Bantfu Labasha—Nitawentani Ngekuphila Kwenu?

“NGIFUNA kutfola lokuncono kakhulu ekuphileni.” Yasho kanjalo lenye intfombatana leseyinsha. Kufanele kube nawe ufuna lokufanako. Kepha-ke, kutfolakala kanjani “lokuncono kakhulu” ekuphileni? Bontsanga yakho nemitfombo yetindzaba, kumbe nabothishela bakho, bangatsi kutfolakala ngekuhola imali lenyenti nekuba nemsebenti losezingeni lelisetulu—kuba ngumuntfu lophumelelako!

Kepha liBhayibheli licwayisa bantfu labasha ngekutsi kufuna imphumelelo yekuba netintfo letikhona kumane nje kulite “nekucosha umoya.” (Umshumayeli 4:4) Kantsi lesinye sizatfu kutsi bambalwa kakhulu labasha labagcina banjingile futsi badvumile. Ngisho nalabo labaphumelelako kuloku bavamise kutitfola sebalahlekelwe litsemba. Lomunye losemusha waseBrithani lowafuna umsebenti lowawudzinga imfundvo lesetulu kakhulu watsi: “Imphumelelo yekuba netintfo letikhona ifanana nelibhokisi lelingenalutfo. Nawubuka lapha ngekhatsi kwalo, awutfoli lutfo.” Kuliciniso kutsi umsebenti ungakwenta unjinge futsi uhlonishwe. Kepha ngeke usenetise “sidzingo [sakho] sakamoya.” (Matewu 5:3, NW) Kantsi-ke, 1 Johane 2:17 ucwayisa ngekutsi “live liyendlula.” Noma ngabe bewungayitfola imphumelelo kulelive, beyingaba yesikhashana.

Ngiko-ke Umshumayeli 12:1 ukhutsata labasha: “Khumbula uMdali wakho etinsukwini tebusha bakho.” Yebo, kukhonta Jehova kuyindlela lencono kunato tonkhe yekusebentisa kuphila kwakho. Kepha kufanele ucale ngekukufanelekela kukhonta Nkulunkulu. Ungakwenta njani loko? Futsi imphilo yekukhonta Nkulunkulu ihlanganisani?

Kufanelekela Kuba NguFakazi WaJehova

Kwekucala nje, kufanele ube nesifiso sekukhonta Nkulunkulu. Lesosifiso asitiveleli ngalokutentakalelako, noma ngabe batali bakho bangemaKhristu. Kufanele utakhele bakho buhlobo naJehova. Lenye intfombatana yatsi: “Kuthandaza kuyakusita kutsi ube nebuhlobo naJehova.”—Tihlabelelo 62:8; Jakobe 4:8.

Roma 12:2 uveta lesinye sinyatselo lokufanele usitsatse. Utsi: “[Hlolisisani] loko lokuyintsandvo yaNkulunkulu, nikwati lokuhle, nalokwemukelekako, nalokuphelele.” Kuyenteka yini ngalesinye sikhatsi kutsi letinye tintfo lofundziswe tona ungatetsembi kahle? Nakunjalo, sebentisa lesikhutsato seliBhayibheli, utenetise ngekutsi letotintfo tiliciniso. Tentele lwakho lucwaningo. Fundza liBhayibheli netincwadzi letisuselwe kulo. Kepha-ke kufundza ngaNkulunkulu akugcini nje ngekuhlatiya lokushiwo liBhayibheli engcondvweni yakho. Tinikete sikhatsi sekuzindla ngaloko lokufundzako khona kutewungena kujule enhlitiyweni yakho. Loku kutawukhulisa lutsandvo lwakho ngaNkulunkulu.—Tihlabelelo 1:2, 3.

Ngetikhatsi letitsite, tama kucoca nebantfu ngaloko lokufundzako, mhlawumbe labo lofundza nabo esikolweni. Sinyatselo lesilandzelako kushumayela nelibandla endlini nendlu. Usahamba ushumayela, kusenekwenteka uhlangane nalofundza nabo, futsi loku kungakwesabisa ekucaleni. Kepha liBhayibheli lisikhutsata kutsi ‘singabi nemahloni ngeliVangeli.’ (Roma 1:16) Wena uphetse umlayeto loniketa litsemba nekuphila! Sikhona yini sidzingo sekuba nemahloni ngawo?

Nangabe batali bakho bangemaKhristu, kungenteka sewuvele uhamba nabo kuyoshumayela. Kepha kukhona yini lokunye lokwati kukwenta ngaphandle nje kwekuma emnyango ubindze nome uhambise bomagazini nemapheshana? Uyakwati yini kutikhulumela, usebentise liBhayibheli kutsi ufundzise umnikati welikhaya? Nawungakwati, cela lusito lwebatali bakho nome lwalomunye lovutsiwe ebandleni. Umgomo wakho akube kufanelekela kuba ngummemeteli wetindzaba letinhle longakabhajatiswa.

Ngekuhamba kwesikhatsi, utawuba nesifiso sekutinikela kuNkulunkulu—ufunge kutsi utamkhonta kusukela ngaleso sikhatsi kuchubeke. (Roma 12:1) Kepha kutinikela kuNkulunkulu akusiyo nje intfo yangasese kuphela. Nkulunkulu ufuna kutsi umuntfu nemuntfu “avume ngemlomo wakhe [elubala] kube kusindziswa kwakhe.” (Roma 10:10) Nawubhajatiswa, ucale uvume lukholo lwakho ngemlomo, kube ngukhona ubhajatiswa. (Matewu 28:19, 20) Kuliciniso kutsi kubhajatiswa kusinyatselo lesikhulu. Kepha ungazimeli, ucabange kutsi kungenteka ugcine uwile ngesizatfu lesitsite. Nawetsembele emandleni lavela kuNkulunkulu, utakuniketa “emandla lamakhulu” kute akusite ume ucine.—2 Khorinte 4:7; 1 Phetro 5:10.

Nasewubhajatiswa, uba ngulomunye waboFakazi BaJehova. (Isaya 43:10) Loku kufanele kuyitsintse kakhulu indlela lewutakusebentisa ngayo kuphila kwakho. Kutinikela kuNkulunkulu kufaka ekhatsi ‘kutidzela.’ (Matewu 16:24) Ungashintja leminye imigomo netifiso lobewunato, “[ufune] kucala umbuso waNkulunkulu.” (Matewu 6:33) Kubhajatiswa kuvulelana ematfuba lamanyenti ekwenta loko. Ase sibuke lamanye awo.

Ematfuba Ekukhonta Nkulunkulu Sikhatsi Lesigcwele

● Kuba lihlahlandlela kungulelinye lalamatfuba. Ummemeteli lolihlahlandlela ngumKhristu lobhajatisiwe futsi losibonelo, lohlele kutsi ashumayele tindzaba letinhle sikhatsi lesisukela ema-aweni langu-70 inyanga nenyanga. Kuba sensimini sikhatsi lesinyenti kutakusita utfutfukise emakhono akho ekushumayela nekufundzisa. Labanyenti labangemahlahlandlela batfole injabulo yekusita labo lababafundzisa liBhayibheli babe boFakazi lababhajatisiwe. Ngumuphi lomunye umsebenti longaletsa injabulo nekwenetiseka lokulingana naloko?

Emahlahlandlela lamanyenti kuyaye kudzingeke atohe kuze atiphilise. Lamanyenti akulungiselela kusenesikhatsi loku ngekufundza likhono lelitsite esikolweni nome kubatali babo. Nangabe wena nebatali bakho nikubona kungaba lusito kutsi utfole imfundvo leyengetiwe nawucedza sikolwa, kufanele uciniseke kutsi sifiso sakho sikutisekela emsebentini wakho wekushumayela, mhlawumbe ube sisebenti sesikhatsi lesigcwele, hhayi kugaya imali.

Noma kunjalo, lihlahlandlela linaka kakhulu umsebenti walo wekushumayela, hhayi umsebenti walo wekutiphilisa—lisite labanye batfole kuphila lokuphakadze! Bekungaba njani kutsi utibekele umgomo wekuba lihlahlandlela? Kuba lihlahlandlela kuvamise kuvulelana ematfuba ekutfola lamanye emalungelo. Sibonelo, lamanye emahlahlandlela atfutsela etindzaweni lapho kudzingeka khona kakhulu bamemeteli beMbuso. Lamanye afundza lulwimi lwakulelinye live, bese asebenta nemabandla akuleyo ndzawo lasebentisa lololwimi. Lamanye aze atfutsele nakulamanye emave. Noma kanjani, kuba lihlahlandlela kuyindlela yekuphila leyenetisako!

● Sikolwa Lesisekelwe EBhayibhelini SemaKhristu Lashadene singulelinye litfuba lelivulekile. Lesikolwa sicecesha bantfu labashidile kuze bakhone kusentjentiswa kakhulu nguJehova nayinhlangano yakhe. Linyenti lalabaphotfulile labelwa emaveni lelatalelwa kuwo, etindzaweni lapho kunesidzingo khona. Labanye babelwa kulamanye emave nangabe timo tabo tibavumela. Labo labaphotfulile bangakhonta njengemahlahlandlela lakhetsekile esikhashana kuze basungule umsebenti futsi bawandzise etindzaweni letikhashane telive.

● Sikolwa Lesisekelwe EBhayibhelini Sebazalwane Labangakashadi sentelwa kucecesha bazalwane labangakashadi labafanelekako, labangulabadzala belibandla nalabatinceku letisebentako. Batfola imfundvo lejulile letsatsa emaviki lasiphohlongo lemacondzana nemitfwalo yalabadzala emabandleni netinceku letisebentako, kuhleleka kwenhlangano, nendlela yekufundzisa. Labanye batfola tabelo tekusebenta emaveni akubo kantsi labanye bacelwa kutsi baye kulamanye emave.

● Umsebenti waseBethel uhlanganisa kusebenta ngekutitsandzela kulesinye setakhiwo temagatja taboFakazi BaJehova. Labanye labaseBethel banemsebenti locondzene ngco nekukhicitwa kwetincwadzi teliBhayibheli. Labanye baniketwa leminye imisebenti lebalulekile, njengekunakekela takhiwo nemishini, kanye nekunakekela labo labasebenta eBethel. Yonkhe imisebenti ingemalungelo langcwele ekusebentela Jehova. Ngetulu kwaloko, labo labaseBethel batfola nenjabulo yekwati kutsi konkhe labakwentako kusita tigidzi tebazalwane babo emhlabeni jikelele.

Ngalesinye sikhatsi, kumenywa bazalwane labanemakhono latsite kutsi basebente eBethel. Kepha labanyenti baceceshwa sebafikile eBethel. Labo labaseBethel abasebenteli kwakha imali, kepha benetiswa nguloko kudla, indzawo yekuhlala, nemadlana yekunakekela tidzingo tabo labasuke baniketwe yona. Lomunye losemusha losebenta eBethel wachaza umsebenti wakhe kanje: “Kumnandzi kakhulu! Umsebenti wona awumelula kangako, kepha ngitfole tibusiso letinyenti ngekusebenta lapha.”

● Umsebenti wemhlaba wonkhe uvulela umuntfu litfuba lekuba nesandla ekwakhiweni kwetakhiwo temagatja nemaHholwa eMbuso. Tisebenti temhlaba wonkhe, njengoba tibitwa kanjalo, tihamba tiye kulamanye emave kute tisite emisebentini yekwakha lenjengaleyo. Lona ngulomunye umsebenti longcwele, lofana nalowo lowawentiwa ngulabo labebakha lithempeli laSolomoni. (1 Emakhosi 8:13-18) Tisebenti temhlaba wonkhe tinakekelwa ngendlela lefana ncamashi neyalabo labasebenta eBethel. Labazalwane nabodzadze banelilungelo lelikhulu lekwenta lomsebenti lowentiwa emhlabeni wonkhe loniketa Jehova ludvumo.

Khonta Jehova Ngemphefumulo Wonkhe

Kukhonta Jehova kuyindlela lencono kakhulu yekusebentisa kuphila kwakho. Bewungeke yini sewutibekele umgomo wekusebentela Nkulunkulu sikhatsi lesigcwele? Khuluma nebatali bakho, labadzala ebandleni lakini, nembonisi wenu wesifundza ngemsebenti wesikhatsi lesigcwele. Nawufisa kuya eBethel, eSikolweni Lesisekelwe EBhayibheli Sebazalwane Labangakashadi nobe eSikolweni Lesisekelwe EBhayibheli SemaKhristu Lashadene, bani khona emihlanganweni yalabo labanalesosifiso, leba semihlanganweni yetifundza neyetigodzi.

Kuliciniso kutsi ngeke sonkhe sikufanelekele noma sikukhone kuba tisebenti tesikhatsi lesigcwele. Ngalesinye sikhatsi, kungaphili kahle, tinkinga tetimali, nemitfwalo yasekhaya kungenta umuntfu angakhoni kwenta lokunyenti emsebentini waJehova. Noma kunjalo, onkhe emaKhristu latinikele kufanele alalele lomyalo weliBhayibheli: “Uboyitsandza iNkhosi, Nkulunkulu wakho, ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho.” (Matewu 22:37) Jehova ufuna wente lokuncono kakhulu, kuye ngetimo takho. Noma ngabe kukumela kanjani, yenta kusebentela Jehova kute kucala ekuphileni kwakho. Tibekele imigomo yakamoya longayiphumelelisa. Yebo, “khumbula uMdali wakho etinsukwini tebusha bakho”—ubusiswe kuze kube phakadze ngekwenta kanjalo!

Yonkhe imiBhalo icashunwe eBhayibhelini lesiSwati. Kepha nangabe kuvela NW, isuke icashunwe ku-New World Translation of the Holy Scriptures.