Luhlelo Lwekutfutfukisa Likhono Lekuba Sikhulumi Nekuba Ngumfundzisi
NOME ngabe umncane nome umdzala, umdvuna nobe umsikati, lesikolwa singakusita kuze ukhone kukhuluma kahle nalabanye futsi ukufanele kancono kuba ngumfundzisi weliVi laNkulunkulu.
Umbonisi wesikolwa nguye lotawabela labo lababhalise eSikolweni Semsebenti WemaKhristu. Emakhasini lamatsatfu lalandzelako utawutfola lifomu lakho leseluleko. Tinombolo letisekucaleni kweliphuzu ngalinye tihambisana netifundvo letitfolakala emakhasini lalandzelako. Kuletifundvo utawutfola inchazelo yekutsi yini ledzingekako kute ufundze lamakhono lehlukehlukene ekukhuluma kanye nekufundzisa, nekutsi kungani ngalinye lawo libalulekile. Utawutfola ticondziso letilusito tendlela longakufeza ngayo loko lokunconywa kutsi ukwente.
Imibala letfolakala efomini leseluleko yentelwe kukhombisa emaphuzu lasebentako etabelweni letitsintsa (1) kufundzela linyenti, (2) umboniso lonebantfu lababili nome ngetulu, nobe (3) inkhulumo leyetfulelwa libandla. Umbonisi wesikolwa utawukwabela liphuzu lotawusebentela kulo. Kuncono kutsi usebentele ephuzwini linye ngesikhatsi. Kuyazuzisa kwenta tivivinyo lokunconywa kutsi utente letitfolakala ekupheleni kwesifundvo ngasinye. Nakubonakala kutsi usisebentisile seluleko lesitfolakala esifundvweni lobewabelwe sona, umeluleki utakwabela lelinye liphuzu.
Nangabe inkhulumo yakho utayetfula njengemboniso, kufanele ubhale nekuhlelwa kwayo. Luhla lwekuhlelwa kwetinkhulumo letiyimiboniso lutfolakala ekhasini 82 kodvwa ungakusebentisa nalokunye lokungekho kulo. Umeluleki angase ancome kutsi usebentise kuhlelwa kwenkhulumo lokutsite kute utfole lokuhlangenwe nako nobe akushiyele kuwe kutsi ukukhetse.
Kufundza lencwadzi kanye nekwenta tivivinyo ngisho nome ute sabelo esikolweni, kungakusita kakhulu kutsi utfutfuke. Mhlawumbe ungafundza sifundvo lesehlukile liviki ngalinye.
Ngisho nome sewunesikhatsi lesidze kangakanani ubhalisile kulesikolwa nome ushumayela, usengatfutfuka. Shengatsi ungazuza ngalokugcwele kulemfundvo letfolakala eSikolweni Semsebenti WemaKhristu.