Imibuto Levela Kubafundzi
Ngemuva kwekutalwa kwaJesu, yini leyenta kutsi boJosefa naMariya bahlale eBhetlehema kunekutsi babuyele ekhaya eNazaretha?
LiBhayibheli alisho. Kodvwa lisitjela leminye imininingwane lokungenteka yabenta batsatsa lesincumo.
Ingilosi yatjela Mariya kutsi bekatawutetfwala futsi abe nemntfwana. Ngesikhatsi lengilosi ibaniketa lomlayeto, boMariya naJosefa bebahlala eNazaretha, lokulidolobha lakhaboJosefa, leliseGalile. (Luk. 1:26-31; 2:4) Ngekuhamba kwesikhatsi nababuya eGibhithe, babuyela eNazaretha. Jesu wakhulela lapho futsi waba ngumNazaretha. (Mat. 2:19-23) Kungako sicabanga ngeNazaretha nasikhuluma ngaJesu, ngaJosefa nangaMariya.
Mariya bekanesihlobo lebesihlala kaJuda lebekutsiwa ngu-Elizabethe. Elizabethe bekangumfati waZakhariya umphristi futsi wabese uba ngumake waJohane uMbhabhatisi. (Luk. 1:5, 9, 13, 36) Mariya bekake waya kaJuda avakashele Elizabethe futsi wahlala naye tinyanga letintsatfu. Ngemuva kwaloko wabuyela eNazaretha. (Luk. 1:39, 40, 56) Mariya wayati kanjalo-ke lendzawo yakaJuda.
Ngekuhamba kwesikhatsi, Josefa walalela umyalo lebewutsi ‘bayobhalisa.’ Ngako boJosefa besuka eNazaretha baya eBhetlehema, “lobekulidolobha laDavide” futsi lebekuyindzawo lebekuphrofethwe kutsi utawutalelwa kuyo Mesiya. (Luk. 2:3, 4; 1 Sam. 17:15; 20:6; Mik. 5:2) Ngemuva kwekutsi Mariya sekabelekile, Josefa bekangeke ahambe naye libanga lelidze babuyele eNazaretha neluswane. Ngako bahlala eBhetlehema, lebeyikhashane neJerusalema ngemakhilomitha langaba ngu-9. Bebatawukhona kuya nalomntfwana ethempelini futsi bente umnikelo lebewufunwa nguMtsetfo.—Lev. 12:2, 6-8; Luk. 2:22-24.
Ingilosi yaNkulunkulu beyitjele Mariya kutsi indvodzana yakhe ‘itawunikwa sihlalo sebukhosi sababe wayo Davide’ futsi “itawuba yiNkhosi.” Kungenteka yini kutsi boJosefa naMariya bakubona kubalulekile kutsi Jesu atalelwe edolobheni laDavide? (Luk. 1:32, 33; 2:11, 17) Kusenekwenteka bakubona kukahle kutsi bachubeke bahlala lapho kuze kube ngulapho Nkulunkulu aveta kutsi yini lebekafuna bayente.
Asati kutsi besebahleti sikhatsi lesinganani eBhetlehema ngesikhatsi kufika tati tetinkhanyeti. Kodvwa ngaleso sikhatsi lomndeni besewunendlu futsi indvodzana yabo beyingasesilo luswane. (Mat. 2:11) Kubonakala shengatsi kunekutsi babuyele eNazaretha, bahlala sikhatsi eBethlehema, futsi beseyilikhaya labo.
Herodi wakhipha umyalo wekutsi “kubulawe bonkhe bantfwana lababafana eBhetlehema . . . kusukela kulabaneminyaka lemibili budzala kuya phansi.” (Mat. 2:16) Ingilosi beyecwayise Josefa mayelana naloko ngako yena naMariya babalekela eGibhithe naJesu futsi bahlala lapho kwaze kwaba ngulapho Herodi afa. Ngekuhamba kwesikhatsi, Josefa wahamba nemndeni wakhe baya eNazaretha. Yini leyenta kutsi bangabuyeli eBhetlehema? Kungobe ngaleso sikhatsi, indvodzana yaHerodi, lokungu-Archelaus, beyibusa kaJuda, futsi beyinenhlitiyo lembi. Ngetulu kwaloko ingilosi beyiphindze yecwayisa Josefa ngengoti yekubuyela eBhetlehema. ENazaretha, bebangakhona kukhulisa Jesu kutsi akhonte Nkulunkulu ngekwetsembeka.—Mat. 2:19-22; 13:55; Luk. 2:39, 52.
Kubonakala ngatsi Josefa wafa ngaphambi kwekutsi Jesu avule indlela yekutsi labanye bayophila ezulwini. Ngako Josefa utawuvuswa futsi aphile lamhlabeni. Labanyenti batambona futsi utabachazela kutsi yini leyenta yena naMariya bachubeka bahlala eBhetlehema ngemuva kwekutalwa kwaJesu.