Adamu. Nguloko liBhayibheli lelikubita ngekutsi “sihlengo.” Kanjalo, intalo ya-Adamu beyingakhululeka kulesigwebo sekufa. Bonkhe labakholwa kuJesu bangatsetselelwa tono tabo futsi batfole kuphila lokuphakadze.—1 Thimothi 2:5, 6; Johane 3:16; Roma 5:18, 19.

5. Ngalesikhatsi asemhlabeni, Jesu welapha labagulako, wesutsisa labalambile, wathulisa tiphepho, wavusa ngisho nalabafile. Bekatentelani timangaliso? (1) Bekanesihawu ngebantfu, afuna kubasita. (2) Timangaliso takhe betifakazela kutsi uyiNdvodzana yaNkulunkulu. (3) Betikhombisa loko latawukwentela bantfu labalalelako nasekayiNkhosi yemhlaba.—Matewu 14:14; Makho 2:10-12; Johane 5:28, 29.

6. Jesu wafa, wavuswa nguNkulunkulu asidalwa lesingumoya, wabese ubuyela ezulwini. (1 Phetro 3:18) Kusukela lapho, Nkulunkulu umente iNkhosi. Masinyane nje, Jesu utawucedza bonkhe bubi nekuhlupheka emhlabeni.—Tihlabelelo 37:9-11; Taga 2:21, 22.

[Titfombe ekhasini 7]

Umsebenti waJesu bewufaka ekhatsi kufundzisa, kwenta timangaliso, ngisho nekunikela ngekuphila kwakhe ngenca yetfu