Jehova Wamvikela Jesu

Endzaweni lesemphumalanga yaka-Israyeli, bekunebantfu lebebakholelwa kutsi tinkhanyeti tingabahola. Ngalobunye busuku, lamanye emadvodza aseMphumalanga abona kukhanyisa inkhanyenti esibhakabhakeni ase ayayilandzela. ‘Lenkhanyeti’ yawahola aze afika eJerusalema. Lamadvodza acala kubuta bantfu atsi: ‘Uphi lomntfwana lotelwe, loyinkhosi yemaJuda? Site lapha kuze simkhotsamele.’

Ngesikhatsi Herodi inkhosi yaseJerusalema eva kutsi kutelwe inkhosi, wacala kukhatsateka. Wase ubuta bonkhe baphristi labakhulu watsi: ‘Lomntfwana loyinkhosi kufanele atalelwe kuphi?’ Bamtjela batsi: ‘Baphrofethi batsi utawutalelwa eBhetlehema.’ Herodi wase ubita emadvodza aseMphumalanga watsi kuwo: ‘Hambani niye eBhetlehema niyewumfunisisa lomntfwana, nitsi ningamtfola nite nitongitjela kuze nami ngiye kuyomkhotsamela.’ Abekhuluma emanga.

“Lenkhanyeti” yaphindze yavela. Lamadvodza ayilandzela aze ayofika eBhetlehema. ‘Lenkhanyeti’ yema macondzana nendlu futsi lamadvodza ase angena kulendlu. Atfola Jesu anamake wakhe Mariya. Aguca embikwaJesu, ase amupha ligolide nemakha esihlahla semphepho newemure. Lamadvodza abetfunywe nguJehova yini? Cha.

Ngalobo busuku, Jehova wakhuluma naJosefa ephusheni watsi: ‘Herodi ufuna kubulala Jesu. Vuka, uhambe nemntfwana namake wakhe niye eGibhithe, nihlale khona ngite nginitjele kutsi nibuye.’ Ngekushesha Josefa nemndeni wakhe bahamba baya eGibhithe.

Jehova watjela lamadvodza aseMphumalanga kutsi angabuyeli kuHerodi. Herodi wakwata kakhulu nakabona kutsi lamadvodza awabuyi. Ngesizatfu sekutsi akazange amtfole Jesu, watsi akubulawe bonkhe bantfwana lababafana labalingana naJesu eBhetlehema. Kodvwa Jesu akazange abulawe ngobe abeseGibhithe.

Ngekuhamba kwesikhatsi, Herodi wafa. Ngako, Jehova watsi kuJosefa: ‘Nyalo sewungabuyela emuva.’ BoJosefa, Mariya kanye naJesu babuyela ka-Israyeli base bahlala edolobheni laseNazaretha.