LiPharadisi Selisedvute!

Tintfo letimbi letenteka emhlabeni nyalo tikhombisa kutsi liPharadisi lisedvute. LiBhayibheli latsi bekutawuba netikhatsi letimatima nasekusele kancane kufike liPharadisi. Siphila kuleto tikhatsi nyalo! Nati letinye tetintfo liBhayibheli lelatsi tatiyawenteka:

Timphi letinkhulu. “Ngobe sive siyawuvukela lesinye sive, nembuso uyawuvukela lomunye umbuso.” (Matewu 24:7) Lesiphrofetho siliciniso. Kusukela ngemnyaka wa-1914, kube netimphi temhlaba letimbili naletinye letincane letinyenti. Tigidzi tebantfu tafa kuto.

Kwandza kwetifo. Kwakuyawuba netifo “letitsatselwanako etindzaweni letinyenti.” (Lukha 21:11) Kube liciniso yini loku? Yebo. Umdlavuza, sifo senhlitiyo, sifuba sengati, malaleveva, sifo sengculaza, naletinye tifo tibulele tigidzi tebantfu.

Kuswelakala kwekudla. Emhlabeni wonkhe kunebantfu labete kudla lokwenele. Tigidzi tebantfu tibulawa yindlala umnyaka nemnyaka. Loku kungulenye inkhomba yekutsi liPharadisi selitawufika. LiBhayibheli litsi: “Kuyawuba netindlala.”—Makho 13:8.

Kutamatama kwemhlaba. “Kuyawuba khona . . . nekutamatama kwemhlaba tindzawo ngetindzawo.” (Matewu 24:7) Naloku kuyenteka esikhatsini setfu. Sekufe bantfu labangetulu kwesigidzi kusukela nga-1914 ngekutamatama kwemhlaba.

Bantfu lababi. Bantfu bebayawuba ‘ngulabatsandza imali’ futsi ‘batitsandze bona.’ “Batsandze kutijabulisa kunekutsi babe ngulabatsandza Nkulunkulu.” Bantfwana bebayawuba “ngulabangalaleli batali babo.” (2 Thimothi 3:1-5) Awuvumi yini kutsi banyenti bantfu labanjalo lamuhla? Bete nalencane inhlonipho ngaNkulunkulu, futsi bahlupha labo labetama kufundza ngaNkulunkulu.

Bugebengu. Bekuyawuba ‘nekwandza kwekona.’ (Matewu 24:12) Cishe nawe uyabona kutsi bugebengu sebudlange kakhulu kunakucala. Yonkhe indzawo, bantfu bahlala basengotini yekubanjwa inkunzi, nekulinyatwa.

Tonkhe letintfo tikhombisa kutsi uMbuso waNkulunkulu sewusedvute. LiBhayibheli litsi: “Nanibona letintfo tenteka, nibokwati kutsi umbuso waNkulunkulu sewutawufika.” (Lukha 21:31) Uyini uMbuso waNkulunkulu? Nguhulumende wakhe lomiswe ezulwini lotawuletsa liPharadisi kulomhlaba. UMbuso waNkulunkulu utawutsatsa sikhundla sabohulumende bebantfu.—Danyela 2:44.