Kugcizelela Ngendlela Lefanele Nawufundza Imibhalo

NAWUKHULUMA nalabanye ngetinjongo taNkulunkulu, kungaba sendzaweni yesikhulumi nobe kulenye indzawo, loko lokhuluma ngako kufanele kusekelwe eVini laNkulunkulu. Esikhatsini lesinyenti, loku kudzinga kutsi imibhalo uyifundze eBhayibhelini, futsi loku kufanele kwentiwe kahle.

Kugcizelela Ngendlela Lefanele Kudzinga Kutsi Uvete Imiva. Kufanele uvete imiva nawufundza imiBhalo. Cabanga nganati tibonelo: Nawufundza Tihlabelelo 37:11 ngelivi lelivakalako, livi lakho kufanele livete kutsi ukulangatelela ngenjabulo kuthula lesetsenjiswa kona kulombhalo. Nawufundza ngekuphela kwekuhlupheka nekufa kuSembulo 21:4, livi lakho kufanele livete kubonga ngekukhululwa lokukhulunywa ngako kulombhalo. Sembulo 18:2, 4, 5, lesisincusa kutsi siphume ‘eBhabhulona Lenkhulu’ legcwele tono, kufanele sifundvwe ngelivi leliveta kutsi loku kuyaphutfuma. Nome kunjalo, imiva kufanele isuke enhlitiyweni kodvwa akukafaneli ivetwe ngendlela leyecisako. Indlela lefanele yekuveta imiva incunywa ngumbhalo lowufundzako kanye nendlela losetjentiswe ngayo.

Gcizelela Emagama Lafanele. Nangabe ukhuluma ngencenye letsite yelivesi, leyo ncenye kufanele uyigcizelele nawulifundza. Sibonelo saloko kutsi nawufundza Matewu 6:33, ngeke ugcizelele emavi latsi “nekulunga kwakhe” nobe latsi “tonkhe leletinye tintfo” nangabe ucondze kuchaza lokushiwo ‘kufuna kucala uMbuso.’

Enkhulumeni lotayetfula eMhlanganweni Wemsebenti, ungase uncume kufundza Matewu 28:19. Ngumaphi emavi lokufanele uwagcizelele? Nawufuna kukhutsata lokhuluma nabo kutsi bakukhutsalele kucalisa tifundvo teliBhayibheli ensimini, gcizelela emavi latsi ‘nente bantfu babe bafundzi.’ Kodvwa nawuhlela kucoca ngemtfwalo wemaKhristu wekukhuluma ngemaciniso eliBhayibheli nebantfu labachamuka kulamanye emave, nobe nangabe ufuna kukhutsata bamemeteli labatsite kutsi baye lapho kunesidzingo lesikhulu khona, ungase ugcizelele emavi latsi “bato tonkhe tive.”

Esikhatsini lesinyenti umbhalo ufundvwa kuze uphendvule umbuto nobe kuze ucacise indzaba letsite bantfu labaphikisana ngayo. Nangabe onkhe emagama lakulelo vesi uwagcizelela, labakulalele bangase bangaboni kutsi lokushoko kuhlangana njani. Wena kungase kukukhanyele loku kodvwa bona kungabakhanyeli.

Nasi sibonelo: Nawufundza Tihlabelelo 83:18 eBhayibhelini lelineligama laNkulunkulu bese ugcizelela kakhulu emavi latsi, “Losetikwako Konkhe,” lococa naye angase angalicondzi liciniso lelisebaleni lekutsi Nkulunkulu uneligama. Kufanele ugcizelele ligama lelitsi “Jehova.” Kodvwa nawukhuluma ngebukhosi baJehova, kufanele ugcizelele kakhulu emavi latsi “Losetikwako Konkhe.” Ngendlela lefanako, nawufundza Jakobe 2:24 kuze uvete kubaluleka kwekutsi kukholwa kuhambisane nemisebenti, kugcizelela kakhulu emavi latsi “wemukeleka kuNkulunkulu ngekutsi ulungile” esikhundleni sekugcizelela ligama lelitsi “nangemisebenti,” kungabangela kutsi labanye labakulalele bangaliva leliphuzu.

Lesinye sibonelo lesilusito singatfolakala kuRoma 15:7-13. Lamavesi ayincenye yencwadzi umphostoli Pawula layibhalela libandla lebelakhiwa bantfu beTive kanye nemaJuda emdzabu. Kulamavesi, lomphostoli uveta kutsi umsebenti waKhristu awuzuzisi emaJuda lasokile kuphela, kodvwa uzuzisa nebantfu baletinye tive “kuze netive titewukhatimulisa Nkulunkulu ngenca yemusa wakhe.” Ngemuva kwaloko Pawula ucaphuna imibhalo lemine kuze avete litfuba lelivulekele nebantfu betive. Kufanele uwafundze njani lamavi Pawula lawacaphunako kuze ugcizelele loko labecabanga ngako? Nangabe ubekisa emagama lofuna kuwagcizelela, ungase udvwebele latsi “netive” kuvesi 9, “nine tive” kuvesi 10, “nonkhe nine tive” kuvesi 11 nalelitsi “tive” kuvesi 12. Yetama kugcizelela lamagama nawufundza Roma 15:7-13. Nawenta njalo, loko Pawula labekhuluma ngako kutawucaca kakhulu kuphindze kube melula kukucondza.

Tindlela Tekugcizelela. Emagama lacuketse umcondvo lofuna kuwugcamisa, angase agcizelelwe ngetindlela letehlukahlukene. Indlela loyisebentisako kufanele ihambisane nembhalo nekuhlelwa kwenkhulumo. Ase sicoce ngaletimbalwa longatisebentisa.

Kugcizelela ngelivi. Loku kufaka ekhatsi kushintjashintja livi kuze emagama lacuketse umcondvo agcame emshweni. Lokugcizelela ungase ukwente ngekushintjashintja kuphakama kwelivi, mhlawumbe ulikhulise nobe ulinciphise. Etilwimini letinyenti, ungagcizelela ngekushintjashintja kuphakama nekwehla kwelivi, kantsi kuletinye loko kungawushintja wonkhe umcondvo. Nangabe unensa emaphuzwini layinhloko, loko kuwenta abe nesisindvo. Etilwimini lapho kungavumi khona kutsi ugcizelele emagama ngelivi, kutawudzingeka kutsi ugcizelele nganobe nguyiphi indlela lefanele kulolo lwimi.

Kuhlaba likhefu. Loku ungakwenta ngaphambi nobe ngemuva kwekufundza incenye lofuna kuyigcamisa kuloyo mbhalo, nobe ukwente kokubili kuleyo ncenye. Kuhlaba likhefu ngaphambi kwekufundza umcondvo loyinhloko kwenta labakulalele balangatelele kuva loko lotakufundza, kantsi kulihlaba ngemuva kwekuwufundza kungawenta ugcame. Kodvwa nangabe ulihlaba kanyenti likhefu, kute lokutawugcizeleleka.

Kuphindzaphindza. Ungase ugcizelele liphuzu lelifanele ngekutsi ubindze kancane bese uphindze uyalifundza lelogama nome lowo mushwana. Indlela lencono kutsi ulifundze ulicedze livesi bese uphindza emavi layinhloko.

Kushukumisa umtimba. Kushukuma kwemtimba kanye nesimo sebuso kungase kwengete imiva nawufundza ligama nome umusho.

Indlela livi lelivakala ngayo. Kuletinye tilwimi, emagama angase afundvwe ngendlela letawutsintsa inchazelo yawo futsi iwente ehluke. Nalapha futsi kufanele ucaphele, ikakhulukati nawusebentisa emavi lahhalatisako.

Nangabe Umbhalo Ufundvwa Ngulomunye Umuntfu. Nangabe lococa naye ensimini afundza umbhalo, angase agcizelele emagama langakafaneli nome angawagcizeleli nhlobo. Yini longayenta? Esikhatsini lesinyenti kuncono kuyicacisa kahle inchazelo yawo ngekutsi uvete kutsi usebenta njani. Nasewukwentile loko, ungase ugcizelele emagama lacuketse umcondvo loyinhloko kuloyo mbhalo.