UMbuso WaNkulunkulu Utawubusa Nini Emhlabeni?

Labanye balandzeli baJesu labetsembekile bebafuna kwati kutsi uMbuso waNkulunkulu utawucala nini kubusa. Jesu wabaphendvula watsi angeke bati ngalokucondzile kutsi bewutawucala nini kubusa emhlabeni. (Imisebenti 1:6, 7) Kodvwa ngembikwaloko, bekabatjele kutsi nababona tentakalo letitsite tenteka ngesikhatsi sinye, bebatakwati “kutsi uMbuso waNkulunkulu sewusondzele,” nekutsi besesidvute sikhatsi sekutsi ubuse emhlabeni.—Lukha 21:31.

NGUTIPHI LETINTFO JESU LEBEKATSITE TITAWUKWENTEKA?

Jesu watsi: “Sive siyawuvukela lesinye sive, nembuso uvukele lomunye umbuso. Kuyawuba khona kutamatama lokukhulu kwemhlaba; kube netifo letingumshayabhuce kanye nendlala etindzaweni letehlukahlukene.” (Lukha 21:10, 11) Njengemigca yetandla temuntfu (fingerprints), tonkhe letentakalo tiveta luphawu lolungeke lushintje. Njengobe imigca yemuntfu imenta ehluke kulabanye, letentakalo letenteka ngasikhatsi sinye tikhombisa kutsi “uMbuso waNkulunkulu sewusondzele.” Tentakalo letifana naleti setentekile yini emhlabeni wonkhe futsi ngesikhatsi sinye? Naka nabu bufakazi.

1. TIMPHI

Tindiza temphi, i-war tank, nema-missile.

Nga-1914, kwaba nemphi lebeyingakaze ibekhona emlandvweni webantfu! Tati temlandvo tivame kutsi ngumnyaka wa-1914 lowashintja umlandvo webantfu ngobe ngulapho kwacala khona imphi yelive yekucala. Lemphi yenta kutsi kucale kusetjentiswa kwetikhali letiyingoti letinjengetincola temphi, emabhomu lajikwa ngetindiza, tibhamu, umoya lomubi loyingoti kanye naletinye tikhali letibulalako. Kwase kulandzela imphi yelive yesibili, leyeta nekusetjentiswa kwetikhali tembhubhiso. Kusukela nga-1914, bekusolo kunetimphi etindzaweni letitsite futsi leto timphi tibulele tigidzi tebantfu.

2. KUTAMATAMA KWEMHLABA

Kutamatama kwemhlaba kubangela tindlu kutsi tibe netimfa.

I-Britannica Academic itsi njalo ngemnyaka kuba nekutamatama kwemhlaba lokucishe kube ngu-100 lokubangela “umonakalo lomkhulu.” I-United States Geological Survey itsi: “Ngekusho kwembiko wakadzeni (kusukela ngabo-1900), silindzele kutsi kube nekutamatama kwemhlaba lokungu-16 lokungenteka noma nini.” Labanye bantfu bacabanga kutsi kutamatama kwemhlaba akwandzi, kunaloko tindlela letincono tekukubona kuseta, tenta kubonakale shengatsi kuyandza, kodvwa liciniso likutsi kutamatama kwemhlaba lokwenteka emhlabeni wonkhe kubangela kuhlupheka kanye nekufa kwebantfu labanyenti kunasesikhatsini lesendlulile.

3. KUSWELAKALA KWEKUDLA

I-graph lekhombisa kuncipha kwemkhicito walokusanhlavu.

Kuswelakala kwekudla kuvame kubangelwa timphi, inkhohlakalo, kuwa kwemnotfo, kungahleleki kahle kutekulima, nobe kungasilungiseleli kahle simo lesibi selitulu lesingaba khona. Umbiko we-World Food Programme wa-2018 utsi: “Emhlabeni wonkhe, bantfu labangu-821 million bete kudla lokwanele futsi labangu-124 million kulaba bayalamba.” Indlala ibangela kufa kwebantfwana labacishe babe ngu-3.1 million njalo ngemnyaka. Ngemnyaka wa-2011, kufe bantfwana labangaba ngemaphesenti langu-45 emhlabeni wonkhe ngenca yendlala.

4. TIFO LETITSATSELWANAKO

Timphawu letikhombisa emakhemikhali layingoti.

Incwadzi ye-World Health Organization itsi: “Kulelikhulu lemnyaka lesiphila kulo, tifo letitsatselwanako setandze kakhulu. Tifo letake taba khona letinjengesifo se-diarrhea namalaleveva setiphindze tikhona, futsi sekunaletinsha letivelile letinjenge-SARS (Severe acute respiratory syndrome), sifo se-influenza, i-MERS (Middle East respiratory syndrome), i-Ebola kanye ne-Zika.” Muva nje kuvele nemkhuhlane lobitwa ngekutsi yi-COVID-19. Nanobe bososayensi nabodokotela bafundze lokunyenti ngetifo, behlulekile kutfola likhambi lato tonkhe letifo.

5. UMSEBENTI WEKUSHUMAYELA EMHLABENI WONKHE

I-arrow letungelete umhlaba kanye neliBhayibheli eceleni kwawo.

Jesu wakhuluma ngalenye incenye yaloluphawu nakatsi: “Letindzaba letimnandzi teMbuso titawushunyayelwa emhlabeni wonkhe, kuze tiviwe ngito tonkhe tive, bese-ke kuphela kuyefika.” (Matewu 24:14) Nanobe umhlaba ubhekene netinkinga letimatima, bantfu labangetulu kwa-8 million labavela etiveni tonkhe bashumayela tindzaba letimnandzi teMbuso waNkulunkulu emaveni langu-240 ngetilwimi letingetulu kwa-1 000. Loku akukase kwenteke emlandvweni webantfu.

LUSHO KUTSINI LOLUPHAWU KITSI?

Letentakalo letakha loluphawu Jesu lakhuluma ngalo tiyenteka lamuhla. Kungani kufanele sikunake loku? Kungobe Jesu watsi: “Nanibona letintfo tenteka, nibowati kutsi uMbuso waNkulunkulu sewusondzele.”—Lukha 21:31.

Jesu uhleti esihlalweni sebukhosi ezulwini, ubusa umhlaba lolipharadisi. — Madvutane, loMbuso utawucinisekisa kutsi intsandvo yaNkulunkulu iyentiwa emhlabeni

Kubonakala kwaloluphawu Jesu lakhuluma ngalo kanye nekulandzelana kwetentakalo teliBhayibheli, kusisita sicondze kutsi Nkulunkulu wamisa uMbuso wakhe ezulwini nga-1914.a Ngalowo mnyaka, wabeka iNdvodzana yakhe lenguJesu Khristu kutsi ibe yiNkhosi. (Tihlabelelo 2:2, 4, 6-9) Madvutane, uMbuso waNkulunkulu utawubusa emhlabeni, futsi utawususa bohulumende bebantfu bese wenta umhlaba uba lipharadisi kute bantfu bahlale kuwo phakadze.

Madvute, emavi emthantazo waJesu losibonelo latsi: “UMbuso wakho awute. Intsandvo yakho ayentiwe emhlabeni njengasezulwini,” atawufezeka. (Matewu 6:10) Pho yini loMbuso bewusolo uyenta ezulwini kusukela wamiswa nga-1914? Yini lesingayigadza kuloMbuso wasezulwini nasewubusa bantfu ngalokuphelele?

a Kuze utfole lokunyenti mayelana nemnyaka wa-1914, fundza sifundvo 32 sencwadzi letsi Jabulela Kuphila Kuze Kube Phakadze! leshicilelwe BoFakazi BaJehova.