Indlela Lavikelwa Ngayo Jesu

NGALETINYE tikhatsi Jehova wenta tintfo letimangalisako kuze avikele bantfwana kanye nalabo labangakhoni kutivikela. Nakwenteka uhamba endzaweni lesemakhaya, ungase ubone lenye yetindlela Jehova lakwenta ngayo loko. Kepha ekucaleni ungase ungakucondzi lokwentekako.

Ungase ubone inyoni ihlala phansi eceleni kwakho. Ibonakala ngatsi ilimele. Njengobe uzama kusondzela kuyo, ihudvula timphiko tayo ikubalekele. Njengobe uyilandzela lenyoni, ichubeka ikubalekela. Ngemuva kwesikhashana nje, lenyoni ivele indize. Luphiko lwayo lenyoni belungakalimali. Uyati yini kutsi lenyoni beyentani?—

Phela lapho lenyoni beyihleti khona eceleni kwakho, emazini ayo bewabhace ekhatsi emeneni. Lomake waletinyoni bekesaba kutsi ungase ubatfole labantfwabakhe bese uyabalimata. Ngako-ke, bekenta shengatsi ulimele, kuze akwente usuke lapho. Uyati yini kutsi ngubani longasivikela njengalomake waletinyoni lapho avikela bantfwabakhe?— EBhayibhelini, Jehova ufaniswa nenyoni lebitwa ngekutsi lusweti, levikela bantfwabayo.​—Dutheronomi 32:11, 12.

Umntfwana loligugu kakhulu kuJehova yiNdvodzana yakhe letsandzekako, Jesu. Ngalesikhatsi Jesu asezulwini, bekangumuntfu longabonakali lonemandla njengaBabe wakhe. Bekangakhona kutinakekela. Kepha ngalesikhatsi Jesu atalwa emhlabeni aluswane, bekangakhoni kutinakekela. Bekadzinga kuvikelwa.

Kuze akhone kwenta intsandvo yaNkulunkulu emhlabeni, kwadzingeka kutsi Jesu akhule abe ngumuntfu lomdzala lote sono. Kunaloko, Sathane wetama kubulala Jesu asemncane. Imetamo yekubulawa kwaJesu ngalesikhatsi asengumntfwana kanye nendlela Jehova lamvikela ngayo, kwenta indzaba lemnandzi. Uyafuna yini kuyiva lendzaba?—

Ngemuva kwesikhashana nje Jesu atelwe, Sathane wabangela kutsi kubonakale intfo lefana nenkhanyeti kutsi ikhatimule esibhakabhakeni ngaseMphumalanga. Emadvodza latiwa ngekutsi tati, labewafundza ngetinkhanyeti, alandzela lenkhanyeti libanga lelidze aze afika eJerusalema. Lapho, letati tabuta kutsi utawutalelwa kuphi lomntfwana lotawuba yinkhosi yemaJuda. Ngalesikhatsi kubutwa emadvodza labekati kutsi litsini liBhayibheli ngaloko, atsi: Utawutalelwa “eBhetlehema.”​—Matewu 2:1-6.

Inkhosi lembi yaseJerusalema, Herodi, yatsi nayiva kutsi kunenkhosi lensha lesandza kutalwa edolobheni lelingumakhelwane eBhetlehema, yatjela letati kutsi: “Hambani niyewumfunisisa lomntfwana, nitsi ningamtfola nite nitengitjela.” Uyati yinindzaba Herodi bekafuna kwati kutsi angamtfolaphi Jesu?— Kungenca yekutsi Herodi bekanemona futsi bekafuna kumbulala.

Nkulunkulu wayivikela kanjani iNdvodzana yakhe?— Ngalesikhatsi letati tifika kuJesu, tamupha tipho. Ngemuva kwaloko, Nkulunkulu waniketa letati secwayiso ephusheni kutsi tingabuyeli kuHerodi. Ngako-ke tabuyela ekhaya ngalenye indlela, atizange tibuyele eJerusalema. Ngalesikhatsi Herodi atfola kutsi letati tihambile, watfukutsela kakhulu. Emetameni yakhe yekubulala Jesu, Herodi wahlela kutsi kubulawe bonkhe bantfwana bebafana labangephansi kweminyaka lemibili budzala. Kodvwa ngaleso sikhatsi Jesu bese angekho.

Uyati yini kutsi Jesu waphunyula njani?— Ngemuva kwekutsi letati tihambile tibuyele ekhaya, Jehova wecwayisa indvodza yaMariya Josefa kutsi bavuke baphindze babalekele endzaweni lekhashane eGibhithe. Lapho eGibhithe, Jesu bese avikelekile kuHerodi lomubi. Ngemuva kweminyaka, ngalesikhatsi boMariya naJosefa babuyela emuva basuka eGibhithe naJesu, Nkulunkulu wanika Josefa lesinye secwayiso. Wamtjela ephusheni kutsi ahambe abuyele eNazaretha lapho Jesu bekatawuphepha khona.​—Matewu 2:7-23.

Uyayibona yini indlela Jehova lavikela ngayo INdvodzana yakhe?— Ungatsi ngubani lofanana naletinyoni letincane letibhaciswe ngumake wato emeneni nome lofanana naJesu ngalesikhatsi aseluswane? Wena awufani yini nabo?— Kunebantfu labafuna kukulimata nawe. Uyati yini kutsi bobani?

LiBhayibheli litsi Sathane unjengelibhubesi lelibhodlako lelifuna kusidla. Ngalokuvamile libhubesi litsandza kuhlasela tilwane letincane, naSathane nemadimoni akhe bavame kuhlasela bantfwana labancane. (1 Phetro 5:8) Kepha Jehova unemandla kwendlula Sathane. Jehova angavikela bantfwana bakhe nobe acedze nome yini lembi Sathane layentako kubo.

Usakhumbula yini eSehlukweni 10 salencwadzi kutsi Sathane nemadimoni akhe betama kusentisa ini?— Betama kusenta sihlanganyele ebulilini lobo Nkulunkulu langabuvumeli. Kepha bobani labangahlanganyela ebuhlotjeni bebulili kuphela?— Bantfu labadzala lababili bebulili lobehlukile labashadene.

Nobe kunjalo, kuyadzabukisa kusho kutsi labanye bantfu labadzala batsandza kulalana nebantfwana labancane. Nabenta kanjalo, bantfwana bebafana nebemantfombatana bangase bacale kwenta tintfo letimbi labatifundze kulabantfu labadzala. Bangase bacale kusebentisa kabi titfo tabo tebulili. Kadzeni edolobheni laseSodoma kwenteka intfo lefananako. LiBhayibheli litsi bantfu balapho kusukela ‘emadvodzeni lamadzala kuya ebafaneni,’ betama kulalana nemadvodza labevakashele Loti.​—Genesisi 19:4, 5.

Njengobe naJesu bekadzinga kuvikelwa, nawe futsi uyakudzinga kuvikelwa kubantfu labadzala, nakulabanye bantfwana labangase betame kulalana nawe. Ngalokuvamile labantfu batawenta shengatsi babangani bakho. Bangase futsi bakunikete lokutsite nangabe ubatsembisa kutsi angeke utjele bantfu loko labafuna nikwente. Kepha labantfu laba baticabangela bona kuphela, njengaSathane nemadimoni akhe, futsi bafuna kutenetisa bona kuphela. Futsi betama kutenetisa ngekutsi bahlanganyele bulili nebantfwana labancane. Loku kuyintfo lembi kakhulu!

Uyati kutsi yini labangase bayente kute batenetise bona?— Bangase betame kuphotholoza titfo takho tebulili. Nome bangase baphotholoze titfo takho tebulili basebentisa titfo tabo tebulili. Kepha ungavumeli umuntfu adlale ngeligwayi lagogo nobe adlale ngasisi. Ngisho nobe kungatsiwa ngubhuti wakho nobe ngudzadzewenu, ngumake nobe ngubabe wakho, ungabavumeli badlale ngaletitfo takho tebulili. Letitfo takho temtimba, tangasense.

Ungawuvikela njani umtimba wakho kubantfu labenta tintfo letimbi njengaleti?— Kwekucala, angavumeli nome ngabe ngubani adlale ngetitfo takho tebulili. Nangabe umuntfu etama kwenta loko, vele umemete utsi: “Ngiyekele! Ngitakuceba!” Futsi nangabe lomuntfu atsi lalakwentile kubangelwe nguwe, ungakukholwa loko. Akusilo liciniso. Vele uhambe uyomceba ngisho nobe kutsiwa ngubani. Kufanele umcebe ngisho nobe atsi loko lebenikwenta kuyimfihlo yenu nobabili kuphela. Ngisho nome lomuntfu akutsembisa kukupha tipho letinhle, nobe akwesabisa kabuhlungu, kumelwe usuke lapho uhambe uyomceba.

Akudzingeki kutsi wesabe, kepha kudzingeka ucaphelisise. Nangabe batali bakho bakwecwayisa ngebantfu nobe tindzawo letingase tibe yingoti kuwe, kudzingeka ubalele. Nawenta kanjalo, uyatiphephisa ekulinyatweni bantfu lababi.