Kulungiselela Tinkhulumo Telibandla

LUHLELO lweSikolwa Semsebenti WemaKhristu lulungiselelwe kutsi luzuzise lonkhe libandla. Kwatiswa lokulusito kuphindze kwetfulwe kuleminye imihlangano yelibandla, nasemihlanganweni yesifundza kanye neyesigodzi. Nangabe unesabelo kulomunye walemihlangano, usuke unikwe umsebenti lomkhulu. Umphostoli Pawula wakhutsata Thimothi, umbonisi longumKhristu kutsi anake indlela lafundzisa ngayo. (1 Thim. 4:16) Labo lababa khona emihlanganweni yebuKhristu, basuke basebentise sikhatsi sabo lesibalulekile futsi labanye babo basuke bente imetamo lemikhulu kute babe khona kuyo batewujabulela kutfola imfundvo lephatselene nebuhlobo babo naNkulunkulu. Kuniketa imfundvo lenjalo kulilungelo lelikhulu. Ungasifeza njani ngendlela lefanele leso sabelo?

Emaphuzu Lagcamile Ekufundvwa KweliBhayibheli

Lencenye yesikolwa isekelwe ekufundvweni kweliBhayibheli kwamaviki onkhe. Kufanele kugcizelelwe kakhulu indlela loko kwatiswa lokusebenta ngayo kitsi lamuhla. Njengobe kulandzisa lokukuNehemiya 8:8 kusitjela, Ezra kanye nalabo labenabo bafundzela bantfu liVi laNkulunkulu, ‘balichaza’ futsi babasita kutsi balicondze kahle. Kuba nesabelo semaphuzu lagcamile ekufundvwa kweliBhayibheli kukuniketa litfuba lekutsi ukwente loko.

Kufanele usilungiselele njani lesabelo? Nakungenteka, yifundze kusasele liviki nobe ngetulu incenye yeliBhayibheli lefundvwa kulelo viki. Ngemuva kwaloko, cabanga ngelibandla kanye netidzingo talo. Thantaza ngaloko. Ngusiphi seluleko, tibonelo netimiso letikulencenye yeliVi laNkulunkulu letihlangabetana naleto tidzingo?

Kucwaninga kubalulekile. Ikhona yini i-“Watchtower Library” leku-CD-ROM nobe i-“Watch Tower Publications Index” ngelulwimi lwakho? Nangabe letintfo tikhona, tisebentise. Ngekwenta lucwaningo kuloko lesekuvele kushicilelwe mayelana nemavesi lowakhetsile, ungatfola imininingwane lewakhanyisako, tinchazelo letimayelana nekugcwaliseka kwetiphrofetho, kuhlatiywa kwemavesi latsite kutsi achazani ngaJehova nobe kuchazwa kwetimiso. Ungahlanganisi emaphuzu lamanyenti kakhulu. Namatsela emavesini lambalwa. Kuncono kuchaza emavesi lambalwa futsi loko ukwente kahle.

Sabelo sakho sifaka ekhatsi nekucela labo labakulalele kutsi basho indlela labazuze ngayo ekufundvweni kweliBhayibheli kwalelo viki. Yini labayitfolile letawubazuzisa esifundvweni labatichubela sona, ekukhonteni kwemndeni, emsebentini wekushumayela nobe ekuphileni kwabo? Ngubuphi bunguye baJehova lobuvetwa yindlela lasebentelana ngayo nebantfu kanye netive? Yini labayifundzile labo labakulalele lecinise kukholwa kwabo futsi lebenta bambonge Jehova? Ungahlali emininingwaneni leminyenti. Gcizelela loko lokushiwo ngemaphuzu lowakhetsile kanye nendlela lasebenta ngayo.

Tinkhulumo Letisekelwe Etincwadzini TebuKhristu

Letinkhulumo titsatfwa etincwadzini letishicilelwe njengetihloko te-Sicongosekulindza nobe i-“Phaphama!” nobe encenyeni letsite yencwadzi. Esikhatsini lesinyenti utfola kwatiswa lokunyenti kakhulu kunesikhatsi loniketwe sona. Kufanele usente njani lesabelo? Kufanele ufundzise, ungamane nje ukhulumele kwatiswa lokutfolile. Umbonisi kufanele ‘akwati kufundzisa.’​—1 Thim. 3:2.

Cala kulungiselela inkhulumo yakho ngekutadisha kwatiswa lokwabelwe. Fundza imibhalo lekhonjiwe bese uyazindla. Yetama kwenta loko kusenesikhatsi ngembikwelilanga lenkhulumo yakho. Khumbula kutsi bazalwane bakhutsatwa kutsi bakufundze kwatiswa kwetinkhulumo ngembikwekuya emihlanganweni. Sabelo sakho akusiko nje kumane ubukete lokwatiswa nobe ukufishanise kodvwa kutsi ukhombise indlela lokwatiswa lokusebenta ngayo. Sebentisa tincenye letifanele talokwatiswa ngendlela letawuzuzisa libandla.

Njengobe nje nemntfwana ngamunye anebuntfu bakhe lobehlukile, nelibandla ngalinye linetidzingo talo. Umtali lofundzisa ngelikhono akamane nje akhulume ngetimiso tekutiphatsa nemntfwana wakhe kodvwa uyabonisana naye. Uyacabanga ngebuntfu baloyo mntfwana kanye netinkinga letimcindzetelako. Ngendlela lefananako, bafundzisi ebandleni betama kucondza tidzingo tebantfu labakhuluma nabo. Nobe kunjalo, umfundzisi lonekucondzisisa utakubalekela kusebentisa tibonelo letingabangela emahloni kulomunye walabamlalele. Utawuveta tinzuzo lesevele tijatjulelwa libandla ngekuhamba etindleleni taJehova futsi utawugcamisa seluleko semiBhalo lesitawusita libandla kutsi lilwisane ngemphumelelo netinkinga lelibhekana nato.

Kufundzisa ngelikhono kuyatitsintsa tinhlitiyo talabalalele. Loko kudzinga kutsi ungamane nje usho emaciniso latsite, kodvwa wente labo labakulalele kutsi bakutsandze loko lokushoko. Kudzinga nekutsi ubakhatsalele labo lobafundzisako. Belusi kufanele bawati kahle umhlambi. Nangabe bahlale batikhumbula tinkinga labanye kuwo labahlangabetana nato, batawukhona kubakhutsata, bakhombise kusicondza simo labakuso baphindze bavelane nabo.

Bafundzisi labanelikhono bayati kutsi inkhulumo kufanele ibe nemgomo locacile. Kwatiswa kwayo kufanele kwetfulwe ngendlela yekutsi emaphuzu layinhloko agcame futsi akhumbuleke. Labalalele kufanele bakhone kuwakhumbula emaphuzu labatawasebentisa ekuphileni kwabo.

Umhlangano Wemsebenti

Kuba simo lesehlukile nawabelwe kwetfula inkhulumo lesekelwe ku-Msebenti Wetfu WeMbuso. Kuyo, ungase utjelwe kutsi ucoce nebantfu labakulalele ngako konkhe kwatiswa loniketwe kona, ungakhetsi lokubonakala kuncono. Sita labo labakulalele kutsi bazindle ngemibhalo lokusekelwe kuyo nome ngabe ngusiphi seluleko lesiniketiwe. (Thit. 1:9) Sikhatsi sisuke sikaliwe, ngako-ke etikhatsini letinyenti angeke ukhone kufaka lokunye kwatiswa.

Ngalesinye sikhatsi, ungacelwa kutsi wetfule kwatiswa lokungatfolakali ku-Msebenti Wetfu WeMbuso. Kungase kutsiwe kutsatse esihlokweni lesiku-Sicongosekulindza nobe uniketwe emaphuzu lambalwa. Kushiyelwa kuwe njengemfundzisi kutsi ucabange ngetidzingo telibandla letihlobana nekwatiswa lowabelwe kona. Kungase kudzingeke nekutsi usebentise umfanekiso lomfishane nobe ulandzise lokuhlangenwe nako lokuhambisana naleyo ndzaba. Khumbula kutsi sabelo sakho asisiko nje kumane ukhulume ngalendzaba, kodvwa indlela lowetfula ngayo inkhulumo yakho kufanele isite libandla liwufeze umsebenti loshiwo liVi laNkulunkulu futsi likujabulele kuwenta.​—Imis. 20:20, 21.

Nawusalungiselela sabelo sakho, cabanga ngetimo talabo labasebandleni. Bancome ngaloko lesebavele bakwenta. Kusebentisa emaphuzu lavetwe kulokwatiswa lowabelwe kona kungakukhulisa njani kuphumelela kwabo kanye nenjabulo yabo emsebentini wekushumayela?

Lesabelo sakho sinawo yini umboniso nobe incociswano? Nangabe kunjalo, kufanele wente emalungiselelo kusenesikhatsi. Kungaba melula kutikhandza sewucela lotsite kutsi akwentele lawo malungiselelo, kodvwa loko akubi nemiphumela lemihle ngaso sonkhe sikhatsi. Nakungenteka, phrakthizani lomboniso nobe lencociswano ngembikwekutsi kufike lilanga lemhlangano. Ciniseka kutsi lencenye yesabelo sakho yentiwa ngendlela letawukhanyisa loko lesikufundziswako.

Imihlangano Lemincane Nalemikhulu

Bazalwane labanesimo lesihle sebuKhristu labaphindze babe tikhulumi letiphumelelako ekufundziseni linyenti, bangase babelwe kutsi babe nencenye eluhlelweni lwemhlangano lomncane nobe lomkhulu. Lemihlangano itikhatsi letibalulekile lesitfola ngato imfundvo levela kuNkulunkulu. Umzalwane lowabelwe angase atfole inkhulumo lefundvwako, nobe luhlaka, ticondziso tedrama yeliBhayibheli lesebenta esikhatsini salamuhla nobe sigaba lesineticondziso. Nangabe utfole sabelo kulemihlangano, kutadishe kahle kwatiswa lonikwe kona. Chubeka ukutadisha udzimate ucondze kahle kutsi kubaluleke ngani.

Labo lababelwe inkhulumo lefundvwako kufanele bayifundze njengobe injalo. Akukafaneli bawahlele kabusha emagama nobe loko kwatiswa. Kufanele batadishe lokwatiswa kute bawacondze kahle emaphuzu layinhloko kanye nendlela latfutfukiswe ngayo. Nabayiphrakthiza, bayifundza ngelivi lelivakalako badzimate bakhone kuyetfula ngendlela legcizelela imicondvo lefanele, ngemdlandla, ngemusa, ngalokusuka enhlitiyweni, ngekutimisela, ngekuciniseka kanye nangelivi lelifanele bantfu labanyenti.

Bazalwane labaniketwe inkhulumo leseluhlakeni kufanele batfutfukise lokwatiswa ngendlela letabenta banamatsele eluhlakeni. Esikhundleni sekutsi sikhulumi sifundze luhlaka nasetfula lenkhulumo nobe siyilungiselele njengenkhulumo lefundvwako, kufanele siyetfule ngekushelela, futsi sikhulume ngalokusuka enhlitiyweni. Kubalulekile kunamatsela esikhatsini lesibhalwe eluhlakeni kute ukwati kwetfula liphuzu ngalinye leliyinhloko ngendlela lecacile. Sikhulumi kufanele siwasebentise kahle emaphuzu kanye nemibhalo lengaphansi kwemaphuzu layinhloko. Akukafaneli sengete emaphuzu aso latawenta kutsi emaphuzu laseluhlakeni asale ngephandle. Sisekelo salenkhulumo liVi laNkulunkulu. Umsebenti walabadzala labangemaKhristu ‘kushumayela livi.’ (2 Thim. 4:1, 2) Ngako-ke sikhulumi kufanele siyinakisise imibhalo leseluhlakeni, siyichaze kahle futsi sibonise nekutsi isebenta njani.

Ungephuti Kulungiselela

Ebandleni lokulo kunematfuba lamanyenti yini ekufundzisa? Uwasebentisa njani lawo matfuba? Kubalekele kulungiselela tinkhulumo takho ngemzuzu wekugcina.

Tinkhulumo letilizuzisa mbamba libandla tidzinga kucatjangelwa kahle kusenesikhatsi. Ngako-ke, tetayete kufundza kwatiswa lonikwe kona nawucedza nje kutfola sabelo ngasinye. Loko kutakusita kutsi uzindle ngako njengobe uchubeka nekwenta letinye tintfo. Emalangeni nobe emavikini langembikwelilanga lenkhulumo yakho, ungase uve emaphuzu latsite langakusita ubone indlela longakusebentisa ngayo lokwatiswa ngalokuphumelelako. Kungenteka kuvele timo letembula kutsi lokwatiswa kufike ngesikhatsi. Kutsatsa sikhatsi kutsi ufundze futsi uzindle ngesabelo sakho ngemuva nje kwekusitfola, kodvwa ungabe usisebentise kahle sikhatsi sakho. Lapho sewucala kulungiselela luhlaka lwakho, kutawuba melula ngobe ube nesikhatsi lesenele sekucabanga ngayo. Kulungiselela tabelo takho ngalendlela kutakunciphisela kucindzeteleka kuphindze kukusite wetfule tinkhulumo takho ngendlela levakalako naletsintsa tinhlitiyo talabo labakulalele.

Ngelizinga losijabulela ngalo sipho lophatsiswe sona lesitsintsa imfundvo Jehova layinika bantfu bakhe, utamhlonipha Nkulunkulu uphindze ube sibusiso kulabo labamtsandzako.​—Isa. 54:13; Rom. 12:6-8.