Kutisebentisa Ngemphumelelo Tintfo Lesingatibona

KUNGANI kufanele usebentise tintfo lesingatibona ngemehlo nawufundzisa? Kungobe loko kungenta kufundzisa kwakho kuphumelele kakhulu. Jehova Nkulunkulu kanye naJesu Khristu batisebentisa tintfo letinjalo, futsi singafundza kubo. Nangabe letintfo lesingatibona ngemehlo tisetjentiswa kanye nalokushiwo ngemlomo, loko lokukhulunywa ngako siyakuva siphindze sikubone. Loku kungasita ekwenteni kutsi labo labakulalele bakunake futsi kubasite bakucondze kancono loko lokhuluma ngako. Ungatisebentisa njani letintfo nawushumayela tindzaba letimnandzi? Ungaciniseka njani kutsi utisebentisa ngemphumelelo?

Indlela Bafundzisi Labakhulu Labatisebentisa Ngayo Tintfo Lesingatibona Ngemehlo. Jehova wasebentisa tintfo lokumelula kutikhumbula kuze afundzise tifundvo letibalulekile. Ngalobunye busuku, wabitela Abrahama ngaphandle futsi watsi: “Buka etulu esibhakabhakeni ubale tinkhanyeti, nawungatibala. . . . Nentalo yakho-ke iyawuba ngako.” (Gen. 15:5) Ngisho nobe loko labetsenjiswe kona bekubonakala kungeke kwenteke, Abrahama watsintseka kakhulu futsi wakhombisa kukholwa kuJehova. Kulokunye, Jehova watfuma Jeremiya endlini yembumbi futsi watsi kufanele angene endzaweni lapho umbumbi asebentela khona kuze ambone nakabumba. Leso kwaba sifundvo lesihle kakhulu lesiveta ligunya uMdali lanalo kubantfu. (Jer. 18:1-6) Jona yena abengasikhohlwa njani sifundvo lesimayelana nekuba nemusa Jehova lamfundzisa sona asebentisa sihlahla semhlafutfo (nobe luselwa)? (Jona 4:6-11) Ngaletinye tikhatsi Jehova bekaze atjele baphrofethi bakhe kutsi nabendlulisela tiphrofetho bakubonise loko labakhuluma ngako ngekutsi basebentise tintfo letitsite lesingatibona ngemehlo. (1 Khos. 11:29-32; Jer. 27:1-8; Hez. 4:1-17) Lithende lekukhontela kanye netintfo lebetisethempelini, tisisita kutsi sicondze tintfo letisezulwini. (Heb. 9:9, 23, 24) Nkulunkulu abephindze asebentise imibono leminyenti kuze endlulisele kwatiswa lokubalulekile.​—Hez. 1:4-28; 8:2-18; Imis. 10:9-16; 16:9, 10; Semb. 1:1.

Jesu watisebentisa njani tintfo lesingatibona? Ngesikhatsi baFarisi kanye nemalunga elicembu laHerodi betama kumgiba ngenkhulumo yakhe, Jesu wacela denariyo futsi wabakhombisa sitfombe saKhesari lesikuwo. Ngemuva kwaloko wachaza kutsi kufanele banike Khesari lokukwakhe, futsi banike Nkulunkulu lokukwakhe. (Mat. 22:19-21) Kuze afundzise bantfu sifundvo sekudvumisa Nkulunkulu ngako konkhe lesinako, Jesu wababonisa umfelokati lobekasethempelini futsi anikela ngako konkhe labenako nalabengaphila ngako, lobekutinhlavu letimbili letatinelinani lelincane kakhulu. (Luk. 21:1-4) Kuze ente sibonelo sekutfobeka, ngalesinye sikhatsi wasebentisa umntfwana lomncane lote sifiso sekuba nesikhundla. (Mat. 18:2-6) Naye waphindze wakhombisa kutsi kusho kutsini kutfobeka ngekutsi ageze tinyawo tebafundzi bakhe.​—Joh. 13:14.

Tindlela Tekusebentisa Tintfo Lesingatibona. Tsine asifani naJehova, ngeke sikhone kusebentisa imibono. Nobe kunjalo, kunetitfombe letinyenti letenta umuntfu acabange letivela etincwadzini taBoFakazi BaJehova. Tisebentise kuze usite bantfu labanenshisekelo kutsi babone kutsi litawuba njani liPharadisi lasemhlabeni lesetsenjiswe lona eVini laNkulunkulu. Nawuchuba sifundvo seliBhayibheli sasekhaya, ungase ukhombise umfundzi sitfombe lesihambisana naloko lenikufundzako futsi umcele kutsi asho loko lakubonako. Ngesikhatsi umphrofethi Amose atfola leminye imibono, Jehova wambuta: ‘Ubonani, ye-Amose?’ (Amo. 7:7, 8; 8:1, 2) Ungase ubute imibuto lefanako nawukhombisa bantfu titfombe letentelwe kukusita nawufundzisa.

Nawubhala phansi tibalo nobe usebentisa lishadi leliveta kulandzelana kwetintfo, loko kungasita bantfu kutsi basheshe baticondze tiphrofetho letifanana naleso lesimayelana ‘netikhatsi letisikhombisa,’ lesitfolakala kuDanyela 4:16, kanye naleso lesimayelana ‘nemaviki langu-70,’ lesitfolakala kuDanyela 9:24 (catsanisa ne-NW). Tintfo letinjalo tiyavela etincwadzini tetfu letinyenti.

Ekukhonteni kwenu kwemndeni, kucoca ngetintfo letimayelana nelithende lekukhontela, lithempeli laseJerusalema, kanye nembono welithempeli lowabonwa nguHezekeli kungaba melula nangabe nisebentisa sitfombe nobe umdvwebo. Loku kungatfolakala ku-“Insight on the Scriptures,” kusandzisanchazo se-“New World Translation of the Holy Scriptures​—With References,” kanye nakubomagazini labehlukehlukene be-Sicongosekulindza.

Nawufundza liBhayibheli kanye nemndeni wakho, wasebentise kahle emabalave. Buka luhambo lwa-Abrahama lolusuka e-Uri luya eHarani, lwehlele eBetheli. Hlola indlela sive sema-Israyeli lesahamba ngayo nasisuka eGibhithe siya eVeni Lesetsembiso. Tfola indzawo leyaniketwa sive ngasinye saka-Israyeli kutsi ibe lifa laso. Buka bukhulu bendzawo lebeyibuswa nguSolomoni. Buka indlela Elija labaleka ngayo kusuka eJezreyeli kuya ehlane lebelingemuva kweBherisheba ngesikhatsi Jezebeli amsongela. (1 Khos. 18:46–19:4) Tfola emadolobha Jesu labeshumayela kuwo. Buka luhambo lwaPawula, njengobe luchazwe encwadzini yeMisebenti.

Tintfo lesingatibona tilusito nawusita bafundzi beliBhayibheli kutsi bati imisebenti yelibandla. Ungase umkhombise ikhophi yeluhlelo lwemhlangano futsi umchazele ngaloko lesicoca ngako emihlanganweni lemincane nalemikhulu. Labanyenti bayatsintseka nabavakashela LiHholwa LeMbuso nobe lihhovisi leligatja laBoFakazi BaJehova. Lena kungaba yindlela lekahle yekususa imibono lengasilo liciniso mayelana nemsebenti wetfu kanye nenjongo yawo. Nawubukisa umuntfu LiHholwa LeMbuso, veta indlela lelehluke ngayo kuletinye tindzawo lokukhontelwa kuto. Gcizelela kutsi liyindzawo lehloniphekile lokufundzelwa kuyo. Mkhombise tintfo letentelwe umsebenti wetfu wekushumayela, njengendzawo lokubekwa kuyo tincwadzi, emabalave ensimu, kanye nemabhokisi emnikelo (langafani nemapuleti ekukoleka umnikelo).

Nangabe ema-video lahlelwe Sigungu Lesibusako atfolakala, wasebentise kuze wente bantfu baletsembe liBhayibheli, usite bafundzi betayelane nemsebenti waBoFakazi BaJehova, futsi ukhutsate labo lababukele kutsi baphile ngekuvumelana netimiso teliBhayibheli.

Kusebentisa Letintfo Nawukhuluma Nemacembu Lamakhulu. Nangabe tilungiselelwe kahle futsi tetfulwe ngendlela lefanele, tintfo lesingatibona tingaba nemiphumela lemihle ekufundziseni emacembu lamakhulu. Leto tintfo titfolakala ngetinhlobo letehlukehlukene njengobe tilungiselelwa sisebenti lesetsembekile nalesihlakaniphile.

Tihloko letifundvwako ku-Sicongosekulindza tivame kuba netitfombe letisita umchubi kutsi agcizelele emaphuzu labalulekile. Letitfombe tiba khona nasetincwadzini letisetjentiswa eSifundvweni SeliBhayibheli Selibandla.

Letinye tinhlaka tetinkhulumo telinyenti tiyakuvumela kutsi ukhone kusebentisa tintfo lesingatibona kuze ucacise emaphuzu. Nobe kunjalo, kuzuzisa kakhulu kugcizelela loko lokuseBhayibhelini, ngobe linyenti lalabo lokhuluma nabo lisuke linalo. Nangabe kudzingeka sitfombe nobe lokunye kuze ucacise liphuzu linye nobe lamanyenti enkhulumeni yakho, kufanele ucale uhlole kutsi leyontfo ibonakala kahle yini (nobe kutsi iyafundzeka) nakulabo labahleti emuva endzaweni lenibambela kuyo imihlangano. Tintfo letinjalo akukafaneli tisetjentiswe njalo.

Umgomo wetfu nasikhuluma nobe sifundzisa sisebentisa tintfo lesingatibona akukafaneli kube kuhlekisa. Nangabe usebentisa intfo lehloniphekile, kufanele ikusite kutsi ukhone kuyicacisa kahle imicondvo ledzinga kwentiwa icace. Tintfo letinjalo tiba lusito nangabe ticacisa loko lokukhulunywa ngako, nobe nangabe tenta kube melula kukucondza, nobe tiniketa bufakazi lobunemandla bekuba liciniso kwaloko lokushiwoko. Nangabe tisetjentiswe kahle, letintfo tingabatsintsa kakhulu bantfu, kangangekutsi tona kanye neliphuzu lokukhulunywa ngalo bangatikhumbula iminyaka leminyenti.

Kuva kanye nekubona kudlala indzima lebalulekile ekufundzeni. Khumbula kutsi bafundzisi labakhulu bakusebentisa njani loku, futsi wetame kubalingisa nawufundzisa.