Fundza EVini LaNkulunkulu

Ungayibona Ngani Inkholo Yeliciniso?

Lesihloko siphakamisa imibuto lokungenteka wake watibuta yona futsi siveta nekutsi ungatitfola kuphi timphendvulo eBhayibhelini lakho. BoFakazi BaJehova batawukujabulela kucoca nawe ngaletimphendvulo.

1. Yinye kuphela yini inkholo yeliciniso?

Jesu wafundzisa balandzeli bakhe ngenkholo yinye, inkholo yeliciniso. Ifanana nendlela leholela ekuphileni. Mayelana nalendlela, Jesu watsi: “Bantfu labayitfolako bambalwa.” (Matewu 7:14) Nkulunkulu wemukela kukhonta lokusekelwe eVini lakhe leliliciniso. Bonkhe labakhonta Nkulunkulu ngeliciniso basenkholweni yinye.—Fundza Johane 4:23, 24; 14:6; Efesu 4:4, 5.

2. Kungani titinyenti kangaka tinkholo letitsi tebuKhristu?

Baphrofethi bemanga babonile buKhristu futsi babusebentisele kutizuzisa bona. Kunjengobe Jesu asho kutsi “banjengetimvu” kodvwa balingisa timphisi letilambile. (Matewu 7:13-15, 21, 23) BuKhristu bemanga bacala ngemuva kwekufa kwebaphostoli baJesu.—Fundza Imisebenti 20:29, 30.

3. Inykholo yeliciniso yehluke njani kuletinye tinkholo?

Tikhonti teliciniso tiyalihlonipha liBhayibheli njengeliVi laNkulunkulu. Tetama ngato tonkhe tindlela kutsi tiphile ngetimiso talo. Ngako-ke, inkholo yeliciniso ayifanani nenkholo lesekelwe emibonweni yebantfu. (Matewu 15:7-9) Tikhonti teliciniso atishumayeli lokunye tibe tenta lokwehlukile.—Fundza Johane 17:17; 2 Thimothi 3:16, 17.

Inkholo yeliciniso iyalihlonipha libito laNkulunkulu lelitsi Jehova. Jesu watjela labanye ngalelibito. Wasita bantfu kutsi bamati Nkulunkulu waphindze wabafundzisa kutsi bathandazele kutsi libito laKhe lingcweliswe. (Matewu 6:9) Lapho uhlala khona, nguyiphi inkholo lesebentisa libito laNkulunkulu?—Fundza Johane 17:26; Roma 10:13, 14.

4. Ungatibona ngani tikhonti teliciniso?

EmaKhristu eliciniso ashumayela ngeMbuso waNkulunkulu. Nkulunkulu watfuma Jesu kutsi atewushumayela ngeMbuso. NguMbuso waNkulunkulu kuphela lotawucatulula tinkinga tebantfu. Jesu wakhuluma ngawo kwate kwaba lilanga lafa ngalo. (Lukha 4:43; 8:1; 23:42, 43) Watjela balandzeli bakhe kutsi nabo bashumayele ngeMbuso waNkulunkulu. Nangabe umuntfu lotsite akhuluma nawe ngeMbuso waNkulunkulu, ucabanga kutsi usuke akuyiphi inkholo?—Fundza Matewu 10:7; 24:14.

Balandzeli baJesu abasibo balelive. Abatingeneli tembusave nobe imibango. (Johane 17:16) Abayenti imikhuba lemibi yelive futsi abakulingisi kucabanga kwalo.—Fundza Jakobe 1:27; 4:4.

5. Nguluphi luphawu lolugcamile lwemaKhristu eliciniso?

EmaKhristu eliciniso ayatsandzana. EVini laNkulunkulu afundza kuhlonipha bantfu bato tonkhe tive. Nanobe inkholo yemanga ivame kusekela timphi temave, tikhonti teliciniso tona atilwi. (Mikha 4:1-4) Esikhundleni saloko, emalunga enkholo yeliciniso asebentisa sikhatsi sawo kanye netintfo lanato kute asite futsi akhutsate labanye.—Fundza Johane 13:34, 35; 1 Johane 4:20, 21.

Nguyiphi inkholo loyatiko lesekela timfundziso tayo eVini laNkulunkulu, lehlonipha libito lakhe iphindze ishumayele ngeMbuso wakhe lotawucatulula tinkinga temhlaba? Nguyiphi inkholo lenelutsandvo nalengayisekeli imphi? Emaciniso akhombisa kutsi boFakazi BaJehova.—1 Johane 3:10-12.

Kute utfole kwatiswa lokubanti, fundza sehluko 15 salencwadzi, Lifundzisani Mbambambamba LiBhayibheli?, leshicilelwa boFakazi BaJehova.

[Sitfombe ekhasini 16]

“Bavuma ngemlomo kutsi bayamati Nkulunkulu, kepha ngetento tabo bayamphika.”—Thithusi 1:16