Sifundvo 4
Develi Ungubani?
Develi Sathane—wachamukaphi? (1, 2)
Sathane ubadukisa kanjani bantfu? (3-7)
Kudzingeke ngani kutsi ulwisane naDeveli? (7)
1. Ligama lelitsi “develi” lisho umuntfu lokhuluma emanga lamabi ngalomunye umuntfu. Lelitsi “Sathane” lisho sitsa nobe umphikisi. Lamagama lawa kubitwa ngawo sitsa saNkulunkulu lesikhulu. Ekucaleni, besiyingilosi lelungile, lehlala ezulwini naNkulunkulu. Nobe kunjalo, ngekuhamba kwesikhatsi satikhukhumeta, safuna kukhontwa esikhundleni saNkulunkulu.—Matewu 4:8-10.
2. Lengilosi lenguSathane yakhuluma na-Eva isebentisa inyoka. Yamenta wangamlaleli Nkulunkulu ngekutsi imtjele emanga. Ngaleyondlela Sathane waphikisana naloko lokutsiwa “bukhosi” baNkulunkulu, nobe sikhundla sakhe njengaLosetukwako konkhe. Sathane wabangela kungabata kutsi Nkulunkulu ubusa ngendlela lekahle nalebasitako bantfu. Sathane waphindze wakungabata kutsi bakhona bantfu labangahlala batsembekile kuNkulunkulu. Ngekwenta loko, Sathane watenta sitsa saNkulunkulu. Ngiko abitwa ngekutsi nguSathane longuDeveli—Genesisi 3:1-5; Jobe 1:8-11; Sembulo 12:9.
3. Sathane wetama kuyenga bantfu batewukhonta yena. (2 Khorinte 11:3, 14) Lenye indlela labadukisa ngayo yinkholo yemanga. Nangabe inkholo ifundzisa emanga ngaNkulunkulu, ecinisweni iphumelelisa injongo yaSathane. (Johane 8:44) Bantfu labangemalunga etinkholo temanga bangakholwa ngetinhlitiyo tabo tonkhe kutsi bakhonta Nkulunkulu weliciniso. Kepha ecinisweni basuke bakhonta Sathane. ‘UnguNkulunkulu walomhlaba’.—2 Khorinte 4:4.
4. Kuchumana nemimoya nobe emadloti kungulenye indlela Sathane lafaka ngayo bantfu ngephasi kwemandla akhe. Bangabita imimoya nobe emadloti kutsi abavikele, alimate labanye, abike likusasa, nobe ente timangaliso. Lamandla lamabi laphumelelisa lemikhuba achamuka kuSathane. Kute sijabulise Nkulunkulu, kufuneka singacali nje sichumane nemimoya.—Dutheronomi 18:10-12; Imisebenti 19:18, 19.
5. Sathane uphindze adukise bantfu ngekutigcabha ngebuve nekutinikela etinhlanganweni tembusave. Labanye bacabanga kutsi sive sakubo sincono kunaletinye. Kepha loko akusilo liciniso. (Imisebenti 10:34, 35) Labanye bantfu batsembele etinhlanganweni tembusave kutsi ticatulule tinkinga tebantfu. Ngekwenta loko, abawemukeli uMbuso waNkulunkulu. Ngiwo kuphela likhambi letinkinga tetfu.—Danyela 2:44.
6. Lenye indlela Sathane ladukisa ngayo bantfu kubalinga ngetifiso tekwenta sono. Jehova usitjela kutsi sehlukane nemikhuba lemibi ngoba uyati kutsi itawusilimata. (Galathiya 6:7, 8) Labanye bantfu bangafuna ube mdzibi munye nabo kulemikhuba. Kepha khumbula, ecinisweni nguSathane lona lofuna wente letintfo.—1 Khorinte 6:9, 10; 15:33.
7. Sathane usenekusebentisa kushushiswa nobe kuphikiswa kute akwente ushiye Jehova. Labanye bantfu lobatsandzako bangatfukutsela kakhulu ngoba udadisha liBhayibheli. Labanye bangahlekisa ngawe. Kepha ngubani lophetse imphilo yakho? Sathane ufuna kukwesabisa utewuyekela kufundza ngaNkulunkulu. Ungamvumeli Sathane ancobe! (Matewu 10:34-39; 1 Phetro 5:8, 9) Ngekulwisana naDeveli, ungenta Nkulunkulu ajabule, futsi ukhombise kutsi usekela bukhosi bakhe.—Taga 27:11.
[Titfombe ekhasini 9]
Inkholo yemanga, kuchumana nemimoya, nekutigcabha ngebuve kudukisa bantfu
[Sitfombe ekhasini 9]
Lwisana naSathane ngekuchubeka ufundza ngaJehova