Emaphuzu Layinhloko Agcanyisiwe

AYINI emaphuzu layinhloko enkhulumeni? Lawa akusiwo emaphuzu lomane uwasho nje bese uyendlula. Lena yimicondvo leyinhloko loyichaza kabanti, futsi lebalulekile kuze ukhone kufeza umgomo wakho.

Intfo lebaluleke kakhulu kuze ukhone kwenta lamaphuzu layinhloko agcame kutsi uwakhetse futsi uwahlele ngekuhlakanipha emaphuzu lotawasebentisa. Esikhatsini lesinyenti, nawucwaninga utfola kwatiswa lokunyenti kunaloko lotakusebentisa. Ungancuma njani kutsi ngukuphi lotakusebentisa?

Kwekucala, cabanga ngalabo labatawube bakulalele. Abakayetayeli yini kangako indzaba yakho, nobe bayati kahle? Labanyenti babo bayavumelana yini naloko lokushiwo liBhayibheli ngaleyo ndzaba, nobe labanye banekungabata? Ngutiphi tinkinga labahlangabetana nato malanga onkhe nabasebentisa loko liBhayibheli lelikushoko ngaleyo ndzaba? Kwesibili, ciniseka kutsi uwukhumbula kahle umgomo wakho wekukhuluma nabo ngaleyo ndzaba loyihlelile. Usebentisa lamaphuzu lamabili, hlola lokwatiswa lokutfolile, bese ushiya kuphela loko lokuhambisana kahle nendzaba yakho.

Nangabe unikiwe luhlaka lolunesihloko kanye nemaphuzu layinhloko, kufanele ululandzele. Kodvwa-ke inkhulumo yakho itawuba nemandla kakhulu nangabe uwakhumbula lamaphuzu lamabili lesesikhulume ngawo nawuchaza liphuzu ngalinye leliyinhloko. Nangabe ungakanikwa luhlaka, nguwe lokufanele ukhetse emaphuzu layinhloko.

Nase uwati kahle emaphuzu akho layinhloko, futsi sewukuhlelile nekwatiswa lotakufaka ngaphansi kwawo, kutawuba melula kwetfula inkhulumo yakho. Nalabo labakulalele batawuzuza kakhulu kuwo.

Tindlela Letehlukehlukene Longahlela Ngato Indzaba Yakho. Kunetindlela letehlukehlukene longatisebentisa nawuhlela inkhulumo yakho. Nangabe sewutetayele letindlela, utawubona kutsi letinyenti tato tiyaphumelela, kuye ngemgomo wakho.

Indlela lesebentisekako kutsi uhlele indzaba yakho ngetihlokwana. (Liphuzu ngalinye leliyinhloko liyadzingeka ngobe lisita labo labakulalele kutsi bayicondzisise indzaba, futsi kuyakusita nekutsi ufinyelele umgomo wenkhulumo yakho.) Lenye indlela kutsi tintfo utihlele ngekulandzelana kwato. (Nasi sibonelo: Tintfo letenteka ngembikwaZamcolo tingalandzelwa tintfo letenteka ngaphambi kwekutsi kubhujiswe iJerusalema nga-70 C.E., bese kutsi tona tilandzelwe tintfo letenteka esikhatsini setfu lamuhla.) Indlela yesitsatfu yimbangela nemphumela. (Nawuchaza usengacala ngembangela nobe ngemphumela. Nasi sibonelo: Usengacala ngesimo lesikhona, lokungumphumela, bese usho imbangela yaso.) Indlela yesine ihlanganisa kucatsanisa. (Ungacatsanisa intfo lenhle nalembi.) Ngalesinye sikhatsi enkhulumeni kungasebenta tindlela letingetulu kwaleyodvwa.

Ngesikhatsi Stefano amangalelwa ngemanga eNkantolo YemaJuda, wakhuluma emavi lanemandla labeveta tintfo ngendlela letilandzelana ngayo. Njengobe ufundza ngaloku kuMisebenti 7:2-53, naka kutsi emaphuzu abekwe ngendlela lenengcondvo. Stefano wacala ngekucacisa kutsi ukhuluma ngetintfo letenteka lebebangeke batiphike. Wabese uveta kutsi nanobe Josefa azondwa bomnakabo, Nkulunkulu wamsebentisa kuze abasindzise. Ngemuva kwaloko, waveta kutsi emaJuda akazange amlalele Mosi, loyo Nkulunkulu labemsebentisa. Waphetsa ngekugcizelela kutsi umoya wemaJuda asendvulo wawufana nalowo lowawuvetwe ngulabo lababulala Jesu Khristu.

Emaphuzu Layinhloko Akangabi Manyenti. Kunobe ngusiphi sihloko, mancane emaphuzu ladzingekako kuze usicacise. Esikhatsini lesinyenti lamaphuzu akendluli kulasihlanu. Loku kuyasebenta ngisho nobe inkhulumo yakho itawutsatsa imizuzu lesihlanu, lelishumi, lengemashumi lamatsatfu, nobe ngetulu. Ungetami kugcamisa emaphuzu lamanyenti layinhloko. Enkhulumeni leyodvwa, ambalwa kuphela emaphuzu labo labalalele labakhona kuwabamba. Nangabe inkhulumo yakho iyindze, kufanele uwagcizelele kakhulu nangendlela lecacile lawo maphuzu layinhloko.

Ngisho nobe angakanani emaphuzu layinhloko lowasebentisako, ciniseka kutsi ngalinye lawo ulichaza kahle. Banike sikhatsi lesenele labo labakulalele sekutsi bacabange ngeliphuzu ngalinye leliyinhloko kuze litewungena kahle etingcondvweni tabo.

Inkhulumo yakho kufanele ivakale imelula. Loku akuyi ngaso sonkhe sikhatsi ngekutsi kungakanani kwatiswa lokusebentisile. Nangabe emaphuzu uwabeke kahle ngephansi kwetihlokwana letimbalwa futsi uchaze ngalinye ngalinye ngesikhatsi, kutawuba melula kutsi labo labakulalele bahambisane nawe futsi ngeke bayikhohlwe melula leyo nkhulumo.

Yenta Emaphuzu Layinhloko Agcame. Nangabe indzaba yakho uyihlele kahle, ngeke kube matima kugcizelela emaphuzu layinhloko njengobe wetfula inkhulumo.

Indlela lehamba embili yekwenta emaphuzu layinhloko agcame kutsi emaphuzu lasekelako, imibhalo kanye nalokunye ukwetfule ngendlela letawukwenta kutsi umcondvo loyinhloko unakeke futsi uchazeke kahle. Onkhe lamanye emaphuzu kufanele acacise, afakazele, nobe achaze liphuzu leliyinhloko. Ungengeti lamanye emaphuzu langahambelani nendzaba yakho ngenca nje yekutsi ayajabulisa. Njengobe uchaza lalamanye emaphuzu, khombisa ngalokucacile kutsi ahlangana njani neliphuzu leliyinhloko lalisekelako. Loko ungakushiyeli kulabo labakulalele kutsi batibonele bona. Indlela lamaphuzu lahlangana ngayo neliphuzu leliyinhloko ungayiveta ngekutsi uphindzaphindze emagama layinhloko laveta umcondvo lobalulekile, nobe uwuphindzaphindze njalo umcondvo weliphuzu leliyinhloko.

Emaphuzu layinhloko letinye tikhulumi tiwagcamisa ngekuwabala. Nanobe lena kungulenye yetindlela tekugcamisa emaphuzu layinhloko, akukafaneli emaphuzu bese asisawakhetsi kahle nobe singawachazi ngendlela lenengcondvo.

Ungase ukhetse kulisho ekucaleni liphuzu leliyinhloko ngaphambi kwekuchaza lalamanye emaphuzu lalisekelako. Loku kutawusita labo labalalele kutsi babone kubaluleka kwemaphuzu latawulandzela futsi kutawuphindze kuligcizelele leliphuzu leliyinhloko. Ungaphindze uligcizelele leliphuzu ngekutsi ulibukete ngemuva kwekulichaza kahle.

Emsebentini Wekushumayela. Lamaphuzu lesesikhulume ngawo akasebenti kuphela nasetfula tinkhulumo, kodvwa ayasebenta nalapho sisemsebentini wekushumayela. Nawulungiselela, tinake tintfo bantfu endzaweni yakini labaticabangako. Khetsa indzaba letakusita kutsi ukhone kubakhombisa kutsi liBhayibheli libaniketa liphi litsemba ngephansi kwaleso simo. Lokungenani khetsa emaphuzu layinhloko lamabili kuze uchaze loko. Ncuma kutsi ngumiphi imibhalo lotayisebentisa kuze usekele lawo maphuzu. Ngemuva kwaloko hlela kutsi utayicala kanjani inshumayelo yakho. Nawulungiselele ngaleyo ndlela utawukhona kwenta lushintjo loludzingekako nawukhuluma. Kutawuphindze kukusite kutsi ukhulume ngetintfo labatawuhlale batikhumbula labo loshumayela kubo.