Khombisa Kutsi Uyamnaka Loyo Lokhuluma Naye

NASICOCA nalabanye ngemaciniso eliBhayibheli, kufanele sente lokungetulu kwekumane sibanikete lolo lwati. Kufanele sifinyelele tinhlitiyo tabo. Lenye indlela yekwenta loku kutsi sikhombise kutsi sibanaka ngalokusuka enhlitiyweni labo lesikhuluma nabo. Loku singakukhombisa ngetindlela letehlukehlukene.

Yinake Imibono Yalabo Lokhuluma Nabo. Umphostoli Pawula wayinaka indlela bantfu labekhuluma nabo lebebaphila ngayo kanye nendlela lebebacabanga ngayo. Watsi: “KumaJuda ngaba njengemJuda, kuze ngizuze emaJuda; kulabangephansi kweMtsetfo ngaba njengalongephansi kweMtsetfo, ngisho nobe ngingekho ngephansi kweMtsetfo, kuze ngizuze labo labangephansi kweMtsetfo. Kulabete uMtsetfo ngaba njengalote uMtsetfo, nanobe mine ngingasuye lote uMtsetfo kuNkulunkulu kodvwa ngingephansi kweMtsetfo kuKhristu, kuze ngizuze labo labete uMtsetfo. Kulababutsakatsaka ngaba butsakatsaka, kuze ngizuze lababutsakatsaka. Ngibe ngiko konkhe kubantfu bato tonkhe tinhlobo, kuze kutsi nakungenteka ngisindzise labatsite. Ngenta tonkhe tintfo ngenca yetindzaba letimnandzi, khona ngitewutihlanganyela nalabanye.” (1 Khor. 9:20-23) Lamuhla, singaba njani “ngiko konkhe kubantfu bato tonkhe tinhlobo”?

Nawungatinika litfuba lekutsi ubanake kafishane bantfu ngembikwekutsi ukhulume nabo, utawutibona tintfo labatitsandzako kanye netimo tabo. Ungabona yini kutsi benta muphi umsebenti? Kukhona yini lokubonako lokuveta kutsi yini labayikholelwako? Kukhona yini lokukhombisa kutsi sinjani simo semndeni wabo? Usebentisa loko lokubonile, ungayishintja yini inshumayelo yakho kuze ikhange kulabo lokhuluma nabo?

Kuze inshumayelo yakho ikhange, kudzingeka kutsi ucabange kusengaphambili ngekutsi utawukhuluma njani nebantfu ensimini yenu. Kuletinye tindzawo, labantfu bafaka ekhatsi labo labasuka kulamanye emave. Nangabe ensimini yenu kunebantfu labanjalo, ikhona yini indlela loyitfole iphumelela yekufakaza kubo? Njengobe kuyintsandvo yaNkulunkulu kutsi “tonkhe tinhlobo tebantfu tisindziswe, titfole nelwati lolungulonalona lweliciniso,” kwente umgomo wakho kutsi tindzaba letimnandzi teMbuso tikhange kubo bonkhe bantfu.​—1 Thim. 2:4.

Lalelisisa. Ngisho nobe Jehova ati konkhe, uyabalalela labanye. Umphrofethi Mikhaya wabona umbono lapho Jehova abekhutsata khona tingilosi kutsi tisho imibono yato mayelana nendlela yekusingatsa indzaba letsite. Nkulunkulu wabese uvumela lenye yetingilosi kutsi yente loko lebeyikuncomile. (1 Khos. 22:19-22) Ngesikhatsi Abrahama aveta kukhatsateka kwakhe mayelana nesehlulelo lebesitawukhishwa eSodoma, ngemusa Jehova wamvumela kutsi avete imiva yakhe. (Gen. 18:23-33) Emsebentini wetfu wekushumayela, singasilingisa njani lesibonelo saJehova sekulalela?

Khutsata labanye kutsi bavete imibono yabo. Buta umbuto lofanele, bese uyema ubalindzele kutsi baphendvule. Balalelisise. Kubanaka kwakho kutawubakhutsata kutsi bakhulume ngekukhululeka. Nangabe emphendvulweni yabo ubona lokutsite lokubatsintsako, ngekuhlakanipha babute kabanti ngako. Kunekutsi ubahlabe ngemibuto leminyenti, yetama kubati kancono. Bancome ngekuveta imibono yabo, futsi loko ukwente ngalokusuka enhlitiyweni. Ngisho nobe ungavumelani naloko labakushoko, bancome ngemusa ngekuveta imibono yabo.​—Khol. 4:6.

Kodvwa-ke kufanele sicaphele nasinaka labanye bantfu, kuze loku singakwenti ngendlela leyecisako. Kukhatsalela labanye akusiniki imvume yekutsi sitigace etindzabeni tabo. (1 Phet. 4:15) Kufanele sicaphele kuze umuntfu webulili lobehlukile angabese ucabanga lokunye ngemusa lesimkhombisa wona. Njengobe indlela lefanele yekukhombisa kutsi umuntfu uyamnaka yehluka kuye ngetindzawo nangebantfu, kudzingeka sisebentise kuhlakanipha.​—Luk. 6:31.

Kulungiselela kuyasita kuze ulalelisise. Nangabe sikwati loko lesikhuluma ngako, loko kutawusisita kutsi sikhululeke futsi sibanakisise labanye. Loku kubenta bakhululeke futsi bafune kukhuluma natsi.

Sikhombisa kubahlonipha labanye ngekutsi sibalalele. (Rom. 12:10) Loku kubenta babone kutsi sinendzaba naloko labakushoko kanye nendlela labativa ngayo. Loku kungabenta nekutsi bakulalelisise loko lesikushoko. Kungaleso sizatfu-ke liVi laNkulunkulu liseluleka kutsi ‘sisheshe kulalela, sephute kukhuluma.’​—Jak. 1:19.

Sita Labanye Kutsi Batfutfuke. Kukhatsalela labanye kutawusenta kutsi sihlale sicabanga ngalabo labakhombise inshisekelo nekutsi sibuyele kubo kuze sicoce nabo ngemaciniso eliBhayibheli lenetisa tidzingo tabo. Nawulungiselela kubuyela kubantfu lococe nabo, cabanga ngetintfo lotinakile ngabo ekuhambeleni kwakho kwekucala. Lungiselela indzaba lebatsintsako. Gcizelela kubaluleka kwaloko lenicoca ngako, ubasite babone kutsi bangazuza kanjani kuloko labakufundzako.​—Isa. 48:17.

Nangabe loyo lococa naye aveta simo lesitsite nobe inkinga lebeyisolo imkhatsata, loko kutsatse njengelitfuba lelihle lekucoca naye ngetindzaba letimnandzi. Landzela sibonelo saJesu labehlala akulungele kudvudvuta labo labacindzetelekile. (Mak. 6:31-34) Ungajaki kuniketa umuntfu likhambi nobe kumniketa seluleko ungakacabangi. Loku kungamenta acabange kutsi awunandzaba naye. Kunaloko, khombisa kutsi uyavelana naye. (1 Phet. 3:8) Cwaninga etincwadzini letisekelwe eBhayibhelini, bese umniketa kwatiswa lokutamsita kutsi abhekane nesimo lakuso. Nawumkhatsalela umuntfu lococa naye angeke wembule timfihlo takhe, ngaphandle nakunesidzingo sekwenta njalo.​—Taga 25:9.

Bantfu lokufanele sibakhatsalele kakhulu ngulabo lesibafundzela liBhayibheli. Cabanga ngetidzingo temuntfu ngamunye lofundza naye, futsi uthantaze ngato, bese ulungiselela leso sifundvo senu unaleto tidzingo engcondvweni. Tibute: ‘Yini lesekudzingeka ayente kuze achubeke atfutfuka?’ Ngelutsandvo, msite akucondze loko lokushiwo liBhayibheli kanye netincwadzi letilungiselelwa ‘sisebenti lesetsembekile nalesihlakaniphile’ ngalendzaba. (Mat. 24:45) Kuletinye timo, kuniketa umuntfu inchazelo akukeneli. Kungase kudzingeke ukhombise lofundza naye kutsi simiso lesitsite lesiseBhayibhelini sisebenta njani, mhlawumbe nente lokutsite ndzawonye lokutamkhombisa loko.​—Joh. 13:1-15.

Nasisita bantfu kutsi baphile ngekuvumelana netimiso taJehova kudzingeka sibe nekucondza futsi sibacabangele. Timo kanye nemakhono ebantfu akufani, futsi batfutfuka ngemazinga langafani. Bonisa kucabangela kuloko lokulindzele kulabanye. (Fil. 4:5) Ungabaphoceleli kutsi bente lushintjo ekuphileni kwabo. Vumela liVi laNkulunkulu kanye nemoya wakhe kutsi kubakhutsate. Jehova ufuna kutsi bantfu bamkhonte ngekutitsandzela, hhayi ngekuphocelelwa. (Hla. 110:3) Ungaveti imibono yakho etincumeni labatentako. Ngisho nobe labanye bakucela kutsi wente njalo, kufanele ucaphele kutsi ungabenteli tincumo.​—Gal. 6:5.

Banikete Lusito Loluphatsekako. Nanobe Jesu abekhatsalela kakhulu tidzingo tebantfu letiphatselene nekwati Nkulunkulu, abetinaka naletinye tidzingo tabo. (Mat. 15:32) Ngisho nobe site tintfo letinyenti, kunetindlela letinyenti lesingatisebentisa kuze sibasite.

Kukhatsalela labanye kutawusenta kutsi sibacabangele. Nasi sibonelo: Nangabe simo selitulu simphazamisa umuntfu lococa naye, sukani niye endzaweni lencono, nobe nihlele kuchubeka ngalesinye sikhatsi. Nangabe ufike ngesikhatsi lesibi, hlela kubuya ngalesinye sikhatsi. Nangabe makhelwane nobe umuntfu lokhombise inshisekelo agula nobe asesibhedlela, khombisa kutsi uyamkhatsalela ngekutsi umtfumelele likhadi nobe incwadzi lemfisha, nobe umvakashele. Nangabe kufanele, ungamphatsela kudla nobe umsite ngalokunye.

Njengobe bantfu lesibafundzelako batfutfuka, bangahle bative banesitunge ngobe abasacitsi sikhatsi lesinyenti nebantfu lebebetayelene nabo. Bani ngumngani wabo. Citsa sikhatsi ukhuluma nabo ngemuva kwesifundvo senu nobe ngaletinye tikhatsi. Bakhutsate kutsi bakhe bungani nebantfu labakahle. (Taga 13:20) Basite kutsi babe khona emihlanganweni yebuKhristu. Hlala nabo kulemihlangano, futsi ubasite ngekunaka bantfwana babo kuze bonkhe bazuze.

Banake Ngalokusuka Enhlitiyweni. Kunaka bantfu akusilo nje likhono umuntfu langaba nalo, kodvwa kusuka enhlitiyweni. Lizinga lesibanaka ngalo labanye bantfu lingabonakala ngetindlela letinyenti. Loku kungabonakala ngendlela lesilalela ngayo kanye nangaloko lesikushoko. Kungabonakala ngemusa lesiwubonisa labanye kanye nangendlela lesibacabangela ngayo. Ngisho nobe singasho lutfo nobe sente lokutsite, kubakhatsalela kwetfu kungabonakala nangesimo setfu sengcondvo kanye nangesimo sebuso. Nangabe sibakhatsalela mbamba labanye, batawukhona kukubona loko.

Sizatfu lesibaluleke kakhulu sekubanaka ngalokusuka enhlitiyweni labanye kutsi nasenta njalo, silingisa lutsandvo kanye nemusa waBabe wetfu losezulwini. Loku kusita kutsi labo lesicoca nabo basondzele kuJehova futsi batitsandze tindzaba letimnandzi lasinike tona kutsi sititjele labanye. Ngako-ke njengobe utjela labanye letindzaba letimnandzi, timisele kutsi ‘ungaticabangeli wena kuphela, kodvwa ucabangele nalabanye.’—Fil. 2:4.