SIFUNDVO 4
Ungubani Jesu Khristu?
1. Kuphila kwaJesu kwacala njani?
Ngutiphi tici tebuntfu baJesu letamenta wangeneka?—MATEWU 11:29; MAKHO 10:13-16.
Ngalokungafanani nanobe ngumuphi lomunye umuntfu, Jesu waphila ezulwini njengengilosi ngembikwekutsi atalwe emhlabeni. (Johane 8:23) Abeyindalo yaNkulunkulu yekucala futsi welekelela Nkulunkulu ekudaleni tonkhe letinye tintfo. Nguye kuphela lowadalwa nguJehova ngalokucondzile, futsi kuyamfanela kubitwa ngekutsi ‘ngulotelwe yedvwa kuYise.’ (Johane 1:14) Jesu waba ngumKhulumeli waNkulunkulu, kungaleso sizatfu abitwa ngekutsi ‘nguliVi.’—Fundza Taga 8:22, 23, 30; Kholose 1:15, 16.
2. Kungani Jesu eta emhlabeni?
Nkulunkulu watfumela iNdvodzana yakhe emhlabeni ngekwendlulisela kuphila kwayo esibeletfweni sentfombi-ntfo lengumJuda lekwakutsiwa nguMariya. Ngako Jesu akatalwanga ngubabe longumuntfu. (Lukha 1:30-35) Jesu weta emhlabeni kute (1) asifundzise liciniso ngaNkulunkulu, (2) asibekele sibonelo sendlela yekwenta intsandvo yaNkulunkulu ngisho nome sibhekene nebumatima, kanye (3) nekutewunikela ngekuphila kwakhe lokute sono kutsi kube “yinhlawulo.”—Fundza Matewu 20:28.
3. Kungani sidzinga inhlawulo?
Inhlawulo nguloko lokukhokhwako kute kukhululwe umuntfu losengotini yekufa. (Eksodusi 21:29, 30) Kufa kanye nekuguga bekungasiyo injongo yaNkulunkulu yasekucaleni ngebantfu. Sikwati njani loko? Nkulunkulu watjela Adamu, umuntfu wekucala kutsi nakenta loko liBhayibheli lelikubita ngekutsi “sono,” abetawufa. Ngako-ke, kube Adamu akonanga, abengeke afe. (Genesisi 2:16, 17; 5:5) Ngekwaloko lokushiwo liBhayibheli, kufa ‘kwangena’ kubantfu nga-Adamu. Ngenca yaloko, Adamu wendlulisela sono kanye nekufa kuso sonkhe situkulwane sakhe. Ngako-ke, siyayidzinga inhlawulo letasihlenga ekufeni lesakutfola ku-Adamu.—Fundza Roma 5:12; 6:23.
Ngubani lobekangakhokha lenhlawulo kute sikhululwe ekufeni? Nasifa, sisuke sikhokhela tono tetfu kuphela. Kute umuntfu longakhokhela tono talabanye.—Fundza Tihlabelelo 49:7-9.
4. Kungani Jesu afa?
Jesu bekangafanani natsi, yena bekete sono. Ngako-ke kwakute sidzingo sekutsi afele tono takhe—ngobe kute nasinye sono labekasentile. Esikhundleni saloko, Jesu wafela tono talabanye. Nkulunkulu wakhombisa lutsandvo lolukhulu ngebantfu ngekutsi atfumele iNdvodzana yakhe kutsi itosifela. NaJesu wakhombisa kutsi uyasitsandza, ngobe wamlalela Babe wakhe futsi wanikela ngekuphila kwakhe ngenca yetono tetfu.—Fundza Johane 3:16; Roma 5:18, 19.
Bukela le-video Kungani Jesu Afa?
5. Wentani Jesu nyalo?
Ngalesikhatsi alapha emhlabeni, Jesu welapha labagulako, wavusa labafile, wakhulula nebantfu labebasengotini. Ngekwenta njalo, abemane akhombisa loko latakwentela bantfu labalalelako esikhatsini lesitako. (Matewu 15:30, 31; Johane 5:28) Ngemuva kwekutsi Jesu asafile, Nkulunkulu wamvusela ekuphileni njengemuntfu wemoya. (1 Phet. 3:18) Jesu walindza ngesekudla saNkulunkulu kwadzimate kwaba kulapho Jehova amnika emandla ekubusa njengeNkhosi ngetulu kwawo wonkhe umhlaba. (Hebheru 10:12, 13) Nyalo Jesu uyabusa njengeNkhosi ezulwini, futsi balandzeli bakhe bamemetela leto tindzaba letimnandzi emhlabeni wonkhe.—Fundza Danyela 7:13, 14; Matewu 24:14.
NjengeNkhosi, madvutane Jesu utawusebentisa lawo mandla akhe kute acedze konkhe kuhlupheka kanye nalabo labakubangelako. Bonkhe labo labakholwako kuye ngekutsi bamlalele, batawuphila epharadisi emhlabeni.—Fundza Tihlabelelo 37:9-11.