Sifundvo 13

Ungayitfola Kanjani Inkholo Yeliciniso?

Ngito tonkhe yini tinkholo letijabulisa Nkulunkulu, nobe nguyinye nje kuphela? (1)

Kubangelwa yini kutsi kube netinkholo letinyenti kangaka letitsi tebuKhristu? (2)

Ungawabona ngani emaKhristu eliciniso? (3-7)

1. Jesu wacala yinye inkholo yebuKhristu beliciniso. Nalomuhla kufanele kube nelibandla linye lebakhulekeli beliciniso baNkulunkulu Jehova. (Johane 4:23, 24; Efesu 4:4, 5) LiBhayibheli lifundzisa kutsi bambalwa kuphela bantfu labasendleleni lencane leya ekuphileni.—Matewu 7:13, 14.

2. LiBhayibheli latsi nasekufe baphostoli, timfundziso temanga kanye nemikhuba lengasiyo yebuKhristu bekutawungena kancane kancane ebandleni lebuKhristu. Emadvodza latsite bekatawudvonsa emakholwa kutsi alandzele wona esikhundleni saKhristu. (Matewu 7:15, 21-23; Imisebenti 20:29, 30) Ngiko sibona tinkholo letinyenti kangaka letitsi tebuKhristu. Singawabona ngani emaKhristu eliciniso?

3. Luphawu loluhamba embili lwemaKhristu eliciniso kutsi anelutsandvo sibili emkhatsini wawo. (Johane 13:34, 35) Awafundziswa kucabanga kutsi ancono kunaletinye tive. Futsi awafundziswa kwenyanya banfu balamanye emave. (Imisebenti 10:34, 35) Ngaleso sizatfu, awatingeneli timphi. EmaKhristu eliciniso aphatsana kuhle kwebantfwana bemfati.—1 Johane 4:20, 21.

4. Lolunye luphawu lwenkholo yeliciniso kutsi emalunga ayo alihlonipha ngalokujulile liBhayibheli. Atsatsa kutsi liliVi laNkulunkulu futsi ayakukholwa lelikushoko. (Johane 17:17; 2 Thimothi 3:16, 17) LiVi laNkulunkulu alitsatsa njengalelibaluleke kwendlula imicondvo yebantfu nobe emasiko. (Matewu 15:1-3, 7-9) Etama kuphila ngalokufundziswa liBhayibheli onkhe malanga. Awashumayeli lokunye abe enta lokwehlukile.—Thithusi 1:15, 16.

5. Inkholo yeliciniso kufanele iphindze ihloniphe libito laNkulunkulu. (Matewu 6:9) Jesu wabatisa labanye libito laNkulunkulu, lelitsi Jehova. NemaKhristu eliciniso kufanele ente kanjalo. (Johane 17:6, 26; Roma 10:13, 14) Bobani emmangweni wakini labatjela labanye ngelibito laNkulukulu?

6. EmaKhristu eliciniso kufanele ashumayele ngeMbuso waNkulunkulu. Jesu wenta kanjalo. Sonkhe sikhatsi bekakhuluma ngeMbuso waNkulunkulu. (Lukha 8:1) Wayala bafundzi bakhe kutsi bashumayele wona lowo mlayeto kuwo wonkhe umhlaba. (Matewu 24:14; 28:19, 20) EmaKhristu eliciniso akholwa kutsi nguMbuso waNkulunkulu kuphela longaletsa kuthula kweliciniso nekuvikeleka kulomhlaba.—Tihlabelelo 146:3-5.

7. Bafundzi baJesu kufanele bangatihlanganisi nalelive lelibi. (Johane 17:16) Abatingeneli tembusave talomhlaba netincabano tawo. Bayakubalekela kutiphatsa lokulimatako, imikhuba lemibi, netindlela tekucabanga letandzile eveni. (Jakobe 1:27; 4:4) Uyayibona yini inkholo lenaletimphawu tebuKhristu beliciniso emmangweni wakini?

[Titfombe ekhasini 26, 27]

EmaKhristu eliciniso ayatsandzana, ahlonipha liBhayibheli, futsi ashumayela ngeMbuso waNkulunkulu