‘Naka Indlela Lolalela Ngayo’

KULALELA kusici lesibalulekile sekufundza. Kungaphindze kutsintse nelitsemba lemuntfu lekusindza. Ngesikhatsi Jehova alungiselela kukhulula bantfu bakhe ebugcilini eGibhithe, waniketa Mosi ticondziso, futsi Mosi watjela baholi baka-Israyeli loko lebekufanele bakwente kute basindzise ematubulo abo ekubulaweni yingilosi. (Eks. 12:21-23) Ngemuva kwaloko, baholi baka-Israyeli bawendlulisela ngemlomo lomlayeto kuyo yonkhe imindeni. Ngako-ke, bantfu bekufanele balalelisise. Basemukela njani lesecwayiso? LiBhayibheli litsi: “Onkhe ema-Israyeli akwenta konkhe loko labetjelwe kona nguSimakadze ngaboMosi na-Aroni.” (Eks. 12:28, 50, 51) Umphumela waba kutsi ema-Israyeli akhululwe ngendlela lemangalisako.

Lamuhla, Jehova usilungiselela kusindziswa lokukhulu kunaloko. Ngako-ke, kudzingeka kutsi sisinakisise sicondziso lasiniketa sona. Leso sicondziso sisitfola emihlanganweni yelibandla. Uzuza ngalokugcwele yini kuleyo mihlangano? Loko kutawuya ngendlela lolalela ngayo.

Uyawakhumbula yini emaphuzu layinhloko emfundvo lesiyitfola emihlanganweni? Kungumkhuba wakho yini kutsi maviki onkhe ufune tindlela tekusebentisa lemfundvo ekuphileni kwakho nobe utjele labanye ngayo?

Lungisa Inhlitiyo Yakho

Kute sizuze ngalokugcwele kulemfundvo lesiyitfola emihlanganweni yebuKhristu, kufanele silungise tinhlitiyo tetfu. Kubaluleka kwekukwenta loko kubonakala kahle kulokwenteka ngesikhatsi kubusa Jehoshafati, inkhosi yakaJuda. Jehoshafati wakumelela ngesibindzi kukhonta kweliciniso. “Wesusa tonkhe tindzawo letiphakeme tekukhontela tithico kanye netinsika ta-Ashera kaJuda,” futsi wayala tindvuna, emaLevi kanye nebaphristi kutsi bafundzise bantfu uMtsetfo waJehova kuwo onkhe emadolobha akaJuda. Nanobe kunjalo, “tindzawo letiphakeme tekukhontela tithico akazange atisuse.” (2 Khr. 17:6-9; 20:33) Kwase kwandze kakhulu kukhontwa kwabonkulunkulu bemanga kanye nekukhonta Jehova ngendlela lengakafaneli, lebekwentiwa etindzaweni letiphakeme tebantfu lebebangamkhonti Nkulunkulu, kangangekutsi akuzange kucedvwe konkhe.

Yini leyabangela kutsi imfundvo leyahlelwa nguJehoshafati ingabi nemphumela lohlala njalo? Lokulandzisa kuchubeka kutsi: “Ngako bantfu tinhlitiyo tabo babengakatibeki kuNkulunkulu waboyise.” Beva nakukhulunywa, kodvwa behluleka kwenta ngekuvumelana naloko labakuva. Kungenteka kutsi bebakubona kulukhuni kuya ethempelini leliseJerusalema kute bayonikela imihlatjelo. Kunobe ngukuphi, tinhlitiyo tabo betite kukholwa.

Nangabe singafuni kubuyela emuva etindleleni telive laSathane, kufanele silungise tinhlitiyo tetfu kute semukele imfundvo Jehova lasiniketa yona lamuhla. Singakwenta njani loko? Lenye indlela lebalulekile lesingakwenta ngayo loku, kuthantaza. Kufanele sithantazele kutsi siyemukele ngekubonga imfundvo levela kuNkulunkulu. (Hla. 27:4; 95:2) Kwenta kanjalo kutasisita kutsi siyibonge imetamo yebazalwane betfu, lokutsi nanobe banesono, bavume kusetjentiswa nguJehova ekufundziseni bantfu bakhe. Kutawusenta singagcini nje ngekubonga Jehova ngetintfo letinsha lasifundzisa tona, kodvwa sitambonga nangelitfuba lekutfutfukisa kucondza kwetfu tintfo lesatifundza esikhatsini lesendlulile. Ngesizatfu sekutsi sinesifiso sekwenta intsandvo yaNkulunkulu ngalokugcwele, sithantaza sitsi: “Ngifundzise indlela yakho, Simakadze. . . . Yenta inhlitiyo yami ihlose intfo yinye: kutsi ilesabe libito lakho.”​—Hla. 86:11.

Nakisisa

Tinyenti tintfo letingasenta kutsi singalalelisisi kahle. Tingcondvo tetfu tingase tigcwale imicabango yetinkhatsato tekuphila. Singaphazanyiswa ngumsindvo kanye nekuhamba kwebantfu lokwenteka ekhatsi ehholweni nobe ngaphandle. Kungativa kahle emtimbeni kungabangela kutsi kube matima kunakisisa. Labo labanebantfwana labancane, bavame kuphazamiseka emihlanganweni. Yini lengasisita kutsi sichubeke sinakisise emihlanganweni?

Emehlo anendzima lenkhulu kuloko lesikunakako. Sebentisa emehlo akho kute akusite unakisise, ngekutsi uhlale ubuke sikhulumi ngaso sonkhe sikhatsi. Nangabe sikhulumi sitsi akuvulwe livesi leliBhayibheli​—ngisho nalelo loletayele—​livule, futsi uhambisane naso njengobe silifundza. Ungasivumeli sifiso sekugucula inhloko yakho ngaso sonkhe sikhatsi nawuva umsindvo nobe uva umuntfu ahamba. Nangabe emehlo agcwalisa ingcondvo yakho ngetintfo letiphazamisako, utawulahlekelwa nguloko lokusuke kukhulunywa ngako endzaweni yesikhulumi.

Nangabe ‘imicabango’ letsite ikwenta ungakwati kunakisisa nakuchubeka umhlangano, thantaza kuJehova umcele kutsi akuphe kuthula kwengcondvo nekwenhlitiyo kute ukwati kunakisisa. (Hla. 94:19; Fil. 4:6, 7) Nangabe kudzingeka, ungathantaza ngalokuphindzaphindziwe. (Mat. 7:7, 8) Imihlangano yelibandla isipho lesivela kuJehova. Ungaciniseka kutsi ufuna uzuze kuleyo mihlangano.​—1 Joh. 5:14, 15.

Kulalela Tinkhulumo

Kungenteka ukhone kukhumbula emaphuzu lamahle etinkhulumo lowake watilalela. Nanobe kunjalo, kulalela inkhulumo kusho lokungetulu kwekumane ulalele emaphuzu lahamba embili. Inkhulumo ifanana nekutsatsa luhambo. Nanobe kukunyenti longajabulela kukubona endleleni, umgomo loyinhloko kutsi ufike lapho uya khona. Sikhulumi singase setame kucondzisa labo labalalele kutsi bafinyelele esiphetfweni lesitsite nobe sibakhutsate kutsi batsatse sinyatselo.

Cabangela inkhulumo Joshuwa layetfula esiveni sema-Israyeli, lebhalwe kuJoshuwa 24:1-15. Umgomo wakhe bewukutsi asite bantfu bakumele ngalokucinile kukhonta kweliciniso, ngekutsi batehlukanise nekukhonta tithico lobekwentiwa tive lebetibomakhelwane. Yini lebeyenta loko kubaluleke kangaka? Kugcwala kwenkholo yemanga bekwenta lesive sibe sengotini lenkhulu yekungemukelwa nguJehova. Bantfu baphendvula kuncusa kwaJoshuwa ngekutsi batsi: “Akube khashane natsi kuhlubuka Simakadze, bese sikhonta labanye bonkulunkulu. . . . Sitamkhonta Simakadze.” Nguloko vele labakwenta!​—Josh. 24:16, 18, 31.

Nawulalele inkhulumo, yetama kutfola kutsi uyini umgomo wayo. Nakisisa kutsi emaphuzu lavetwa sikhulumi anayiphi indzima ekufinyeleleni lowo mgomo. Tibute kutsi lokwatiswa kukukhutsata kutsi wenteni.

Kulalela Nakuphendvulwa

Sifundvo se-Sicongosekulindza, Sifundvo SeliBhayibheli Selibandla kanye netincenye teMhlangano Wemsebenti tidzingidvwa ngemibuto netimphendvulo, kusetjentiswa tincwadzi letisekelwe eBhayibhelini.

Kulalela nakudzingidvwa indzaba letsite, kufanana nekutsi uyahlanganyela kuyo. Kute uzuze ngalokugcwele, lalela ngekucophelela. Hambisana nendzaba lokucocwa ngayo. Nakisisa indlela loyo lowetfula lenkhulumo lagcizelela ngayo sihloko kanye nemaphuzu layinhloko. Yiphendvule ngenhlitiyo imibuto layibutako. Lalela njengobe labanye bachaza futsi baveta indlela lokwatiswa lokusebenta ngayo. Kulalela indlela labanye labachaza ngayo lokwatiswa kungakusita ukhulise kucondza kwakho ngendzaba lokukhulunywa ngayo. Bakhutsate labanye ngekutsi uphendvule ngemavi lakhombisa kukholwa.​—Rom. 1:12.

Kukutadisha kusenesikhatsi kwatiswa lokutawucocwa ngako kungakusita kutsi ukhone kuhlanganyela futsi ukhone kulandzela njengobe labanye baphendvula. Nangabe timo takho tikwenta kube matima kutsi utadishe kahle, kuncono kutsi umane usebentise imizuzu lembalwa ngembikwekutsi kufike sikhatsi semhlangano kute uhlole kwatiswa lokutawube kucocwa ngako. Kwenta njalo kutakusita kutsi uzuze kakhudlwana kuleyo ndzaba ledzingidvwako.

Kulalela Emihlanganweni Lemincane Nalemikhulu

Emihlanganweni lemincane kanye nalemikhulu, kunetintfo letinyenti letingasiphazamisa kwendlula emihlanganweni yelibandla. Leto tintfo tingenta kulalela kube lukhuni. Yini lengasisita kuloku?

Intfo lengasisita kakhulu kutsi sitinike sikhatsi sekulala. Ngembikwekutsi kucale luhlelo lilanga ngalinye, cabangisisa ngesihloko semhlangano. Buka sihloko senkhulumo ngayinye, bese wetama kucabanga kutsi leyo nkhulumo itawube ikhuluma ngani. Lisebentise kahle liBhayibheli lakho. Bantfu labanyenti batfola kutsi kubhala kafishane emaphuzu layinhloko kubasita kutsi bagcine tingcondvo tabo tinakile. Bhala phansi emaphuzu lohlela kuwasebentisa ekuphileni kwakho kanye nasensimini. Cocani ngemaphuzu lambalwa nanisaya emhlanganweni nobe nasenibuya. Loku kutakusita kutsi ungakukhohlwa lokwatiswa.

Kucecesha Bantfwana Kutsi Balalele

Batali labangemaKhristu bangabasita bantfwana babo​—ngisho nalabancane—​kutsi ‘bahlakaniphe kuze basindziswe,’ ngekutsi baye nabo emihlanganweni yelibandla, yesifundza kanye neyesigodzi. (2 Thim. 3:15) Njengobe bantfwana behlukile ngebuntfu nangelizinga labo lekulalela, kudzingeka kucondza kute ubasite balalelisise. Kungenteka kukusite kwenta naku lokulandzelako.

Nanisekhaya, hlela tikhatsi letitsite tekutsi bantfwabakho bahlale phansi babindze bese bayafundza nobe babuka titfombe letisetincwadzini tebuKhristu. Nanisemihlanganweni yelibandla, kubalekele kusebentisa emathoyisi kute ubagcine bamatasatasa. Njengobe bekunjalo naku-Israyeli wasendvulo, nalamuhla bantfwana baba khona emihlanganweni kute “batewulalela bafundze.” (Dut. 31:12) Nabakubona kufanele, labanye batali baniketa bantfwana babo labancane emakhophi abo etincwadzi letisetjentiswako emhlanganweni. Njengobe bantfwana bakhula, basite balungiselele kute babe nencenye etinkhulumeni letidzinga timphendvulo.

ImiBhalo yembula kuhlobana lokukhona emkhatsini wekulalela Jehova nekukwenta loko lakushoko. Loko sikutfola emavini aMosi lawasho esiveni saka-Israyeli: “Ngibeke embikwenu kufa nekuphila, tibusiso neticalekiso. Ngako khetsani kuphila . . . kuze nitsandze Simakadze Nkulunkulu wenu, nive liphimbo lakhe, ninamatsele kuye.” (Dut. 30:19, 20) Lamuhla, kubalulekile kulalela imfundvo levela kuJehova nekuyisebentisa ekuphileni kwetfu, kute asemukele aphindze asibusise ngekuphila lokuphakadze. Ngako-ke, kumcoka kutsi silalele seluleko saJesu lesitsi: “Nakani indlela lenilalela ngayo.”​—Luk. 8:18.